Romeku 7 - Mewar Alqawarang

Khar Ɓu̱rti wa shipa khar Ɓaarem ndu̱ Masiya

¹ Nyeezaku, nu̱ke kap ɓaanu tun wa zu̱n bibitang, tun ka da mbu̱ ɗyi nu̱ke nga ma zu̱ran nang. Bibiti ka shi tlu̱nar ɗyine nduku mbu̱ nu̱ zhin a nje ndu̱ nyifi.

² Chem ka nan ve nang, mbu̱ wa gu̱n ɓu̱rti ye nusu, nokhzang a mbu̱ bu̱n zhimen mbu̱ zhimenang a nje ndu̱ nyifiri. Yang mbu̱ zhimenang wa mu̱ɗi, bibiti ɓu̱rtang a nje ɗyine nda tu̱k ɓa.

³ Mbu̱ ke zhimen a nje ndu̱ nyifiri, tu̱ yang ɓu̱r njif nggur zum, wa kha ma nu̱ zawa. Mbu̱ yang mu̱ɗ mu̱ɗi bibiti ɓu̱rtang a nje ɗyine nda tu̱k ɓa, aa wa shi ɓu̱rti ngguri nu̱ kha ma nu̱ zawa ɓa.

⁴ Ɗyen wanang tu̱k nyeezaku, ɗyi nang zu̱ki nang a wutkya pooni ɗyi nu̱ ɗatlki ndu̱ tunu. Mu̱ti ɓu̱ Masiya ɗyin qu̱far kaatlang wa sa tun kha mu̱tan mbe Bibitang. Leendang tun a khar ɓaran, chin Yesu nu̱ Magham jiiki ndu̱ chin ɓar mbe mu̱ti, ma ku̱ vu̱r nu boote ye Magham mbu̱ khar viti ɓaanu.

⁵ Jiwa sarchi nu̱ke chem kharan mbe ɗye shir ɓu̱ nduku, Bibitang a sokh shimndi ɗyiku malkandi ɓaarem. Tu̱ shimndi ɗyiku malkandi ɓaarem nang ki tlu̱nar mbu̱ man vaarem, tu̱ tlu̱nar ɓaarem ki ɓar ndu̱ mu̱ti yerem.

⁶ Yang leendang ɗyinerem wa vi, chem wa lawa mbe Bibitang nu̱ke chem wa mu̱t mbe ɗyi nu̱ gu̱nki rem nu̱gha. Leendang chem a shikya tlu̱nar ɓu̱ Magham ndu̱ mewar khar viti nu̱ ku̱nshe Jiimbi ɓaran. Tlu̱nar nyem shiki ye Bibitikwang wa peeta.

Shogar ɓu̱ Musa ndu̱ Zalale ɓu̱ Sola

⁷ Yang ɗa, chem ka zu̱ nyem za nu̱m ɗo? Bibitang ɗya sola mu? Wanang sar da ɓa! Mbu̱ ku̱me Bibitang ɓa, ngga zu̱n ɗyi nu̱ke ɗya sola kikimndana? Mbu̱ tu̱ga nu̱ bibitang zu̱ za, “Shi na melakh ɗyi ɓu̱ njif nggur ɓa” Ai, ngam ɓu̱ zu̱n nu̱m ke melakh ɗyi ɓu̱ njif nggur ɓa.

⁸ Yang ku̱me ɗyi nu̱ bibitikwang zu̱ki tu̱ sola gwa njiv sokhti aa nyi pooni melakh nu̱ke a mbu̱ vara. Ku̱me mbu̱ bibiti a nje ɓa, sola mu̱tan.

⁹ Ɗau fara nga nje ndu̱ nyifiri, sarchi nu̱ke nang zu̱n bibitang ɓa, yang ba nang zu̱nki bibitikwang, tu̱ sola nakha ndu̱ nyifiri, ɓang yang tang kha mu̱tan.

