Romeku 3 - Mewar Alqawarang

¹ Yang nu̱m ke boote khar ɓa ma Yakhude ndukwa na? Dlar soro no shikyang ka shaatakya nu̱m yora?

² I ɗo, boota su̱ shwat, ve aa nyi njiva! Gumapaali, Magham vu̱r ɓalar ɓaran nu̱ mbu̱ khar Yakhudeku.

³ Yang nu̱ke ɓeeni Yakhudeku nu̱ maita ɓa ɗa? Song maitaranang ka nggu̱tl khar ɓu̱ Magham ma nu̱ shir zhire mu?

⁴ Fu̱n ɗo! Ɓu̱ nggu̱tl sar da ɓa! Magham ka kha ma nu̱ zhire aakochi, aa nduki kap wa kha ma nu̱ wollo ku. Ba wa nu̱ke a nje bu̱laran za, “Ɓalar ɓa ɗya zhire aakochi shwat, aa gume kuma to ke nu̱ zhire.”

⁵ Yang nu̱ke tlu̱nar malkandi ɓaarem wa wut za ɗyi nu̱ Magham shikyang torop, chem ka zu̱ nyem za nu̱m ɗo? Mbu̱ Magham wa kuma rem chem ka zu̱ nyem za nu̱ shi torop ɓa mu? (Nang ke pooni konyi ɓu̱ nduku)

⁶ Auwo! Ɗyen wanang sar da ɓa! Mbu̱ Magham nu̱ shi torop ɓa, ka kuma larji kikimndana?

⁷ Yang mbu̱ kotame ɓang wa sa zhire ɓu̱ Magham tu̱ ɗa vi ye dalang maɗyi, tu̱ kha ma ɗye vu̱rti zhaaji ye Magham, nu̱m saki ka kumaki nga za nga nu̱ sola?

⁸ Mbu̱ wanang, nu̱m saki chem ɓu̱ zu̱m guma ndu̱ solar ma ku̱ ɗyi mbarkandang vi mban ɓa? Nduki nggur nu̱ka shiki maatli ɓalar nu̱ ɗyine rem a zu̱ran ku za chem wa zu̱ wanang nggwa. Yang ka gwa kumar nu̱ shipaki wora.

Nu̱ Dambu nje aa Da ɓa

⁹ Yang chem ka lauɗa su̱ ɓalar nang za kim ɗo? Chem Yakhudeku chem wa duk ɓeeni nduki mu? Auwo! Ɗyen wanang shwat ɓa! Chem wa woɗa wutan nu̱ ɗyine Yakhudeku ndu̱ nduki nu̱ke ɗya Yakhudeku ɓa ɗya nu̱ sola ku kap, yang a mbu̱ bu̱n sola ku kap.

¹⁰ Ba wa nu̱ke a nje bu̱laran za, “Nu̱ dambu nje ɓa, a nje aa da shwat ɓa.

¹¹ Nduk a nje nu̱ daki mban ɓa, nu̱ laɓti Magham a nje ɓa.

¹² Kap ɓaanda wa vu̱r mbu̱ qu̱rsi wor ye Magham, boota ve wor ɓa. Nu̱ tlu̱nar dambi nje ɓa, a nje aa da ɓa.”

¹³ “Ghoghor su̱qur wor ɗya ku̱jip qu̱nkandi, ghiindi wor ka shikya lamba.” “Chiti ɓu̱ khuska kya ve me wora.”

¹⁴ “Me wor nyeedlan ndu̱ maatli ɓalarku ndu̱ pu̱ziku zum zum.”

¹⁵ Saari wor wa ka shi wakho yir ma mbu̱ti tom gha,

¹⁶ Tlaghar mu̱ti ndu̱ su̱bu̱rti mbu kya nje aa ɗu̱kya fu̱n ku.

¹⁷ Nu̱ zu̱n njiv qaandi memu̱na ku ɓa.

¹⁸ “Sawar Magham a nje mbu̱ kwaari ɓaanda ɓa.”

