Yakhuda 1 - Mewar Alqawarang

Zoɓar Qaandi

¹ Yakhuda maavi ɓu̱ Yesu Masiya, khachin Yaqub, bu̱la lagarkati nang ma yir she nduki, tun nu̱ Magham qaki, nu̱ke Magham Zhinki a ndolaran, nu̱ke Yesu Masiya a khutloran.

² Bu ku̱ nar zhiyaye, ndu̱ qaandi memu̱na, ndu̱ ndola ku̱ boosa nu.

Kumar ye Maalu̱m Wollo ku

³ Raptaku nu̱ke nga ndolaran, aa nu̱ke nga kasha bu̱laran ye nu ɗyine ɗanar ɓaarem nang. Yang qu̱rsan tang na wa ku̱s ku̱ bu̱la nga ye nu tang khutonu ku̱ shi nu wute maɗyi, ku̱me ɓalar maito ɓaarem nu̱ Magham saki nu̱ mbu̱ khar nu̱ mburi nda ku, sar kaada ye kharki.

⁴ Nga zu̱ nang ku̱me nduki nu̱ viki nu̱ chele ɓaanu mbu̱ tuka, Ɗye shir mbarkandi ɓu̱ Magham a nje mbu̱ khar viti ɓaanda ɓa. Wa gaɓ ndu̱ mu̱nkir ɓu̱ Magham ku ma njiv tlu̱nar su̱bu̱rti. Wa keela Yesu Masiya nu̱ke chin ɗyenda ke Kuji ɓaarem ndu̱ Zhinerem gwaanji. Ai, ɓalar ɓu̱ Magham a ɓa zhu tang nu̱ zu̱ki za wa kuma wora.

⁵ Aa nu̱ke tun wa zu̱ni, nga shim ku̱ kor nu njiv nu̱ Zhinkir gwaanji ɗanaki nduki ɓaran sarchi na kheɗki wor ɓar mbu̱ ghai Masar, yang kap ndu̱ nang qu̱rsan tu̱ su̱ya nduki nu̱ke nu̱ maita ɓa nu̱gha.

⁶ Yang nu̱ ru̱ktiku ɓu̱ Magham nu̱ke nu̱ ching nu̱ ye maa nu̱ Magham saki wor nu̱ su̱ ku ɓa, tu̱ njig ye maa khar ɓaanda, Zhinkir gwaanji wa khi wor nu̱ mbu̱ zhum maari. Tu̱ gu̱n wor gha ndu̱ yakhli koɗokhsi ɓa ma yir ye sarchi kumar ye fu̱ɗar gwaanji nu̱ke a ɓar nang.

⁷ Shi wanang tu̱k ye Sodom ndu̱ Gomora, kom ndu̱ ghaiku nu̱ke a nje kararan ndu̱ wora. Wor tu̱k yang wa vu̱r var wor ye su̱bu̱rti ndu̱ shimndi ɗyi ɓu̱ manva. Wa kha ku ma ɗye buuri ye nduki nu̱ zaki bonye kumar ɓai nu̱ke lauɗa su̱ ɓa.

⁸ Ba wanang tu̱k nu̱ zhineku nang a sa man var wor tu̱ kha zopan. Wa ka zhang mbu nu̱ kwaaɗarku, wa ka shi maatli ɓalar ve du̱ngndiku nu̱ zhaaji ɓu̱ Magham nu̱ke a mbu̱ viɗi.

⁹ Yang aa Makel, gorkir ɓu̱ nu̱ ru̱ktiku ɓu̱ Magham nu̱ shi pooni ɗyi nang ɓa. Ye sarchi nu̱ keele gangki chele ɓaran ndu̱ Sheɗan, a dakhlar ku ɗyine man var Musa nu̱ mu̱tki, nu̱ Makel ɓu̱tl memu̱naran tu̱ pu̱zi nda tu̱ shi maatli ɓalar yenda ɓa. Zu̱ ba za, “Ku̱ Zhinkir gwaanji wuro ro!”

¹⁰ Yang nduki nang wa ka shi maatli ɓalar ɗyine kap ɗyi nu̱ke nu̱ da mban ku ɓa. A shikya ba ɗyi nu̱ tu̱kki mbu̱ man vaanda. Ba wa dlu gaariku nu̱ ɗye nggarku nu̱ke nu̱ka shi konyi ɓa. Nang ke ba ɗyiku nu̱ su̱yaki wora.

¹¹ Ɗya ɗye zhiyaye ku! Wa mbu ɗye shir ɓu̱ Kayinu ku. Ku̱me shimndi gwar tunu wa nggu̱ɗ ku nu̱ mbu̱ ɗyi galkandi nu̱ Balaam shiki, wa su̱ya ku tu̱k wa nu̱ shiki sarchi pooni tonggu̱rong ɓu̱ Kora.

