Romeku 9 - Mewar Alqawarang

Magham wa Dat Israila

¹ Nga zu̱kya zhire mbe Masiya, nga shikya wollo ɓa. Mbu̱ kwaari nang shiki mbu̱ memu̱nara, nga zu̱n shwat ɗya kwatama ɓa ku̱me saidu nu̱ Jiimbi shakhshakhndi shiki ɗyine nang.

² Memu̱nara chit maɗyi, nga damtaran tu̱k aakochi.

³ Tu̱ga miikya barke ɓanga, tu̱ shakhti nga ndu̱ Masiya ma ku̱ nyeeza gwa ɗanari, wor nduki nu̱ke ɗya me ghai ɓang ku,

⁴ nduki nang wor ke Israileku. Ɗya nduki nu̱ Magham gaɓki ndu̱ wor ma qusonggi ɓaran, tu̱ wut zhaaji ɓaran ye wora. Tu̱ shi alqawar ndu̱ wora, tu̱ vu̱r Bibitang ye wora. Tu̱ wut njiv ghaari ghai mbu̱ kib ɓaran ye wora, tu̱ shi ɓeeni alqawarku ye wora.

⁵ A khar nduki nu̱ke ɗya qusonggi ɓu̱ zhikankirku nu̱ nduki zu̱nki wor maɗyi. Masiya ɗya pooni ɓaanda ye khar ɓaran nduku. Chin nu̱ke ɗya Magham ɗyine aa nu̱m, bu ku̱ dlu̱ kunari koɗokhsi ɓa. Amin.

⁶ Yang nang nu̱ wut nu̱ ɗyine Magham wa ku̱na nyel alqawar ɓaran ye Israila ɓa. Ku̱me kap ndukiku Israila ke pooni ɓu̱ Israila ɓa.

⁷ Pooni ɓu̱ Yibram kap ke qusonggi ɓu̱ Yibram ɓa. Me ɓu̱ nang tu̱ Magham ze Yibram za, “Pooni ɓa ka ɗa vi nu̱ ku̱nshe Yishaku.”

⁸ Nang a wutan za qusonggi nu̱ Yibram khaki ke qusonggi ɓu̱ Maghamang ɓa, qusonggi nu̱ gwaki nu̱ ku̱nshe nyedli alqawarang, ke qusonggi ɓu̱ Yibram zhirekandi.

⁹ Jiwa wonji ɗyi nu̱ Magham zu̱ki ye sarchi nu̱ shiki alqawar ye Yibram, “Mbu̱ sarchi wa nyedli ngga ɗa gaɓi, yang Saratu ka kha woi.

¹⁰ “Nangngang ɗyenda ɓa, chem ka nan ve qusonggi ɓu̱ Rabeka tu̱k, zhin wor da, chin ke zhikanerem Yishaku.

¹¹ Yang me ku̱ kha ye mugɗar ku nang, fan ku̱ zu̱n ɗyi mbarkandi ku ndu̱ ɗyi malkandi ku, tu̱ Magham ze Rabeka za chin wa sa woi gwaanjang ku̱ kha ma nu̱ ru̱kti ɓu̱ woi koɗommandang.

¹² Shi wanang ku̱me ku̱ shimndi ɓu̱ Magham mbe daati ɓaran nu̱ daasaki ku̱ chingi ɗya nu̱ ku̱nshe tlu̱na ɓa kope njif nu̱ qaki ndang.”

¹³ Ba wa nu̱ke a nje bu̱laran za, “Nga ndola Nyagham, tang zhang Yisuwa gha.”

¹⁴ Yang chem ka zu̱ nyem za nu̱m ɗo? Magham wa shi song zhire mu? Fu̱n ɗo! Ɗyen wanang sar da ɓa!

¹⁵ Jiwa Magham wa ze Musa za, “Njif nu̱ke nga ma ɗaana nda, ngga ɗaana nda. Njif nu̱ke nga ma tu̱k zhiyaye ɓaran, ngga tu̱k zhiyaye ɓarani.”

¹⁶ Nang wa wut nu̱ ɗyine ɗya shimndi ɓu̱ nduk ndu̱ tlu̱nar ɓaran ɓa, ɗya ɗaanar ɓu̱ Magham.

¹⁷ Jiwa Bu̱lar ɓalar ɓu̱ Magham zu̱ ye Firauna za, “Nga sa to zu̱m kujirang ma wut nga zalale ɓang nu̱ ɗyinoro, ma ku̱ wopa dlu̱ma mbu̱ larji kap.”

¹⁸ Ku̱me nang Magham wa ka ɗaana njif nu̱ shimki ɗaanaran, tu̱ sa kaaku̱ɗakh memu̱nar ye njif nu̱ shimki ku̱ memu̱naran kha kaaku̱ɗakh.

