Romeku 8 - Mewar Alqawarang

Khar Viti mbu̱ Jiimba

¹ Ku̱me nang, ɓu̱ kuma mu̱ti ye nduki nu̱ke a mbe Masiya Yesu ɓa.

² Nu̱ke bibiti ɓu̱ Jiimbi nu̱ka vu̱rki nyifiri wa lawa nga mbe bibiti solar ndu̱ mu̱ti nu̱ ku̱nshe Masiya Yesu.

³ Jiwa Magham wa shi ɗyi nu̱ke Bibitang nu̱ ɗu̱ma shiran ɓa ku̱me tu̱ɓti ɓu̱ nduku mbe ɗye shir ɓaran. Magham a ru̱kkya Yi ɓaran mbu̱ shipar ɓu̱ man vaarem nu̱ka shiki solar nang, ma ku̱ kha ma sadke ku̱me solar ɓaarem, tu̱ gu̱ɗa zalale ɓu̱ sola nu̱ gha mbu̱ man va.

⁴ Magham shi wanang yerem ma nyel tlu̱nar dambi nu̱ Bibitang zu̱ki za ku̱ shi mi. Shi nang yerem, chem nu̱ke chem a khar viti ɓaarem mbe Jiimba, nyem ka shi nu̱ ku̱nshe ɗye shir ɓu̱ nduk ɓa.

⁵ Nduki nu̱ke a khar ɓaanda mbe ɗye shir ɓu̱ nduku wa ka damta ku ndu̱ ɗyiku ɓu̱ manva, yang nu̱ khar viti mbe Jiimba ka damtakya ndu̱ ɗyi nu̱ke Jiimba a shimndan.

⁶ Damtar ndu̱ ɗyiku ɓu̱ manva wa ka ɓa ndu̱ mu̱ti, yang damtar ndu̱ ɗyin mbu̱ Jiimba ka vu̱rkya nyifiri ndu̱ qaandi memu̱na.

⁷ Aaki damtaki ndu̱ ɗyiku ɓu̱ manva ɗya nu̱ zhangndi ɓu̱ Magham, ku̱me ɓu̱ mbu bibiti ɓu̱ Magham ɓa, yang ɓu̱ ɗu̱ma shiran zum ɓa.

⁸ Nduki nu̱ke ɗye shir ɓu̱ manva ke ɓaanda, khar viti ɓaanda ɓu̱ mu̱n mbu̱ Magham sar da ɓa.

⁹ Tun yang, nun ka shi khar viti ɓaanu mbe ɗye shir ɓu̱ nduk ɓa, tun a khar viti ɓaanu mbe Jiimba, mbu̱ Jiimbi ɓu̱ Magham a nje kharan mbu̱ memu̱na nu. Yang kap njif nu̱ke Jiimbi ɓu̱ Masiya a nje mbe nda ɓa, ɗya ɓu̱ Masiya ɓa.

¹⁰ Mbu̱ Masiya a nje kharan mbe nu, aa nu̱ke vaanu a mu̱ti ku̱me sola, Jiimbi shakhshakhndi a vu̱r nyifiri ye nu ku̱me ku̱ Magham dlu̱ronu ma nu̱ dambi ku.

¹¹ Mbu̱ Jiimbi shakhshakhndi nu̱ jiiki ndu̱ Yesu mbe mu̱ti a nje kharan mbe nu, ba chin nu̱ jiiki ndu̱ Masiya mbe mu̱tang ka vu̱r nyifiri ye man vaanu nu̱ka mu̱tki. Nu̱ ku̱nshe Jiimbi nu̱ke a nje kharan mbe nwang.

¹² Wanang tu̱k, nyeezaku, wa ku̱s ku̱ khar viti ɓaarem kha waare ɗye shir ɓu̱ manva nu̱ke ɗya me ɓu̱ nduku.

¹³ Mbu̱ke tun a shikya ɗye shir ɓu̱ nduku, tun ka mu̱ɗi. Mbu̱ yang tun wa tlagha me ɓu̱ nduk nu̱ka shiki solarang nu̱gha, nu̱ ku̱nshe zalale ɓu̱ Jiimba, tun kha ndu̱ nyifiri.

