Romeku 4 - Mewar Alqawarang

Yibram wa kha waare Sola nu̱ ku̱nshe Maito

¹ Yang chem ka zu̱kya nu̱m ɗyine Yibram, zhikan zhikanerema? Zu̱nkya nu̱m ɗyine ɓalar maito nang ɗo?

² Mbu̱ Yibram gwa khar waare sola nu̱ ku̱nshe tlu̱narku ɓaran, nang wa wut nu̱ ɗyine wa gwa ɗyi nu̱ke ka shiki me wakhti si, yang ɓu̱ shi gume Magham ɓa.

³ Bu̱lar lagarkati ɓu̱ Magham wa zu̱ za, “Ku̱me Yibram wa maita Magham, tu̱ Magham shiga yenda nu̱ mbu̱ dambu.”

⁴ Njif nu̱ke a tlu̱nar mu̱zhin, ɗye ɓi ɓaran ɗya mu̱nki ɓa, ɗye ɓiirang a khar me tlu̱nar ɓaranang.

⁵ Yang njif nu̱ke nu̱ dla varan nu̱ ve tlu̱nar ɓaran ɓa, tu̱ yang dla varan nu̱ ve Magham, chin nu̱ka saki nduki nu̱ke ɗye shir ɓaanda ɗya ɓu̱ Magham ɓa, ku̱ kha waare zop gume ndang. Maito ɓu̱ njif nang wa kha ma dambu.

⁶ Nang ke mbu̱ ɓalar nu̱ Dauda zu̱ki ɗyine barke nu̱ke a ve njif nu̱ Magham qaki nda nu̱ dambu. Yang a ve tlu̱nar nu̱ njifang shiki ɓa. Nu̱ zu̱ki za,

⁷ “Barkya ve njif nu̱ ndu̱mki solar ɓaran yenda, njif nu̱ yaapaki solar ɓaran.

⁸ Barkya ve njif nu̱ke Zhinkir gwaanji nu̱ka shiga si solarku ɓaran ɓa.”

⁹ Yang ɓa, barke nang ɗya ɓu̱ nduki nu̱ dlaki su̱ wor ɗyenda mu, yang nduki nu̱ke nu̱ dla su̱ wor ɓa a si mu? Ɗyi nu̱ke chem a zu̱ran nang chin ke, “Jiwa wa shiga maito ɓu̱ Yibram ma dambu.”

¹⁰ Yang qa nda nu̱ mbu̱ nu̱ dambyang ye nyi sarcha? Qa nda me ku̱ dla san mu yang qu̱rse wa dla san nu̱gha mu? Ai, qa nda me ku̱ dla san nu̱gha.

¹¹ Ye sarchi nu̱ shiki ɓalar dlarsi yendang, shi ma ku̱ kha ma saidu dambi nu̱ gwaki ku̱me maito ɓaran, ku̱me sarchi ni san dlaran ɓa ɗo. Ku̱me nang Yibram wa kha ma zhinkir ɓu̱ nduki nu̱ maitaki Magham, nu̱ daki wor ma nu̱ dambu, aa nu̱ke nu̱ dla su̱ wor nu̱gha ɓa.

¹² Wanang tu̱k, Yibram a khar zhinkir ɓu̱ nduki nu̱ dlaki su̱ wor nu̱gha, yang dlakya su̱ wor nu̱gha ɗyenda ɓa, a mbu pooni maito nu̱ Yibram shiki me ku̱ dla san nu̱gha.

Alqawar ɓu̱ Magham ndu̱ Maito ɓu̱ Nduku

¹³ Alqawar nu̱ shiki ye Yibram ndu̱ zhikankirku ɓaran nu̱ gana za ka zu̱m ɗye mbu̱ ge larji ku, Ai, shi nu̱ ku̱nshe Bibitang ɓa, shi alqawarang nu̱ ku̱nshe dambi nu̱ke nduk ka gwaki nu̱ ku̱nshe maito.

¹⁴ Jiwa mbu̱ nduki nu̱ke a mbu Bibitang ka zu̱mki shakhti ɗye mbu̱ ge larji, ai, boota ve maito ɓa, yang alqawar ɓu̱ Magham wa kha bam tu̱k.

¹⁵ Bibitang a dutkya shokhnar ɓu̱ Magham, ku̱me mbu̱ Bibitang a nje ɓa, zop nje zum ɓa.

¹⁶ Ku̱me nang, alqawarang a ɓa mbe maito. Shi alqawarang shwat, ma ku̱ kha ma mu̱nkir ɓu̱ Magham ye qusonggi ɓu̱ Yibram kap. Yang ye qusonggi ɓaran nu̱ke a mbu̱ bu̱n Bibitang ɗyenda ɓa, ye qusonggi ɓaran nu̱ maitaki ba wa nu̱ Yibram shikyang tu̱k. Yibram ke zhinerem kap.

¹⁷ Ba wa nu̱ke a nje bu̱laran za, “Ngga sa to kha ma zhinkir ɓu̱ me ghaiku khang.” Shi alqawar nang ye Yibram, ku̱me wa maita Magham, chin nu̱ka jiiki ndu̱ mu̱ti tu̱ kha ndu̱ nyifiri, tu̱ qa ɗyi nu̱ke a nje ɓa ku̱ kha wa a nje, tu̱ yang shi.

¹⁸ Aa nu̱ke Yibram wa sa memu̱naran, tu̱ ɗyen kha wa ɓu̱ shi ɓa, yang nu̱ fet memu̱naran ɓar ɓa, tu̱ zu̱m guma ndu̱ sar memu̱naran su̱yen ndu̱ maitaran. Tu̱ yang kha ma zhin me ghaiku khang, nang ke alqawar nu̱ shiki yenda za, “Qusonggi ɓa ka shi khang wanang.”

¹⁹ Yang ye sarchi ni, sonyi ɓu̱ Yibram wa shi wa sonyi won ka, yang nu̱ maito ɓaran kata ɓa, aa nu̱ke du̱mbu̱r ɓaran wa woɗa ku̱me wa geema, wonji chin Saratu nokhzan, wa peeta me khar woi.

²⁰ Nu̱ Yibram kha mban rap rap ɗyine ɗyi nu̱ Magham shiki alqawaran yenda ɓa, tu̱ yang shaatakya du̱mbu̱r mbu̱ maito ɓaran, tu̱ vu̱r zhaaji ye Magham.

²¹ Wa maita za Magham ka ɗu̱ma nyel alqawar ɓaran shwat.

²² Nang ke ɗyi nu̱ saki tu̱ shiga maito ɓu̱ Yibram tu̱ kha ma dambu yenda.

²³ Ai, ɓalar nu̱ zu̱ki za, “wa shiga maito ɓaran tu̱ kha ma dambu yendang,” bu̱la ku̱me chin ɗyenda ɓa.

²⁴ Bu̱la nang ku̱me chem, chem nu̱ke Magham ka ɓa shigaki rem nu̱ mbu̱ nu̱ dambi ku, chem nyem maitaki njif nu̱ jiiki ndu̱ Yesu Zhinerem gwaanji ɓar mbe mu̱ti.

²⁵ Vu̱r Yesu ɓar tu̱ mu̱t ku̱me solarku ɓaarem, yang ji ndu̱ chin ɓar mbe mu̱ti tu̱ kha ndu̱ nyifiri ma ku̱ kha mi waare zop gume Magham.