Romeku 11 - Mewar Alqawarang

Magham nu̱ zhang Israila gha Guma Da ɓa

¹ Yang bu zham nga ɗo, Magham wa zhang nduki ɓaran gha guma da mu? Auwo! Wanang shwat ɓa! Ai, nga ndu̱ vara nga nduk Israila, nga pooni ɓu̱ Yibram, me sham ɓu̱ Banyami.

² Yang Magham nu̱ zhang nduki ɓaran nu̱ datki gumapaali ɓa. Tun wa zu̱n ɗyi nu̱ bu̱lar Ɓalar ɓu̱ Magham zu̱ki nu̱ ɗyine Iliya, Iliya wa gho ye Magham ɗyine Israila a zu̱ran za,

³ “Zhinkir gwaanji, wa tlagha annabiku ɓa nu̱gha, tu̱ tu̱pa du̱ku̱lku ɓa nu̱ yaghai. Njigkya nga ɗyenda leendang, yang a laɓti nga ku ma tlagha nga.”

⁴ Yang Magham tlogha yenda za nu̱ma? Tlogha yenda za, “Nga du̱ng nduki du̱pu mut (7,000) gha nu̱ke nu̱ zu̱ me purmi wor yaghai ma ghar ghai ye mu̱lu̱m nu̱ka qaki nda za Ba'al ɓa.”

⁵ Ɗyen ba wanang tu̱k leendang. Rong ma kaani ɓeena nduki a nje nu̱ Magham datki wor nu̱ ku̱nshe mu̱nkir ɓaran.

⁶ Yang daati nu̱ Magham shiki nang shi ku̱me mu̱nkir ɓaran, nu̱ dat wor ku̱me tlu̱nar ɓaanda ɓa. Ku̱me mbu̱ wanang ɓa mu̱nkirang nu̱ kha ma mu̱nki shwat ɓa.

⁷ Yang kim ɗo? Israila wa ku̱na gwa ɗyi nu̱ke a laɓtan ku maɗyang, yang nduki koɗomma nu̱ datki chele ɓaanda gwaki ku. Tu̱ ɓeena ndukyang kha ma nu̱ kaaku̱ɗakh ɗyin ku.

⁸ Ba wa nu̱ke a nje bu̱laran za, “Magham wa gaɓ ndu̱ wor ma nu̱ song dar mbu̱ tunu ɗau. Tu̱ vu̱r yiti ye wor nu̱ke nu̱ka na maa ɓa, ndu̱ dlu̱mdi nu̱ke nu̱ka tu̱k maa zum ɓa, ma ɓar ye meeni.”

⁹ Yang Dauda wa zu̱ tu̱k za, “Bu ku̱ tabar zu̱mndi ɓaanda kha ma shaanggir nu̱ ku̱du̱m nu̱ke ka ku̱ski wora, tu̱ kha ma ɗye ji saari ndu̱ ɗye duti kumar ye wora.

¹⁰ Bu ku̱ yiti wor kha zhum ku̱ na maa ku ɓa, tu̱ khang bonye ɓaanda sa taɗar ye wor nu̱ke koɗokhsi ɓa.”

Ɗanar ɓu̱ Nduki nu̱ke ɗya Yakhudeku ɓa

¹¹ Yang bu shi nga zhamndi nggur tu̱k leendang. Nu̱ Israila jiiki saari wor, tu̱ njim kwang, ɓu̱ ji nu̱ viɗi ku de? Auwo! Ɗyen wanang ɓa! Nduki nu̱ke ɗya Yakhudeku ɓa wa gwa ɗanar nu̱ ku̱nshe solar nu̱ Yakhudekwang shiki, ma ku̱ Israila shi zhiri ɓaanda.

¹² Yang mbu̱ solar nu̱ shiki kwang a ɓa ndu̱ barke maɗyikandi ye larji, tu̱ tu̱ɓti ɓaanda a ɓa ndu̱ barke ye nduki nu̱ke ɗya Yakhudeku ɓa. Mbu̱ wa gaɓ nu̱ she Magham ku guma da, khang ɓu̱ barke ni ka kha kikimndana!