¹⁴ Jiwa nduki nu̱ke Jiimbi shakhshakhndi a mbu ndu̱ wora, ɗya qusonggi ɓu̱ Magham.

¹⁵ Jiwa Jiimbi nu̱ vu̱rki ye nwang ɗya nu̱ khar maava ɓa, nu̱ke tun ka tu̱kki sawa ɓa. Ɗya Jiimbi nu̱ gaɓki ndu̱ chem ma qusonggi ɓu̱ Magham, chem a qa Magham, nyem za, “Aba! Zhinki!”

¹⁶ Chin Jiimbi shakhshakhndang ndu̱ jiimbi ɓaarem a saidaran ku za shwat chem qusonggi ɓu̱ Magham.

¹⁷ Yang nu̱ke chem qusonggi ɓaran, chem wa kha ma nu̱ gwar shakhti ɗye mbu̱ ge. Nang wa wut nu̱ ɗyine, chem ka gwa ɗye mbu̱ ge barkeku ɓu̱ Magham, chem a khar mu̱dlenki ndu̱ Masiya mbe shakhti ɗye mbu̱ gerang. Yang mbu̱ chem ka gwa zhaaji su̱yen ndu̱ Masiya wa ku̱s ku̱ zami bonye su̱yen ndu̱ chin.

Zhaaji nu̱ke Chem ka ɓa Gwaki

¹⁸ Ai, bonye nu̱ke chem a zaran leendangang ɗya aa nu̱m ɓa mbu̱ ta gonta nda ndu̱ zhaaji nu̱ke a ma wutan yerem gana fan.

¹⁹ Sarchi a nje a ɓari nu̱ke Magham ka ɓa wutki qusonggi ɓaran ye dalangi. Yang ɗyiku nu̱ du̱ngki kap a ku̱rsa sarchi nang wa nu̱m gom.

²⁰ Jiwa wa sa ɗyiku nu̱ Magham du̱ngki kwang wa kha bam nu̱ khu̱l ye ɗyi nu̱ shipaki ku̱ kha ku ɓa, yang du̱ngdikwang nu̱ shim wanang ɓa, ɗya shimndi ɓu̱ Magham. Shi nang ndu̱ sar memu̱na

²¹ nu̱ ɗyine ka ɓa lawa du̱ngdikwang ɓara mbe khar maavi nu̱ke a shiran ye mu̱ti ndu̱ mu̱tli. Ka ɓa gwa me ɓaanda ye sarchi nu̱ke qusonggi ɓu̱ Magham ka ɓa gwaki ɗyin wora nu̱ zhaaji.

²² Chem wa zu̱n nu̱ ɗyine ma ɓar meeni du̱ngdiku ɓu̱ Magham kap a tlu̱rti ku wa nokhzi nu̱ke a ɗyin purman ma kha woi, ku̱me a tu̱k vaanda ku.

²³ Yang du̱ngdikwang ɗyenda kya tlu̱rtang ɓa, chem ndu̱ vaarem chem a shiran tu̱k. Chem nyem gwaki Jiimbi shakhshakhndi nu̱ke chin ke vu̱rti nu̱ gumapaali nu̱ vu̱rki yeremang, chem a tlu̱rti mbu̱ nyifi ɓaarem, chem a ku̱rsaran wa nu̱m gom. Ma ku̱ Magham gaɓ ndu̱ chem ma qusonggi ɓaran parakhndi, tu̱ dli ɗyin man vaarem nang.

²⁴ Jiwa ɗana rem nu̱ ku̱nshe sar memu̱nar nang. Yang mbu̱ chem wa na ɗyi nyem saki memu̱na rem nu̱ ɗyinanang, ɗyen nu̱ kha ma sar memu̱na ɓa. Ki ka saki memu̱naran ma ku̱ gwa nji ɗyi nu̱ke a nje kha nda?

²⁵ Yang mbu̱ chem wa sa memu̱narem nu̱ ɗyine ɗyi nu̱ke nyem gwa dong ɓa, ai, chem wa ka bu ndu̱ kaɗanyi.