¹⁹ Chem wa zu̱n nu̱ ɗyine ɗyi nu̱ Bibitang zu̱ki kap, a zu̱ran ye nduki nu̱ke a mbu̱ bu̱n Bibitang. Shi wanang ma ku̱ nduk gwa ɗye zu̱ ɓa, tu̱ larji kap khan mbe kumar ɓu̱ Magham.

²⁰ Jiwa nduk a nje nu̱ke ka khaki waare sola gume Magham nu̱ ku̱nshe mbu ɗyi nu̱ Bibitang zu̱ki ɓa, ku̱me Bibitang a wutkya solar ɓaarem yerem.

Dambi nu̱ ku̱nshe Maito

²¹ Yang leendang wa wut njiv nggur yerem zum nu̱ke chem ka gwaki dambi ɓu̱ Magham. Nduk ɓu̱ gwa dambi nang nu̱ ku̱nshe mbu Bibitang ɓa, aa nu̱ke Shogar ɓu̱ Musa ndu̱ lagarkati ɓu̱ annabikwang wa saida dambi nang.

²² Chin dambi nu̱ka ɓa ki she Magham nang, nduki nu̱ maitaki kap ka gwa nu̱ ku̱nshe maito mbe Yesu Masiya. Nduk a nje nu̱ khaki zum ɓa,

²³ jiwa aaki wa shi sola, tu̱ mbu̱ɗ gwar zhaaji ɓu̱ Magham.

²⁴ Yang ku̱me vu̱rti nu̱ Magham shiki ye aaki mu̱nki, tu̱ aaki kha ma nu̱ dambu gume Magham nu̱ ku̱nshe dli ɗyin nu̱ Masiya Yesu shiki.

²⁵ Magham wa vu̱r Yesu tu̱ kha ma sadke nu̱ daki shipiti solar ɓaarem ɓara nu̱ ku̱nshe maitar tom ɓaran nu̱ mbu̱ɗki. Magham shi wanang ma wut ɗyi toropndi nyin shiki ku̱me wa gu̱n memu̱naran, tu̱ njig solarku nu̱ nduki shiki zhu nu̱ kuma wor ɓa.

²⁶ Shi wanang ma wut nji mbu̱ qaandiku nang za ɗyi nyin shiki zhwang torop, kom ku̱ gaɓ ndu̱ njif nu̱ maitaki Yesu tu̱ kha waare zop gume nda.

²⁷ Yang nang chem ka shi me wakhti nu̱ ɗyine nu̱m ɗo? Ai, a nje ɓa! Yang da chin wakhtang ɓara kikimndana? Da ɓar nu̱ ku̱nshe mburi Bibitang mu? Auwo, da ɓar nu̱ ku̱nshe maito.

²⁸ Jiwa chem wa na nu̱ ɗyine nduk ka gwa khar waare sola gume Magham nu̱ ku̱nshe maito, nduk nu̱ka gwa nda nu̱ ku̱nshe mburi Bibitang ɓa.

²⁹ Yang woɗye Magham ɗya ɓu̱ Yakhudeku ɗyenda mu? Alapa ɗya ɓu̱ nduki nu̱ke ɗya Yakhudeku tu̱k ɓa goma? Wanang ni, ɗya ɓu̱ nduki nu̱ke ɗya Yakhudeku ɓa tu̱k,

³⁰ ku̱me Magham kaada, ka sa tu̱ nduki nu̱ke su̱ wor dlaran gwa khar waare sola gume nda nu̱ ku̱nshe maito. Wanang tu̱k, nduki nu̱ke su̱ wor dlaran ɓa ka gwa khar waare sola gume Magham nu̱ ku̱nshe maito dandi nang.

³¹ Yang ɗa, chem wa da Bibitang ɓar nu̱ ku̱nshe maito nang mu? Sar da wanang ɓa! Me ɓu̱ nang, chem a gu̱nkya su̱ Bibitang.