¹² Ndukiku nang ɗya nu̱ su̱bu̱rtiku, khar nu̱ke a shiran ku mbu̱ tabar bar zu̱mndi nu̱ ndolar ɓaanu, a zu̱mndi ku kawa su̱ ɓa. Wa kha ku ba wa nu̱ khutlo ku nu̱ka zu̱mki ndu̱ ɗyin wor ɗyenda tu̱ njig ndu̱ɓangku ɓaanda, wa kha ku wa sar maari nu̱ke nu̱ka shi roma ɓa, khu̱kheeti wa ka komba ɓara. A khar wa qu̱farku nu̱ke nu̱ka kha woi ye zhur maari ɓa, ɗya qu̱farku nu̱ ɓu̱ɗki nu̱ gha, wa mu̱t ku guma da.

¹³ A khar wa zo ɗyim nu̱ka gu̱rki nu̱ viɗi a me yirti mbu̱ gaawu gwaanji, a pakh ɗyin wor ku mbu̱ ɗye kawar ɓaanda wa khubulbutli ɗyim. A khar wa anjinjeku nu̱ke a baara maaku bam bam, zhum maɗyikandi nu̱ke koɗokhsi ɓa a nje du̱ngdan ku̱me wora.

¹⁴ Enok tu̱k, nu̱ke chin ke nu̱ mut ji ɗyin Adamu, Magham wa shi ɓalar nu̱ ku̱nshe nda ɗyine ndukiku nang. Tu̱ zu̱ za, “Nggu̱t ma ɓa, Zhinkir gwaanji a ɓar ndu̱ nduki shakhshakhndi ɓaran aru ku̱na shiga,

¹⁵ ka kuma aa nyi nduk da ka dla kumar ye nu̱ song mburi Magham. Kom ndu̱ kap tlu̱nar song mburi Magham nu̱ tlu̱naki ku ɗyin njiv song mburi Magham. Yang tu̱k ka kuma kap maatli ɓalarku nu̱ke nu̱ solar song mburi Magham ku zu̱ki nu̱ ɗyine nda.”

¹⁶ Nduki nang ɗya nu̱ ruru ku, a na zop ɓu̱ nduki aakochi. Shimndi ɗyi malkandi ke kwaari ɓaanda. Nyeedlan ku ndu̱ ɓalar bamndi nu̱ makhtar ɗyin vaanda. A lamba nduki nu̱ maghar ɓalari ma ku̱ gwa nda ɗyiku ye var wora.

Duti Dlu̱mdi ndu̱ Shogarku

¹⁷ Yang raptaku nu̱ke nga ndolaran, kor ma ndu̱ ɗyi nu̱ pudeku ɓu̱ Zhinerem gwaanji Yesu Masiya zu̱ki za ka ɓa shi.

¹⁸ Wa zu̱ ye nu ku za, “Ye lauɗar su̱ qaandi virkirku ndukiku nggur ka ɗa ɓa nu̱ ɓalar ndu̱mndi ku, ka mbu shimndi ɓu̱ ɗyin vaanda.

¹⁹ Wor ke nu̱ shakh ɗyinonu, ka mbukya shimndi ɓu̱ man va. Jiimbi shakhshakhndi a nje su̱yen ndu̱ wor ɓa.”

²⁰ Yang tun raptaku nu̱ke nga ndolaran, tun ki gwaari mbe maito ɓaanu shakhshakhndi nang. Tun ki barar mbu̱ zalale ɓu̱ Jiimbi shakhshakhndi.

²¹ Ku̱ kha man mbe ndolar ɓu̱ Magham, tun a bu ɓar ɓu̱ Zhinerem gwaanji Yesu Masiya nu̱ke mbu̱ ɗaanar ɓaran ka ɗu̱ ndu̱ tun mbu̱ nyifi nu̱ke nu̱ka shi woɗa ɓa.

²² Tun ki na zhiyaye ɓu̱ nduki nu̱ke memu̱na wor rap rap.

²³ Tun ɗana ɓeenan wa tun lawakya wor ɓar mbu̱ ɓai. Ɓu̱ ɓeenan yang, tun tu̱k zhiyaye ɓaanda, yang shi ma ndu̱ sawa, aa ɗye sar ɓu̱ pooni nduki nang tun tu̱k zhaane ni ku̱me wa yoɓ nu̱ gha nu̱ ru̱knar ɓu̱ manva nda.

Barar Makhtari

²⁴ Makhtar wa kha chin nu̱ zalale kanggar nu ku̱ nggu̱ɗ nu shwat ɓa, tu̱ wuto nu waare beeko gume zhaaji ɓaran ndu̱ kashar maɗyikandi.

²⁵ Ma yir she Magham ɗyenda nu̱ ɗana rem, ku̱ gorkiri ndu̱ zhaaji ndu̱ kwaaɗar ndu̱ zalale kha nda me nggar su̱ sarchi, ndu̱ leendang, ndu̱ aakochi koɗokhsi ɓa! Nu̱ ku̱nshe Yesu Masiya Zhinerem gwaanji, Amin.