Shokhnar ɓu̱ Magham ndu̱ Ɗaanar ɓaran

¹⁹ Yang bai njif nggur ka zhamndi nga za, “Mbu̱ wanang nu̱m saki tu̱ Magham ka na zop ɓaaremang na? Ki ka ɗu̱maki zhang ɗyi nu̱ Magham shimki ku̱ na nda sa na?”

²⁰ Yang ta mbu̱ ki ɗo, nduku, nu̱ke to ka shiki keele ndu̱ Maghamang? “Ɗyi nu̱ nduk du̱nki ka ɗu̱ma zham njif nu̱ du̱nkyang za, ‘Nu̱m saki to du̱ndi nga wanangang mu?’ ”

²¹ Woɗye zalala kha nu̱ du̱ndi kayang ma boote ndu̱ ɓurti daɓti du̱ndi da tu̱ du̱n kayangku nggur ma tlu̱nar nu̱ke zhaaji si, tu̱ shi ɓeenan ma tlu̱nar nu̱ke zhaaji si ɓa goma?

²² Nu̱m ka shikya mbu̱ ke Magham, mbe zalale ɓaran, datkya ku̱ wut nji shokhnar ɓaran, daasa ma su̱ya nji ɗyi nyin shimki suyaran nu̱gha? Yang mbu̱ ke wa daasa ma ku̱ shi nji kanaɗyi ndu̱ ɗyiku nu̱ saki nda ma shokhnarang ɗa?

²³ Shi wanang ma wut nji yele ɓu̱ zhaaji ɓaran ye ɗyiku nyin shimki ɗaana nji wora. Daasa ɗyiku nyin ɗaanaki nang nu̱ ɗawi ma ku̱ gwa zhaaji ɓaran.

²⁴ Chem ke nduki nang, yang chem nu̱ Magham qaki, mbu̱ Yakhudeku ɗyenda ɓa, nduki nu̱ke ɗya Yakhudeku ɓa a mban tu̱k.

²⁵ Ba wa nu̱ bu̱laki nu̱ mbu̱ lagarkati ɓu̱ Khosaya za, “Wor nu̱ke ɗya nduki ɓang ɓa ngga qa wor ‘Nduki ɓanga.’ Nduki nu̱ke nang ndola wor ɓa ngga qa wor ‘Nduki nu̱ke nga ndolaran.’ ”

²⁶ Yang tu̱ zu̱ tu̱k za, “Ba ye maa nu̱ qaki wor za, ‘Tun nduki ɓang ɓa’ ndang, ka qa wor tu̱k za ‘qusonggi ɓu̱ Magham nu̱ nyifiri.’ ”

²⁷ Ɗyine ɓalar ɓu̱ Israila yang, annabi Yishaya wa da su̱quran nu̱ viɗi tu̱ zu̱ za, “Aa nu̱ke khang ɓu̱ qusa Israila wa shipa khang ɓu̱ wuɗyiri nu̱ me gaawu gwaanji, ɓeenan nu̱ khaki ka gwaki ɗanari.

²⁸ Jiwa Zhinkir gwaanji ka kuma larji guma da, su̱bu̱rti sarchi su̱ ɓa.”

²⁹ Ba wa nu̱ Yishaya zu̱ki ɓalar ɓu̱ Magham tu̱k za, “Mbu̱ tu̱ga Zhinkir gwaanji Nu̱ Zalale Aa nu̱m nu̱ njig zhikankirku yerem ɓa, tu̱ga chem wa kha wa Sodom, tu̱ga wa gaɓ ndu̱ chem wa Gomora.”

Song Maito ɓu̱ Israila

³⁰ Yang chem ka zu̱ nyem za nu̱m ɗo? Nduki nu̱ke ɗya Yakhudeku ɓa nu̱ laɓ khar ma nu̱ dambu gume Magham ɓa, yang tu̱ gwa ku. Khar ma nu̱ dambu gume Magham nu̱ gwaki ku nang, ɗya pooni khar dambi nu̱ke nduk ka gwaki nu̱ ku̱nshe maito.

³¹ Yang Israileku nu̱ laɓki khar ma nu̱ dambu gume Magham nu̱ ku̱nshe mbu Bibitang, nu̱ gwa ku ɓa.

³² Yang nu̱m saki nu̱ gwa ku ɓa ndang na? Ku̱me nu̱ laɓ ku nu̱ ku̱nshe njiv maito ɓa, laɓ ku nu̱ ku̱nshe tlu̱nar ɓaanda. Tu̱ yang ji saari wor ndu̱ “ndogdi ji saari.”

³³ Ba wa nu̱ke a nje bu̱laran za, “Wonji nga sa ndogdi ɓang nu̱ Sikhiyona, ndogdi jiiri saari. Ndogdi nu̱ke ka saki nduki khang tu̱ njimi. Yang aaki maitaki nda ɓu̱ tu̱k kawa ɓa.”