Romeku 2 - Mewar Alqawarang

Kumar ɓu̱ Magham Torop

¹ Ku̱me nang, to nu̱ nggu̱ti mu̱dlo ndu̱ zop, ɓala kha ɓa, aa to ki. Ku̱me sarchi nu̱ke ta nggu̱t mu̱dlo nu̱ zop, ta dlakya kumar nu̱ ɗyine vaaro, ku̱me ɗyi nu̱ke ta kuma mu̱dlo ɗyinanang, nang ke ɗyi nu̱ke ta shiran tu̱k.

² Chem wa zu̱n nu̱ ɗyine kumar ɓu̱ Magham torop ɗyine nu̱ tlu̱nar ɗyiku nang.

³ Yang to nduku! Ta tlu̱nakya ba zop nu̱ke ta nggu̱t mu̱dlo sang! Ye tamandi ɓaaro, to ka lawa mbe kumar ɓu̱ Magham mu?

⁴ Yang ɓa, ta ndu̱mkya khang mu̱nkir ɓu̱ Magham, ndu̱ kanaɗyi ɓaran, ndu̱ song wuti shokhnar ɓaran ɗau ɗau nu̱ke a shiran yorang mu? Alapa no zu̱n za mu̱nkir nu̱ke Magham a shiran yorang a shiran ma ku̱ nggoɗ na ɓa goma?

⁵ Yang kaaku̱ɗakh ɗyin, ndu̱ kaaku̱ɗakh memu̱nar nu̱ke ta shiran nang, ta tabakya kumar ye ɗyinoro, yang a buroro ye Fu̱ɗar shokhnar ɓu̱ Magham, nang ke sarchi nu̱ke a ma wut kumar toropndi ɓu̱ Magham.

⁶ Magham ka ɓi aaki ku̱rku̱r ndu̱ tlu̱nar ɓaran.

⁷ Nduki a nje nu̱ke a kaala gorkir ndu̱ zhaaji nu̱ke nu̱ka shi woɗa ɓa. Nang ke nduki nu̱ shiki mbarkir mbe kanaɗyi, wor ke nduki nu̱ke Magham a ma vu̱r ɗye ɓi nu̱ nyifiri nu̱ke ɓu̱ shi woɗa ɓa ye wora.

⁸ Yang nu̱ shimndi ɗyin ku, nu̱ke ka tlu̱nakya song zhire ndu̱ mu̱na, ka ɓi wor mbe su̱bu̱rti memu̱na ndu̱ shokhna.

⁹ Bonye ndu̱ takashi kya bu aa nyi nu̱ tlu̱nar mu̱na, Yakhudeku gumapaali, kom nduki nu̱ke ɗya Yakhudeku ɓa.

¹⁰ Yang kap njif nu̱ shiki tlu̱nar mbarki ka gwa zhaaji ndu̱ gorkiri ndu̱ qaandi memu̱na, Yakhudeku gumapaali, kom nduki nu̱ke ɗya Yakhudeku ɓa.

¹¹ Jiwa Magham nu̱ka ji su̱ nduk ɓa, ka kumakya zhire.

¹² Mbu̱ nduki nu̱ke nu̱ vu̱r Bibitang ye wor ɓa wa shi sola ka su̱ya wor nu̱gha aa nu̱ke nu̱ zu̱n Bibitang ku ɓa. Yang mbu̱ Yakhudeku nu̱ vu̱rki Bibitang ye wora wa shi sola ka kuma wor ndu̱ Bibiti nu̱ke a kha worang.

¹³ Jiwa tu̱kti Bibitang ka saki tu̱ nduk kha ma nu̱ dambi gume Magham ɓa, tlu̱nar ɗyi nu̱ Bibitang zu̱ki ka saki tu̱ qa wor nu̱ dambi.

¹⁴ Nduki nu̱ke ɗya Yakhudeku ɓa, Bibit kha wor ɓa. Yang kap ndu̱ nang wa ka shi ɗyi nu̱ Bibitang zu̱ki fu̱ɗa ngguri, ba wa nu̱ memu̱na wor daki ye wora. Nang wa wut nu̱ ɗyine nduki nu̱ke Bibit kha wor ɓa wa kha ma bibiti ɓu̱ vaanda.

¹⁵ Tlu̱nar ɓaanda wa wut nu̱ ɗyine ɗyi nu̱ Bibitang zu̱ki a nje bu̱laran mbu̱ memu̱na wora. Kwaari nu̱ memu̱na wor wa saida nang, nu̱ke kwaari ɓaanda wa ka wut za wor wa shi sola fu̱ɗa ngguri, ye sarchi nggur tu̱ka wut ye wor nu̱ ɗyine nu̱ wor shi sola mbe ɗyi nggur ɓa.

¹⁶ Ku̱me nang, ba wa nu̱ Labar mbarkandi nu̱ke nga waazu ɓaran nang zu̱ki, ka ɓa kha wanang Fu̱ɗar nu̱ke Magham, nu̱ ku̱nshe Yesu Masiya ka ɓa kumaki ɗyiku nu̱ke a nje tukaran mbu̱ kwaari ɓu̱ nduki.

Yakhudeku ndu̱ Bibitang

¹⁷ Yang to no ka qaki va no za to Yakhude nduk ɗa? Ta dla va nu̱ ve Bibitang, ta wut me wakhti viɗ ɗyine poona khar nu̱ke a chele ɓa ndu̱ Magham,

¹⁸ ta zu̱ran no za ta zu̱n shimndi ɓu̱ Magham, ta da mbu̱ ɗyi nu̱ Bibitang zu̱ki ɗyine daati ɗyi toropndi.

¹⁹ Ta maita nu̱ ɗyine ta khar wa nu̱ balar pugumku, ta khar wa yarang ye nduki nu̱ke a mbu̱ zhumi,

²⁰ nu̱ shogar ye nggu̱bu̱ngku ndu̱ maalu̱m ɓu̱ nduki nu̱ke kwaari ɓaanda wa ɓu̱ qusongga. Ta zu̱n tu̱k nu̱ ɗyine zu̱ndi nyelkandi ndu̱ zhire a nje mbe Bibitang.

²¹ Ku̱me nang, to no ka shogaki ye nduki, shogo ye ɗyinor ɓa! To nu̱ waazu za ku̱ nduk shi muuru ɓa, no ka shi de?

²² To nu̱ zu̱ran za ku̱ nduk shi zawa ɓa, no ka shi zawarang de? To nu̱ke ta zhaana mu̱lu̱mku, no ka muura tun ɓar mbu̱ kib bararang de?

²³ Ta wakhti ndu̱ Bibitang, yang ta ka su̱bu̱r dlu̱m Magham nu̱gha nu̱ ku̱nshe shir ɗyi nu̱ Bibitang nggu̱tlki.

²⁴ Ai, a nje bu̱laran za, “Nduki nu̱ke ɗya Yakhudeku ɓa a ɓalar ndu̱mndi ve dlu̱m Magham ku̱me tun Yakhudeku.”

²⁵ Mbu̱ ta ka mbu Bibitang, dlarsi nu̱ shiki yorang wa kha ndu̱ boota. Mbu̱ yang no ka khutlo Bibitang ɓa, dlarsi nu̱ shiki yorang wa kha bam.

²⁶ Yang ɗo, alapa mbu̱ nduki nu̱ke nu̱ dla su̱ wor nu̱gha ɓa wa tlu̱na ɗyi nu̱ Bibitang zu̱ki, ɓu̱ kha ku wa nduki nu̱ dlaki su̱ wor nu̱gha she Magham ɓa goma?

²⁷ Nduki nu̱ke su̱ wor dlaran ɓa yang a tlu̱na ɗyi nu̱ Bibitang zu̱ki, ka kuma ro, to nu̱ke bu̱lar Bibitang a nje khaaro, wonji ta dla soro nu̱gha tu̱k, yang no ka mbu zu̱r ɓu̱ Bibiti ɓu̱ Maghamang ɓa.

²⁸ Jiwa nduk nu̱ka zu̱n Yakhude zhirekandi nu̱ ku̱nshe ɗyi nu̱ke nduk a naran dam ɓa, yang dlarsi zhirekandi nduk nu̱ka na nu̱ yiti zum ɓa.

²⁹ Yakhude zhirekandi ke njif nu̱ke ɗya Yakhuda mbu̱ memu̱naran, yang tu̱k dlarsi zhirekandi ke dlarsi nu̱ke a mbu̱ memu̱na nduku, nang ke ɗyi nu̱ Jiimba shiki, ɗya ɗyi nu̱ bu̱lar Bibitang shiki ɓa. Njif nu̱ khaki wanang Magham ke nu̱ kuna nda, ɗya nduk ɓa.