¹⁰ Chin bibiti nu̱ shipaki ku̱ ɗa ɓa ndu̱ nyifiri, tu̱ ɗa dutkya mu̱ti ya.

¹¹ Tu̱ sola gwa maari, tu̱ lamba nga nu̱ ku̱nshe bibitikwang, tu̱ tlagha nga nu̱ gha.

¹² Ku̱me nang chin bibitang shakhshakh, zu̱r ɓu̱ Magham shakhshakh, torop, yang mbar tu̱k.

¹³ Yang nduk ka dla mban za bibiti mbarkandi nang a ɓa ki ndu̱ mu̱tang ya mu? Fu̱n ɗo, ɗyen sar da wanang ɓa! Sola a dutki nang ya. Sola shikya boote ndu̱ bibiti mbarkandi nang tu̱ ɗa dut mu̱ti ya, ma ku̱ nduk zu̱n shwat nu̱m ke sola. Sola wa ɗal dam tu̱ ɗa vi ye dalang ndu̱ maatli ɓaran nu̱ ku̱nshe bibitang.

Dakhlar nu̱ke a Mbe Nduk ku̱me Solar ɓaran

¹⁴ Chem wa zu̱n nu̱ ɗyine Bibitang ɗya ɗyin mbu̱ jiimba. Yang ɗye shir ɓang ɗya ɓu̱ nduku, nga maavi ɓu̱ sola.

¹⁵ Nang da mbu̱ ɗyi nu̱ke nga shiran ɓa. Ku̱me ɗyi nu̱ke nga shim shiranang, nang ke ɗyi nu̱ke nga shiran ɓa ɗo, yang ɗyi nang zhangki gha, nang ke ɗyi nu̱ke nga shiran.

¹⁶ Yang nu̱ke nga shikya ɗyi nang zhangkyang, nang wa wut nga tlogha nu̱ ɗyine Bibitang mbari.

¹⁷ Mban za, nga kya tlu̱na ɗyiku nang ndu̱ vara ɓa, ɗya solar nu̱ke a nje mbyang.

¹⁸ Nga zu̱ni, ye khar ɓang nduku, ɗyi mbarkandi a nje kharan mbya ɓa. Jiwa nga shim shi ɗyi mbarkandi, yang shir ɗyen wa ku̱na nga.

¹⁹ Ɗyi nu̱ke nga shiranang, ɗya ɗyi mbarkandi nu̱ke nga shim shiranang ɓa, nga shikya ɗyi malkandi nu̱ke nga zhangki ku̱ shi nga ɓa ndang.

²⁰ Yang mbu̱ nga shikya ɗyi nu̱ke nang shim ku̱ shi nga ɓa, nang wa wut nu̱ ɗyine nga kya shi ɗyiku nang ɓa, chin solar nu̱ke a mbya kya shiran.

²¹ Ɗyi nang wa kha ya ma me ɓanga, nu̱ke mbu̱ nga shim shi ɗyi mbarkandi, tang gwa nga shikya ɗyi malkandi.

²² Nga kasha bibiti ɓu̱ Magham mbu̱ memu̱nara;

²³ yang nga na ɗyi nggur zum mbu̱ me barku ɓanga nu̱ke a dakhla ɗyi nu̱ke memu̱nara daki ya. Ɗyi nang wa sa tang kha ma maavi ɓu̱ sola nu̱ke a nje mbya.

²⁴ Ai nga! Nga ɗye zhiyaye! Ki ka lawaki nga mbe man var nu̱ka ɓa ki ndu̱ mu̱ti nangang na?

²⁵ Magham ɗye kuna, ku̱me wa lawa nga nu̱ ku̱nshe Yesu Masiya Zhinerem gwaanji! Ku̱me nang nga mbukya bibiti ɓu̱ Magham mbu̱ memu̱nara, yang mbu̱ ɗye shir ɓanga ye khar ɓang nduku, nga mbukya bibiti ɓu̱ sola.