Titus 1 - Mewar Alqawarang

Zoɓar Qaandi

¹ Lagarkati nang a vi she Bulus maavi ɓu̱ Magham ndu̱ pude ɓu̱ Yesu Masiya. Daati nga tu̱ ru̱kti nga ma ku̱ pa nga du̱mbu̱r ye maito ɓu̱ nduki nu̱ Magham datki ma shaata nga wor tu̱ zu̱n zhire nu̱ khaki torop ndu̱ nu̱ mbu Magham ku.

² Maito nu̱ zu̱ndi nu̱ke dlaran ve sar memu̱na ye nyifi nu̱ke nu̱ka shi woɗa ɓa. Magham nu̱ke nu̱ka shi wollo ɓa shiki alqawar nang kaabu nggarsi sarchi.

³ Tu̱ yang wut nu̱ dam mbu̱ sarchi nu̱ khaki torop mbe ɓalar ɓaran nu̱ke nga waazu ni, nu̱ vu̱rki du̱ngdan ya nu̱ ku̱nshe zu̱r ɓu̱ Magham Nu̱ Ɗanar rem.

⁴ Ma yir she Titus, woi ɓanga zhirekandi mbe maito nu̱ke a kha rem kap. Mu̱nkir ndu̱ qaandi memu̱nar na viki she Magham Zhinki, ndu̱ Masiya Yesu Nu̱ Ɗanar rem ku̱ kha gha su̱yen ndu̱ to.

Tlu̱nar ɓu̱ Titus mbu̱ ghai Ku̱ret

⁵ Nga njig to nu̱ Ku̱rit ma ku̱ kwata na tlu̱nar nu̱ khaki, yang to dat dlegumeku mbu̱ aa nyi ghai, ba wa nang zu̱ki yoro.

⁶ Wa ku̱s ku̱ ndukkudaandi kha waare zop gume nduki, ku̱ kha ma nu̱ nokhzi kaada, ku̱ kha ma njif nu̱ke qusonggi ɓaran wa maita Yesu ku. Yang ku̱ kha ma qusonggi nu̱ke nduki nu̱ zu̱n wor ndu̱ ɗye shir malkandi ndu̱ zhangndi tu̱kti maa ɓa.

⁷ Ma nu̱ke dle gume ɓu̱ tabar nu̱ mbu Yesu ɗya nu̱ tlu̱nar ɓu̱ Magham, wa ku̱s ku̱ kha waare zop gume aaki. Ku̱ kha ma njif kaku̱ɗakhndi ɓa yang nu̱ wakho shokhna ɓa, ku̱ kha ma nu̱ zar ɗyema ɓa, yang nu̱ gangndi dakhla ɓa, ku̱ kha ma nu̱ bu̱rtar gu̱na ve njiv batal ɓa.

⁸ Me ɓu̱ nang ku̱ kha ma nu̱ dlu̱r runggiku, nu̱ shimndi shir ɗyi mbarkandi, njif nu̱ke ɗyinan ku̱san maɗyi, njif nu̱ke chingndan ɗyine zhire, njif nu̱ke shakhshakh, njif nu̱ke wuran.

⁹ Wa ku̱s ku̱ dle guma kha ma njif nu̱ khubki ɓalar ɓu̱ Magham zhirekandi ɓang ɓang ba wa nu̱ shogaki ɓara. Ma ku̱ kha ma nu̱ par du̱mbu̱r ye ɓeeni nduki nu̱ ku̱nshe waazu ndu̱ shogar mbarkandi, tu̱ wut ye maa nu̱ke nduki nu̱ke a kare ndu̱ shogar ɓaranang galki gha ku.

¹⁰ Nduki a nje khang nu̱ke nu̱ka mbu zu̱r ɓu̱ dlegumeku ɓa, nu̱ ɓalarku nu̱ke ɗyin su̱ ɓa, nu̱ lambar ku, nu̱ shi wa ɓeeni Yakhudeku nu̱ gangki vaanda nu̱ ɗyin ɓalar dlarsi ɓa.

¹¹ Wa ku̱s ku̱ wu wor ku̱ kha yit ku, ma nu̱ke a lakhta raftiku khang nu̱ gha mbe shogar ɗyi nu̱ke nu̱ shipa ɓa ɓara ma ku̱ gwa nda gu̱na ve njiv batal.

¹² Aa, da chele nduki nu̱ Ku̱ret nu̱ke a chele nduki nu̱ daki ku za ɗya annabi ɓaandang zu̱ki za, “Ku̱reteku ɗya nu̱ kotame ku aakochi, nduki malkandi, nu̱ khaati var nu̱ akum ku.”

¹³ Yang saidu nu̱ zu̱kyang ɗya zhire. Ku̱me nang to wu wor maɗyi, ma ku̱ shi maito zhirekandi ku,

¹⁴ tu̱ njig tu̱k shinjiku ɓu̱ Yakhudeku, ndu̱ mbu bibitiku ɓu̱ nduki nu̱ zhangki zhire gha.

¹⁵ Aa nu̱m shakhshakh she nduki nu̱ke memu̱na wor shakhshakh. Yang tun a nje shakhshakh she nduki nu̱ zop nu̱ke nu̱ maita ku ɓa, ku̱me memu̱na wor ndu̱ kwaari ɓaanda zopan.

¹⁶ A zu̱ran ku ndu̱ me wor za wor wa zu̱n Magham, yang tlu̱nar ɓaanda wa ngga yen ndu̱ zu̱ndi Magham. Wa kha ma ɗye zhaane ku, nu̱ zhangndi tu̱kti maa, nu̱ shipa shir ɗyi mbarkandi ku ɓa.