Romeku 5 - Mewar Alqawarang

Boote ɓu̱ khar waare Sola gume Magham

¹ Nu̱ke chem wa kha waare sola gume Magham nu̱ ku̱nshe maito, chem wa gwa qaandi memu̱na chele ɓaarem ndu̱ Magham nu̱ ku̱nshe Zhinerem gwaanji Yesu Masiya.

² Chem gwa mu̱nkir nu̱ke chem a mban nang nu̱ ku̱nshe maito ɓaarem. Chem a kashari ku̱me chem wa sa memu̱narem nu̱ ɗyine chem ka gwa zhaaji ɓu̱ Magham.

³ Yang nu̱ ching ye nang ɗyenda ɓa, chem a zhakhzhakh tu̱k mbu̱ bonye ɓaarem, nu̱ke chem wa zu̱n nu̱ ɗyine bonye wa ka sa gu̱ndi memu̱na.

⁴ Yang gu̱ndi memu̱na wa ka sa ɗye shir ɓaarem tu̱ kha mbari, ɗye shir mbarkandi wa ka sa chem kha ndu̱ sar memu̱na.

⁵ Yang sar memu̱nar nang ɓu̱ kha bam sar da ɓa, ku̱me Magham wa wuuta ndolar ɓaran yerem nu̱ mbu̱ memu̱narem nu̱ ku̱nshe Jiimbi shakhshakhndi nu̱ vu̱rki yerem.

⁶ Jiwa ba ye sarchi nu̱ khaki torop, mbu̱ sarchi nu̱ke chem ku̱naki shaata vaarem, tu̱ Masiya mu̱t ku̱me chem, chem nu̱ke ɗye shir ɓaarem nu̱ kha torop ndu̱ shimndi ɓu̱ Magham ɓa.

⁷ Ka shi shar ku̱ nduk mu̱t ku̱me nu̱ dambu. Yang bai njif nggur ka ɓu̱tl memu̱naran tu̱ mu̱t ku̱me nduk mbarkandi.

⁸ Yang Magham wa wut ndolar ɓaran maɗyikandi yerem, ma nu̱ke ye sarchi nu̱ke chem a mbu̱ solar ɓaarem, Masiya mu̱tki ku̱me chem.

⁹ Nu̱ke chem wa kha waare sola gume Magham nu̱ ku̱nshe mbu̱ti tom ɓu̱ Masiya, leendang, ka lawa rem ɓar mbe shokhnar ɓu̱ Magham nu̱ ku̱nshe Masiya.

¹⁰ Nang ɗo, mbu̱ ye sarchi nu̱ke chem a kare ndu̱ Magham, chem gwaki somtar ndu̱ chin nu̱ ku̱nshe mu̱ti ɓu̱ Yi ɓaran. Leendang nu̱ gaɓki ndu̱ chem ma raptan ɗa, ai ka ɗana rem nu̱ ku̱nshe khar viti ɓu̱ Yi ɓaranang.

¹¹ Dukti nang, chem a kashar ku̱me ɗyi nu̱ Magham shiki nu̱ ku̱nshe Zhinerem gwaanji Yesu Masiya, nu̱ somtaki chele ɓaarem ndu̱ Magham nu̱ ku̱nshe nda.

Adamu ndu̱ Masiya

¹² Sola a vi nu̱ mbu̱ larji nu̱ ku̱nshe nduk da, tu̱ solar nang a ɓa ndu̱ mu̱ti. Wanang tu̱k tu̱ mu̱ti mbu ɗyin nduki kap, ku̱me aaki wa shi sola.

¹³ Me ku̱ vu̱r Bibitang, sola a nje mbu̱ larji. Yang nduk nu̱ka shiga sola ye maa nu̱ke Bibiti a nje ɓa ɓa.

¹⁴ Yang kap ndu̱ nang, mu̱ti wa shi kwaaɗar ɗyine nduki ji ɗyin sarchi ɓu̱ Adamu ma yir sarchi ɓu̱ Musa. Tu̱ sola shi zalale tu̱k ɗyine nduki nu̱ke solar ɓaanda zhangkya mbu Bibitang gha, wa nu̱ Adamu shikyang ɓa. Yang Adamu a khar wa shipar ɓu̱ njif nggur nu̱ke a ɓar ndu̱ vu̱rti ɓu̱ Magham.

¹⁵ Yang vu̱rti ɓu̱ Magham nu̱ ɗa ɓa ki nu̱ ku̱nshe njif nu̱ke a ɓar nang, wa ngga yen maɗyi ndu̱ solar nu̱ Adamu shiki. Nu̱ke solar nu̱ nduk kaada shiki nang a ɓa ndu̱ mu̱ti ye nduki khang. Wanang tu̱k, mu̱nkir ɓu̱ Magham ndu̱ vu̱rti nu̱ ɗa ɓa ki nu̱ ku̱nshe nduk kaada, nang ke Yesu Masiya nu̱ vu̱rki barke gwaanji ye nduki khangndi nang wa duk naandang ɓakh maɗyi.

¹⁶ Ɗyen wanang shwat, vu̱rti ɓu̱ Magham nang wa duk solar nu̱ke nduk kaadandi nang shiki. Jiwa kumar nu̱ ɗa mbuki gaanje solar dandi nang a ɓa ki ndu̱ mu̱ti, yang vu̱rti nu̱ Magham shiki saki chem kha waare sola gume nda, aa nu̱ke chem wa shi solar khang.

¹⁷ Solar ɓu̱ Adamu chin ɗyenda nu̱ saki tu̱ mu̱ti shi kwaaɗar ɗyine aaki nang, ɗya aa nu̱m ɓa mbu̱ ta gonta ndu̱ ɗyi nu̱ nduk kaadandi, Yesu Masiya nang a ɓa ki si. Chem gwa khang mu̱nkir ɓu̱ Magham ndu̱ vu̱rti nu̱ saki chem kha waare sola gume Magham nu̱ ku̱nshe nda. Chem ka shi kwaaɗar mbu̱ khar viti ɓaarem nu̱ ku̱nshe nda tu̱k.

¹⁸ Ku̱me nang, ba wa nu̱ solar ɓu̱ nduk da a ɓa ki ndu̱ mu̱ti ye aaki, wanang tu̱k tlu̱nar dambi nu̱ nduk da shiki a ɓa ndu̱ barke ye aaki, nang ke gwar khar waare sola gume Magham ndu̱ mewar nyifiri.

¹⁹ Ba wa nu̱ nduki khang khaki ma nu̱ solar ku ku̱me zhangndi tu̱kti maa ɓu̱ nduk kaada, wanang tu̱k nduki khang ka kha waare sola gume Magham nu̱ ku̱nshe mburi zu̱r ɓu̱ Magham nu̱ nduk kaada shiki.

²⁰ Vu̱r Bibitang ma ku̱ sola a vi ye dalangi. Yang sarchi nu̱ sola shaataki, tu̱ mu̱nkir ɓu̱ Magham shaata maɗyi.

²¹ Wa nu̱ solar shiki kwaaɗar ɓaran nu̱ ku̱nshe mu̱ti, wanang tu̱k mu̱nkir ɓu̱ Magham a kwaaɗar ɓaran leendang nu̱ ku̱nshe dambu. A yir ndu̱ chem ye nyifi nu̱ke ɓu̱ shi woɗa ɓa mbe Yesu Masiya Yesu Zhinerem gwaanji.