Titus 2 - Mewar Alqawarang

Shogar ɗyi Zhirekandi ɓara

¹ Yang wa ku̱s ku̱ shoga na ɗyi nu̱ke toropndi ɓara, nang ke ɗyi nu̱ khaki torop ndu̱ shogar zhirekandi.

² To shoga ye ku̱mandiku ku̱ kha ma nu̱ lusar memu̱na, ku̱ kha ma ku̱mandiku nu̱ke nduk ka naki zhaaji ɓaanda, nu̱ ku̱si ɗyin ku, ku̱ ching gha mbar mbe maito, mbe ndola ndu̱ gu̱ndi memu̱na.

³ Wanang tu̱k tun shoga ye geema nusuki ku̱ shi khar viti ku nu̱ shipaki ɓu̱ nusuki nu̱ mbu Yesu. Ku̱ kha ma nu̱ kotama ku ɓa, ku̱ zar ɗyema kha ma ɗye shir ɓaanda ɓa. Ku̱ shogakya ɗyi nu̱ke mbarkandi ɓara,

⁴ ma ku̱ shoga ye nusuki pichichindi ku̱ ndola zhime nda ndu̱ qusonggi ɓaanda.

⁵ Tu̱ ku̱s ɗyin vaanda, ndu̱ khar viti shakhshakhndi, ku̱ kha ma nu̱ tlu̱narku mbu̱ rafti ɓaanda, nu̱ shir mbarki, nu̱ mburi zu̱r ɓu̱ zhime nda, ma ku̱ aaki pu̱z ɓalar ɓu̱ Magham ɓa.

⁶ Wanang tu̱k to pa du̱mbu̱r ye nyakhtlirku ku̱ kha ma nu̱ ku̱si ɗyin ku.

⁷ Mbe aa nyi tunu to kha ma nduk nu̱ tlu̱nar ɗyi mbarkandi, tu̱ nduki ka shoga sho ro. To shi shogar ɓaaro ndu̱ ku̱si ɗyin to vu̱r va nu̱ si,

⁸ ndu̱ ɓalar nu̱ke ye mbu si ku̱ nduk gwa ɗye pu̱z mban ɓa. Shir wanang ka sa to vu̱r kawar ye nu̱ kare ku ndu̱ to ku ku̱me ɓu̱ gwa ɗyi malkandi nu̱ke ka pu̱zki rem su̱ ɓa.

⁹ To shoga ye maaviku ku̱ mbu zu̱r ɓu̱ zhin wor nu̱ rafa mbe aa nyi tunu, ma ku̱ mu̱n mbu̱ wora. Ku̱ nggam ɓala ye wor ɓa,

¹⁰ yang ku̱ muura tun ɓar kha wor ɓa. Me ɓu̱ nang ku̱ kha ma nduki mbarkandi nu̱ shir zhire, ma ku̱ shogar ɓu̱ Magham Nu̱ Ɗanar rem gwa zhaaji mbe aa nyi tunu.

¹¹ Jiwa mu̱nkir ɓu̱ Magham nu̱ ɗanari a vi ye dalangi ma ɓar she nduki kap.

¹² Mu̱nkir nang a shogaran yerem za, ku̱ zhang mi ɗye shir ku nu̱ke ɗya ɓu̱ Magham ɓa, ndu̱ shimndi ɗyiku nu̱ larji gha, chem ku̱s ɗyinerem, chem kha ma nu̱ dambi, ndu̱ pooni ɗye shir ɓu̱ Magham mbu̱ larji nang.

¹³ Chem shi khar ɓaarem wanang sarchi nu̱ke chem a khar buri ndu̱ sar memu̱nar ye barke nu̱ke a ɓari, nang ke ɓar ɓu̱ zhaaji ɓu̱ Maghamndi ɓaarem gwaanji nu̱ Ɗanar ɓaarem Yesu Masiya.

¹⁴ Yesu vu̱rki ɗyinan ma ku̱ dli ɗyinerem chem kha ma nduki zumndi nu̱ke a kashar shir ɗyi mbarkandi ku.

¹⁵ To shoga ɗyiku nang ɓara. To pa du̱mbu̱r ye nu̱ tu̱ktor ku, to wu wor ndu̱ zalale nu̱ke a khaaro kap. Ku̱ njig na tu̱ aaki ndu̱mndor ɓa.