Yaqub 2 - Mewar Alqawarang

Wuuri ɗyine Song ndolar nduki Wayen

¹ Nyeezaku, ndola nu njif nggur tu̱ duk njif nggur chele ɓaanu ɓa, nu̱ke tun wa maita Zhinerem gwaanji Yesu Masiya, nu̱ke chin ke nu̱ zhaaji.

² Na ma nu̱ ve nang, mbu̱ nu̱ gu̱nar ngguri a ɓa ye maa tabar ɓaanu ndu̱ ayimndi ginarwe saran ve ye kharan, ndu̱ ɗye sar ku nu̱ zhaaji, tu̱ yang nu̱ nungndi nggur a vi ndu̱ ngguzur ve nda.

³ Tun ka duk vu̱r zhaaji ye nu̱ gu̱nar nang nu̱ke ɗye sar mbarkandi a venda. Tun ze nda nun za, “Wonji ɗye khar mbarkandi to kha gha.” Tun yang ze nu̱ nungndi nang nun za, “Ching nu̱ fara,” ndu̱ “Kho gha ya ghai.”

⁴ Ai nang, tun a wutkya ndola ye njif nggur tu̱ duk njif ngguri chele ɓaanu, tun a kumar ndu̱ kwaari malkandi ɓa goma?

⁵ Nyeezaku, ndolarku ɓanga! Tu̱k ma, woɗye ɗa, Magham nu̱ dat nu̱ nungndiku nu̱ mbu̱ larji nang tu̱ kha gu̱naranku mbu̱ maito de? Wor ke nduki nu̱ke a ma gwa ɗye mbu̱ ge kwaaɗar nu̱ shiki alqawaran ye nduki nu̱ke a ndola nda ɓa goma?

⁶ Yang ɓaanu, tun wa ka ndu̱m nu̱ nungndi ku. Yang nu̱ gu̱narkwang ke nu̱ ranna nu ku de? Wor ke nu̱ da zhaano ɓaanu nu̱ gume kumar ɓa goma?

⁷ Workya zu̱ ɓalar ndu̱mndi ve dlu̱m nu̱ zhaaji nu̱ zu̱nki nu sang de?

⁸ Ka shi mbar mbu̱ tun wa mbu bibiti nu̱ kwaaɗar ɓu̱ Magham nu̱ke a nje bu̱laran mbu̱ bu̱lar Ɓalar ɓu̱ Magham za, “Ndolo nu̱ bing ɓaaro wa vaaro.”

⁹ Yang mbu̱ tun a ndola njif nggur tu̱ duk njif nggur chele ɓaanu, nang ɗya sola. Bibiti ɓu̱ Musa wa wut za tun wa shi zop mbe bibitang.

¹⁰ Ku̱me njif nu̱ mbuki bibitikwang kap tu̱ yang zhang mbu da chele ni gha, wa kha wa nu̱ mbu bibitikwang ɓa guma da.

¹¹ Ku̱me njif nu̱ zu̱ki za, “Ku̱ shi na zawa ɓa” chin zu̱ki tu̱k za, “Ku̱ tlagha na mu̱t ɓa.” Mbu̱ no ka shi zawa ɓa, yang ta tlagha njif ngguri, nang wa wut nu̱ ɗyine ta kha ma nu̱ zhangndi mbu bibiti ɓu̱ Magham gha.

¹² Ku̱ ɓalar mbu̱ me nu ndu̱ tlu̱nar ɓaanu wut za tun nduki nu̱ke ka ɓa kumaki nu ndu̱ bibiti nu̱ka vu̱rki dli ɗyin.

¹³ Jiwa ye sarchi kumari, Magham ɓu̱ wut ɗaana ye nduki nu̱ke nu̱ ka shi ɗaanar ku ɓa. Yang ba, ɗaana ka ɓa raki kuma.

Maito ndu̱ Tlu̱na

¹⁴ Nyeezaku, a fu̱n boote ku̱ nduk zu̱ za chin wa maita yang tlu̱nar ɓaran nu̱ wut wanang ɓa? Pooni maito ɓaran nang ka ɗana nda shoɗa?

¹⁵ Mbu̱ nyeezerem a nje aa ɗya khuzuku aa nusuku nu̱ke ɗye sar ndu̱ ɗye zu̱m kha wor ɓa.

¹⁶ Tu̱ yang da chele ɓaanu ze wor za, “Kha ma laya, ku̱ Magham vu̱r ɗye zu̱mndi ndu̱ ɗye sar ye nu,” yang nu̱ vu̱r aa nu̱m ye wor nu̱ke man var wor a gangndanang ɓa. Ɓalar nu̱ zu̱ki nang ka boota wor ve nu̱ma, nu̱ke nu̱ vu̱r ɗyi nu̱ke a gangndan kwang ye wor ɓa?

¹⁷ Wanang tu̱k, maito nu̱ke tlu̱na su̱ ɓa mu̱tan.

¹⁸ Ai, njif nggur ka ɗu̱ma zu̱ran za, “To nu̱ maito, yang ɓang tlu̱na kya khara.” Nu̱ke wanangang, wut maito ɓaa ya nu̱ke tlu̱na su̱ ɓa ndang, ɓang ngga wut maito ɓang yoro nu̱ ku̱nshe tlu̱nar ɓanga.

¹⁹ Ta maita no za Magham kaada. Nang mbari! Yang aa khu̱kheetiku wa maita nang, ndu̱ dlu̱rti vari.

²⁰ To nggu̱bu̱ng! Ta shim ku̱ zu̱ nga ɗyi nu̱ saki tu̱ maito waare tlu̱na kha boota si ɓa ndang mu?

²¹ Sarchi nu̱ zhinerem Yibram jiiki ma vu̱r woi ɓaran Yishaku ɗyin du̱ku̱l zoɓar sadkyang, ɗya tlu̱nar nu̱ shiki saki tu̱ shiga nda nu̱ mbu̱ nu̱ dambu ɓa goma?

²² Na ma maito nu̱ke a su̱yen ndu̱ tlu̱nar ɓaranang ɗo, maito ɓaranang kha nyeedlan nu̱ ku̱nshe tlu̱nar ɓaran.

²³ Nang ke ye maa nu̱ bu̱lar Ɓalar ɓu̱ Magham nyeelki nu̱ zu̱ki za, “Ku̱me Yibram wa maita Magham, tu̱ Magham shiga ɗyi nu̱ shiki nang ma dambu she nda.” Nang ke ɗyi nu̱ saki tu̱ qa Yibram rapti Magham.

²⁴ Tun wa na ɗo, alapa nduk ka gwa khar waare sola she Magham nu̱ ku̱nshe tlu̱nar ɓaran, nduk nu̱ka gwa ku̱me maito ɓaran ɗyenda ɓa.

²⁵ Chin Rakhab man mu̱nggu̱l nu̱ tukaki nduki nu̱ muurar nggu̱ti ghai nang gha, tu̱ gaɓ tu̱ shaata wor tu̱k tu̱ mbu nu̱ wor ve njiv nggur zum tu̱ ɗu̱ vaandang. Gwa khar ma nu̱ dambu nu̱ ku̱nshe tlu̱nar ɓaran ɓa goma?

²⁶ Ku̱me nang ba wa nu̱ke man var nduk nu̱ke nyifi su̱ ɓa mu̱tan, wanang tu̱k maito nu̱ke tlu̱na su̱ ɓa mu̱tan.