²⁶ Wanang tu̱k Jiimbyang a shaata rem mbe tu̱ɓti ɓaarem. Nyem magha shir bara wa nu̱ shipaki ɓa, yang Jiimbyang nu̱ ɗyinan a khuɗ Magham yerem ndu̱ tlu̱rti nu̱ke ɓala ɓu̱ ɗu̱ma zu̱ mban ɓa.

²⁷ Yang Magham nu̱ zu̱nki memu̱na nduku, wa zu̱n ɗyi nu̱ke Jiimbyang a shimndan, ku̱me Jiimbyang ka khuɗkya shimndi ɓu̱ Magham ye nduki ɓu̱ Magham.

²⁸ Chem wa zu̱n nu̱ ɗyine mbu̱ aa nu̱m kap Magham wa ka tlu̱na ɗyi mbarkandi ye nduki nu̱ke a ndola nda, nang ke nduki nu̱ qaki ma ku̱ shi shimndi ɓaran.

²⁹ Jiwa Magham wa zu̱n nduki nyin datki nu̱ ɗawi, wor ke nduki nu̱ Magham bu̱laki nu̱ ve wor ku̱ da shipar ɓu̱ Yi ɓaran, ma ku̱ Yi ɓaranang kha ma nu̱ gumapaali chele nyeezanku khangndi.

³⁰ Yang nduki nu̱ Magham bu̱laki nu̱ ve worang, wor ke nduki nu̱ qaki. Nduki nu̱ qakyang, wor ke nduki nu̱ gaɓki ndu̱ wor tu̱ kha waare sola gume nda. Nduki nu̱ khaki waare solar gume ndang, wor ke nduki nu̱ vu̱rki zhaaji ye wora.

Ndolar Ɓaarem ye Magham mbe Masiya Yesu

³¹ Yang chem ka zu̱ nyem za nu̱m mbu̱ ɓalar nangang na? Nu̱ke Magham kya ji sarem, ki ka shiki kare ndu̱ chema?

³² Magham nu̱ nggu̱tlerem ndu̱ Yi ɓaran ɓa, tu̱ yang vu̱rti nda ku̱me chem kap. Yang Magham nu̱ vu̱rki Yi ɓaranang, ɓu̱ vu̱r aa nu̱m yerem kharan nggaran ɓa goma?

³³ Ki ka daki zhaano ɓu̱ nduki nu̱ Magham datkyang na? Ai, Magham nu̱ ɗyinan gaɓki ndu̱ wor tu̱ kha waare sola gume nda.

³⁴ Ki khu̱lki ma ku̱ kuma mu̱ti ye wora? Masiya Yesu nu̱ mu̱tki, dukti nang, tu̱ ji mbe mu̱ti, yang a nje kharan ɗyin bu̱n zu̱ma ɓu̱ Magham, chin kya khuɗ Magham yerem.

³⁵ Woɗye ki ka shakki rem ndu̱ ndolar Masiya? Bonye mu, palasa mu, kakanshi mu, meeri mu, song mu, nggaɓang nggaɓang mu, yang mu̱ti mu?

³⁶ Ba wa nu̱ bu̱lar ɓalar ɓu̱ Magham zu̱ki za, “Chem a me mu̱ti aakochi ku̱me to, wa da rem ku wa ndu̱ɓangku nu̱ke a ma dla qura wor nu̱gha.”

³⁷ Yang mbu̱ ɗyiku nang kap, chem wa duk du̱mbu̱r ku̱ nduk qa rem za chem rakya wuta ɗyenda, ɗyiku nang yang shi nu̱ ku̱nshe chin nu̱ ndolaremang.

³⁸ Jiwa nga zu̱n shwat nu̱ ɗyine aa mu̱ti, aa nyifiri, aa nu̱ ru̱ktiku ɓu̱ Magham, aa khu̱kheetiku, aa ɗyi nu̱ke chem a mban meeni, aa nu̱ke a ɓari. Aa kwaaɗarku zum zum,

³⁹ aa kirti ɓu̱ tunu, aa mboɓong ɓu̱ ɗyen, aa ɗyi nggur zum mbu̱ du̱ngdiku ɓu̱ Magham nu̱ke a nje. Tun a nje aa da nu̱ke ka shakki rem ndu̱ ndolar ɓu̱ Magham nu̱ke a mbe Masiya Yesu Zhinerem gwaanji ɓa.