¹³ Leendang nga ɓalarang ndu̱ tun nu̱ke tun Yakhudeku ɓa. Mbu̱ ba nga ke pude ɓu̱ Yesu nu̱ ɗa ru̱kki nga nu̱ she nu, nga da tlu̱nar ɓang ndu̱ zhaaji,

¹⁴ nga sa memu̱nara, shir wanang ka sa nduki ɓang Yakhudeku tu̱ shi zhiri, tu̱ sa ɓeenanku ku̱ gwa ɗanari.

¹⁵ Mbu̱ yang yaɓti wor gha qu̱nkya njiv somta chele ɓu̱ Magham ndu̱ nduki nu̱ larji, nu̱m ka shikya mbu̱ wa gaɓ tu̱ dlu̱ wor tu̱ka, ɗyen ɓu̱ ɗa ɓakya ndu̱ gwar nyifi mbe mu̱ti ɓa goma?

¹⁶ Mbu̱ buɗuki nu̱ njaki tu̱ ɓu̱r tolir nu̱ vu̱rki ye Magham ma vu̱rti nu̱ gumapaali mbu̱ ɗye ghutiku wa kha shakhshakh buɗukyang kap wa kha shakhshakh tu̱k. Ku̱me nang mbu dlu̱dlarsi qu̱fa wa kha shakhshakh, me bu̱nankwang tu̱k wa kha shakhshakh.

¹⁷ Mbu̱ke wa ku̱rta ɓeeni me bu̱n qu̱farku nu̱gha, yang tun nu̱ke ɗya qu̱far Zaitun nu̱ gar wa baatla nu tu̱ gu̱n ye man qu̱farang ma ɓu̱rti su̱yen ndu̱ ɓeeni me bu̱n qu̱farkwang. Tun a zu̱m kya boote ɓu̱ man qu̱farang nu̱ ku̱nshe dlu̱dlar sanang.

¹⁸ Ku̱me nang shi nu wakhti ye me bu̱n qu̱farku nu̱ ku̱rtaki nu̱gha ku nang ɓa. Mbu̱ tun wa shi wakhti, tun kor nang; tun kya ku̱s dlu̱dlarsi qu̱farang ɓa dlu̱dlarsi qu̱farang kya ku̱si nu.

¹⁹ To ka ɗu̱ma zu̱ran no za, “Ai, ku̱rta me bu̱nankwang nu̱gha ma ku̱ baatla nga nu̱ ve man qu̱farang.”

²⁰ Ɗyen wanang shwat! Yang ku̱rta wor ɓar ve man qu̱farang ku̱me song maito ɓaanda, to yang maito ɓa ka saki to zu̱m guma ndu̱ khar ve man qu̱farang. Ku̱me nang shi na me nggu̱nggal ɓa, to ka tu̱k kya sawa.

²¹ Mbu̱ Magham nu̱ njig me bu̱n qu̱farku nu̱ke wor ke me bu̱n qu̱far nu̱ gumapaali ve man qu̱farang ɓa, ɓu̱ njig to zum ɓa.

²² Chem ka na me mbarkir ɓu̱ Magham ndu̱ chingndi gha shanggu̱ɗang nu̱ka shiki ve nang. Wa kha shanggu̱ɗang ɗyine nduki nu̱ njimki, tu̱ yang wut mbarkir ɓaran yoro, mbu̱ ta zu̱m guma mbe mbarkir ɓaranang. Mbu̱ yang no zu̱m guma su̱ ɓa, ka ku̱rta ɓar tu̱k ve man qu̱farang.

²³ Mbu̱ Israileku tu̱k nu̱ zu̱m guma ndu̱ song maito ɓaanda ɓa, ka gaɓ tu̱ baatla wor nu̱ ve man qu̱farang, ku̱me Magham ka ɗu̱ma baatla wora.

²⁴ Tun nduki nu̱ke tun Yakhudeku ɓa, tun a khar ɓu̱ qu̱far Zaitun nu̱ gar nu̱ ɗa ku̱rtaki, tu̱ gu̱n ɓu̱rti yenda ndu̱ qu̱far Zaitun mbarkandi, aa nu̱ke nduk nu̱ka shi wanang ɓa ku̱me wa ngga yen ku. Yang nu̱ke Yakhudeku kya khar wa me bu̱n qu̱far Zaitun mbarkandang, ka kha ndolndol ku̱ Magham gaɓ ndu̱ me bu̱n qu̱far mbarkandang ye maa ