Yaqub 1 - Mewar Alqawarang

Zoɓar Qaandi

¹ Lagarkati nang ji she Yaqub maavi ɓu̱ Magham ndu̱ Zhinerem gwaanji Yesu Masiya, ma yir she me ghaiku gwaanggu̱m rapndi ɓu̱ Israila nu̱ lakhtaki nu̱ aa fu̱n mbu̱ larji. Nga qaandi ye nu maɗyi.

Maito ndu̱ Kaɗari

² Nyeezaku, da ma aa nyi bonye nu̱ gwaki nu ma ɗye kasha,

³ ku̱me tun wa zu̱n nu̱ ɗyine bonye nang a shim nakya du̱mbu̱r maito ɓaanu, ma ku̱ sa kaɗanyi ɓaanu ku̱ shaata.

⁴ Yang njig ma ku̱ kanaɗyi ɓaanu shi tlu̱nar ɓaran, tu̱ sa nu tun kha ɗyinonu ku̱san tun kha nyeedlan tu̱k nun mbu̱ɗ aa nu̱m ɓa.

⁵ Mbu̱ ke nduk a nje chele ɓaanu nu̱ke kaɗari ve nda ɓa, ku̱ khuɗ Magham nu̱ka vu̱rki ye aaki kharan nggaran yang nu̱ka zham me nduk ɓa, ka vu̱r yenda.

⁶ Yang ku̱ khuɗ ndu̱ maito, ku̱ kha memu̱naran rap rap ɓa, ku̱me njif nu̱ke memu̱naran rap rap wa shipa pu̱rsi ɗyim nu̱ke khu̱kheeti a piiran a yakhta nda nu̱ aa fu̱n.

⁷ Ku̱ njif nu̱ khaki wanang taman za chin ka gwa aa nu̱m she Magham ɓa,

⁸ ku̱me memu̱naran rap rap, mbu̱ ɗyi nu̱ke a shiran kap nu̱ ching nu̱ ye maa da ɓa.

⁹ Ku̱ mu̱dlerem nu̱ke nungndan chele ɓaarem shi wakhti nu̱ ɗyine Magham wa vu̱r zhaaji yenda.

¹⁰ Wanang tu̱k ku̱ njif nu̱ke gu̱naran shi wakhti ku̱me Magham wa kata nda nu̱ gha. Jiwa nu̱ gu̱na ka ghwari wa viiri wuzu̱ndi.

¹¹ Jiwa mbu̱ fu̱ɗar a vi ɓwa tu̱ maarang shi gu̱rgu̱r maɗyi, wuzu̱ndiku wa ka su ɓara, tu̱ viiri ɓaanda nggu̱ɗi, tu̱ mbu̱ɗ mbaari ɓaanda. Wanang tu̱k nu̱ gu̱na ka mu̱t mbu̱ gomar nu̱ke a shiran.

Bonye ndu̱ Buuri

¹² Njif nu̱ gu̱nki memu̱naran mbu̱ bonye ɓaran ɗya nu̱ barka, ku̱me ka gwa ɗye ɓi nu̱ nyifi nu̱ke ɓu̱ shi woɗa ɓa nu̱ Magham shiki alqawaran ye kap nduki nu̱ke a ndola nda.

¹³ Mbu̱ nduk a shim shir ɗyi malkandi ku̱ zu̱ za, Magham kya taɓti nda su̱ ɓa. Ku̱me Magham nu̱ka melakh shi ɗyi malkandi ɓa, yang Magham nu̱ka buu nduk ndu̱ ɗyi malkandi zum ɓa.

¹⁴ Nduk ka shim shir ɗyi malkandi ye sarchi nu̱ melakh ɓaran maatlindi lambaki nda, tu̱ zu̱m ɗyinan.

¹⁵ Mbu̱ melakh malkandi ɓaran wa shi ghu̱rɓan tu̱ ka kha solari. Mbu̱ yang solarang wa gori tu̱ kha mu̱ti.

¹⁶ Nyeezaku, ndolarku ɓanga, ku̱ njig nu tu̱ njif nggur lamba nu ɓa.

¹⁷ Aa nyi vu̱rti mbarkandi, ndu̱ vu̱rti nyeelkandi a vi mbu̱ viɗi. A zhur she Magham Zhinkir nu̱ du̱ngki fu̱ɗa, ndu̱ chera ndu̱ anjinjeku kap. Yang chin nu̱ka shi nggot ɓa.

¹⁸ Magham shimki ku̱ kha rem ku̱nshe ɓalar ɓaran zhirekandi ma ku̱ duk mi ɗyiku nyin du̱ngki ndu̱ zhaaji.

Tu̱kti ndu̱ Tlu̱nar nu̱ Ɓalar ɓu̱ Magham

¹⁹ Nyeezaku, ndolarku ɓanga, zu̱n ma nu̱ ɗyine wa shipa ku̱ aaki kha ma nu̱ tu̱kki ɓala ɗau, yang ku̱ kha ma nu̱ lau me ɓa, yang nu̱ wakho shokhna ɓa.

²⁰ Ku̱me shokhnar ɓu̱ nduku nu̱ka sa nda tu̱ tlu̱na shimndi ɓu̱ Magham ɓa.

²¹ Ku̱me nang, wos ma kap ɗye shir malkandi nu̱ solari ndu̱ pooni mu̱narku gha, tun dlu̱ ɓalar nu̱ kaɓki nu̱ mbu̱ memu̱na nu nu̱ka vu̱rki ɗanar ye nu ndu̱ ɓu̱tokh memu̱na.

²² Ku̱ lamba nu ɗyinonu za tun a tu̱k ɓalar ɓu̱ Magham ɗyenda ɓa, shi ma ɗyi nu ɓalar ɓaranang zu̱ki ye nu.

²³ Ku̱me njif nu̱ka tu̱kki ɓalarang ɗyenda yang nu̱ka tlu̱na ɗyen ɓa wa shipa njif nu̱ nggu̱tki mbu̱ yitan mbu̱ ɗye nari,

²⁴ yang nu̱ njigki ye maaranang tu̱ mona shipar ɓu̱ mbu̱ yitanang.

²⁵ Yang njif nu̱ vu̱rki ɗyinan tu̱ laɓ mbu̱ shogar ɓu̱ Labar mbarkandi, nu̱ke ɗya njiv nyelkandi nu̱ka ɓa ki ndu̱ dli ɗyin. Yang nu̱ka tu̱k tu̱ mona ɗyen ɓa, tu̱ka var varan nu̱ si a tlu̱na ɗyi nu̱ zu̱ki, ka sa barke yenda mbu̱ ɗyi nu̱ke a shiran kap.

Ghaari ghai Zhirekandi

²⁶ Mbu̱ nduka tamandan za chin nu̱ ghaari ghai maɗyi, yang nu̱ka ku̱s men ɓa, a lambakya ɗyinan, ghaari ghai ɓaran wa kha bam.

²⁷ Ghaari ghai nu̱ke wakaran nu̱ zhire she Magham Zhinki, chin ke, ku̱ nduk nggu̱t ku̱du̱wku ndu̱ maryirku mbu̱ bonye nu̱ke a zaran ku, kom ku̱ nduk waka varan ɓar mbe pooni khar viti malkandi nu̱ larji nang.