Romeku 6 - Mewar Alqawarang

Mu̱ti mbe Sola ndu̱ gwar Nyifiri mbe Masiya

¹ Nang chem ka zu̱ nyem za nu̱m ɗo? Zu̱m mi guma ndu̱ sola ma ku̱ mu̱nkir ɓu̱ Magham shaata mu?

² Fu̱n ɗo! Nu̱ shipa sar da ɓa! Chem nyem mu̱tki mbe sola, yang ka shi kikimndi chem zu̱m guma ndu̱ khar mbu̱ solarang na?

³ Alapa nun zu̱n za chem kap ɓaarem nu̱ shiki baptisme yerem mbe Masiya Yesu, shi yerem nu̱ mbe mu̱ti ɓaran ɓa goma?

⁴ Nang a wutan za wa pa rem gha su̱yen ndu̱ chin mbe baptisma sarchi nu̱ paki nda. Chem kha da mbe mu̱ti ɓaran, ku̱me ba wa nu̱ jiiki ndu̱ Masiya nu̱ ku̱nshe zalale nu̱ zhaaji ɓu̱ Zhinkirang, wanang tu̱k ku̱ kha mi ndu̱ mewar khar viti.

⁵ Jiwa nu̱ke chem wa kha da ndu̱ chin mbe pooni mu̱ti ɓaran, chem ka kha da ndu̱ chin mbe jiiri ɓaran mbe mu̱tang tu̱k shwat.

⁶ Chem wa zu̱n nu̱ ɗyine wa woɗa katl ɗye shir malkandi ɓaarem gha su̱yen ndu̱ chin ɗyin qu̱far kaatlang, ma ku̱ da zalale ɓu̱ solar nu̱ke a mbu̱ vaarem nang ɓara. Shi wanang ma ku̱ kha mi ma maavi ɓu̱ sola tu̱k ɓa.

⁷ Jiwa mbu̱ nduk wa mu̱ɗi, wa lawa mbe zalale ɓu̱ sola.

⁸ Yang nu̱ke chem wa woɗa mu̱ti su̱yen ndu̱ Masiya, chem wa maita nu̱ ɗyine chem ka shi khar ɓaarem ndu̱ nyifiri su̱yen ndu̱ chin.

⁹ Jiwa chem wa zu̱n nu̱ ɗyine wa ji ndu̱ Masiya ɓar mbe mu̱ti, yang ɓu̱ gaɓ tu̱ mu̱ɗi sar da tu̱k ɓa. Nang wa wut nu̱ ɗyine zalala kha mu̱t ɗyine nda sar da tu̱k ɓa.

¹⁰ Yang mu̱ti nu̱ shikyang, mu̱t ba sar kaada ye kharki ma ku̱ zha zalale ɓu̱ sola nu̱gha, nu̱ jiiki ndu̱ nyifiri yang ji ma ku̱ shi khar su̱yen ndu̱ Magham.

¹¹ Tun yang tu̱k, da ma vaanu nu̱ ɗyine tun wa mu̱t ye zalale ɓu̱ sola, tun kha ndu̱ nyifiri mbe khar mu̱nkandi ndu̱ Magham nu̱ ku̱nshe Masiya Yesu.

¹² Ku̱me nang njig nu ku̱ sola shi kwaaɗar mbu̱ vaanu nu̱ka mu̱tki nang, tu̱ sa nu ma tlu̱na shimndi ɓaran maatlindi nu̱ me ɓu̱ ndukwang ɓa.

¹³ Ku̱ njig nu tun vu̱r me bar ɓaanu ye sola tu̱ kha ma ɗye tlu̱nar malkandi ɓa. Yang vu̱r ma vaanu ye Magham tun kha wa nduki nu̱ lawaki wor ɓar mbu̱ khar mu̱ti ma gwa nyifiri. Vu̱r ma me bar ɓaanu ye Magham tun kha ma ɗye tlu̱nar dambu.

¹⁴ Ku̱ sola shi kwaaɗar ɗyine nu ɓa, nu̱ke tun a mbu̱ bu̱n Bibitang ɓa, tun a mbu̱ bu̱n mu̱nki.

Maaviku ɓu̱ Tlu̱nar Dambu

¹⁵ Yang nang mban za kim ɗo? Chem ka zu̱m guma ndu̱ solari ku̱me chem a mbu̱ bu̱n Bibitang ɓa, chem a mbu̱ bu̱n mu̱nkir ɓu̱ Magham mu? Auwo! Chem ɓu̱ shi wanang sar da ɓa!

¹⁶ Nun zu̱n za mbu̱ tun wa vu̱r vaanu ye njif nggur tun ki shi shimndi ɓaran, tun wa kha ma maavi ɓaran ɓa goma? Tun ka ɗu̱ma khar ma maavi ɓu̱ sola, nu̱ka ɓa ki ndu̱ mu̱ɗi, yang tun ka ɗu̱ma khar ma maavi ɓu̱ Magham, nu̱ka ɓa ki nu̱ dambu.

¹⁷ Yang Magham ɗye kuna, ku̱me aa nu̱ke ɗau fara tun maavi ɓu̱ sola, leendang tun a mbu shogar nyem shiki ye nu ndu̱ memu̱na nu da.

¹⁸ Wa dli ɗyinonu, tun lawa mbe sola, tun kha ma maavi ɓu̱ dambu.

¹⁹ Nga shikya pooni ɓalar ɓu̱ nduk ye nu, ku̱me tu̱ɓti ɓaanu nu̱ me ɓu̱ nduku. Ɗau fara tun wa su̱n ndu̱ vu̱rti me bar ɓaanu ma tlu̱na ɗye zhaaneku, ndu̱ mu̱nar nu̱ke a zu̱m guma ndu̱ shaatari aakochi. Yang leendang vu̱r ma me bar ɓaanu ye tlu̱nar dambu, tun kha wakaran.

²⁰ Ye sarchi nu̱ke tun a khar maavi ɓu̱ sola, tun nu̱ ba nu ndu̱ tlu̱nar dambu ɓa.

²¹ Yang leendang tun gwakya nu̱m mbe ɗyiku nu̱ khaki ye nu ma ɗye kawar nang na? Ai, lauɗar si ɗyiku nang ɗya mu̱ɗi!

²² Yang leendang wa dli ɗyinonu, tun lawa mbe sola, tun wa kha ma maaviku ɓu̱ Magham. Boote ni chin ke tun wa kha wakaran, yang tun ka gwa nyifi nu̱ke ɓu̱ shi woɗa ɓa ku̱men.

²³ Jiwa ɗye ɓi ɓu̱ sola chin ke mu̱ɗi, yang vu̱rti ɓu̱ Magham chin ke nyifi nu̱ke ɓu̱ shi woɗa ɓa, nu̱ ku̱nshe Masiya Yesu Zhinerem gwaanji.