Romeku 13 - Mewar Alqawarang

Mburi Zu̱r ɓu̱ nu̱ Kwaaɗarku

¹ Wa ku̱s ku̱ aaki mbu zu̱r ɓu̱ nu̱ kwaaɗarku, ku̱me zalale nggur a nje ɓa kope Magham wa tlogha san. Yang tu̱k Magham saki nu̱ kwaaɗarku nu̱ zalale ku nang kap.

² Ku̱me nang njif nu̱ zhangki mbu zu̱r ɓu̱ kwaaɗa gha, zhangkya ɗyi nu̱ Magham saki gha. Nu̱ shir tun ku wanang ka ɗa dut kumar ye vaanda.

³ Jiwa nu̱ kwaaɗarku ɗya ɗye sawa she nduki nu̱ke a shi ɗyi mbarkandi ɓa, buka nduki nu̱ke a shi ɗyi galkandi ka tu̱kki sawa. Tun a shim lawa nu mbe tu̱kti sawar ɓu̱ nu̱ kwaaɗa mu? Mbu̱ wanang shi ma ɗyi mbarkandi, chin yang ka makhta nu,

⁴ ku̱me ɗya maavi ɓu̱ Magham ma shir ɗyi mbarkandi ye nu. Yang mbu̱ tun nu̱ shir ɗyi malkandi tu̱k ma sawa, ku̱me nu̱ kwaaɗarang a khuɓ kaskar ɓaran bam ɓa. Ɗya maavi ɓu̱ Magham, ma wut shokhnar ɓu̱ Magham nu̱ ɗyine nu̱ mu̱narku tu̱ kuma wora.

⁵ Ku̱me nang wa ku̱s ku̱ vu̱r nu ɗyinonu ye nu̱ kwaaɗarku. Tun ka shi wanang ma ɗa shokhnar ɓu̱ Magham ɗyenda ɓa, tun ka shi ma ku̱ kwaari nu̱ memu̱nanu kha waare zop.

⁶ Nang saki tun ki dli zhaanggali, ku̱me nu̱ kwaaɗarku ɗya nu̱ tlu̱narku ɓu̱ Magham nu̱ke a vu̱r sarchi ɓaanda kap ma kwaaɗa.

⁷ Tun dli kudum nu̱ke aakya mburo nu. Mbu̱ ɗya zhaanggal ɓaanu nu̱ shipaki ku̱ dli nu, tun dli, mbu̱ ɗya zhaanggal nu̱ ɗyine ɗye gomarku ɓaanu, tun dli, mbu̱ vu̱rti gorki, tun vu̱r gorkiri, mbu̱ ɗya vu̱rti zhaaji, tun vu̱r zhaaji.

Daasar ma Bu Gaɓti ɓu̱ Masiya

⁸ Ku̱ kha nu ndu̱ kudum ɓu̱ aaki ɗyinonu ɓa. Buka kudum nu̱ ku̱ski shi nu, nang ke kudum wuti ndola ye yen. Ku̱me njif nu̱ke a ndola njif nggur wa nyel Bibitang ɗo.

⁹ Wopar ɓu̱ Magham ku nang, wor ke, “Tom ɓu̱ shi zawa mbu̱ ɓu̱rti ɓa, tom ɓu̱ tlagha mu̱ɗ ɓa, tom ɓu̱ shi muuru ɓa. Tom ɓu̱ kha ma nu̱ zhiri ɓa,” ndu̱ ɓeeni bibitiku nu̱ke a nje, wa nyel mbu̱ ɓalar dandi nang nu̱ zu̱ki za, “Ku̱ ndola nu aaki wa vaanu.”

¹⁰ Mbu̱ tun a ndola nduku tun ɓu̱ mu̱na nda sar da ɓa. Ku̱me nang ndola ke nyedli ɓu̱ woparang.

¹¹ Tun ki shi nang ku̱me tun wa zu̱n sarchi nu̱ke chem a mban. Sarchi wa shi nu̱ke tun ka nakhaki mbe ɗyenir ɓaanu, ku̱me sarchi ɗanar ɓaanu a shi bing leendang tu̱ duk sarchi nun maitaki gumapaalyang.

¹² Virkirang wa shi bing woɗari, wa njig koɗom ku̱ maarang ɗatli. Ku̱me nang bu ku̱ wos mi tlu̱nar nu̱ zhum maari gha, chem sa lukti nu̱ vi nu̱ dakhlar ɓaarem nu̱ yarangi.

¹³ Bu ku̱ khar viti ɓaarem kha mbari wa nu̱ shipaki nduki nu̱ke a khar mbu̱ yarangi. Waare nggar zu̱mndi ku bam bam ndu̱ kuyari, ndu̱ zawar ku ndu̱ tlu̱nar ɗye zhaane ku nu̱ song kawa, ndu̱ dakhlari ndu̱ ɓar nu̱ shakhti ɗyin ndu̱ zhiri.

¹⁴ Me ɓu̱ nang tun da ɗye shir mbarkandi ɓu̱ Zhinerem gwaanji Yesu Masiya, ku̱ mbu nu su̱ ɗye shir ɓu̱ manva ma ku̱ sa nu ma mbu shimndi ɓaran ɓa.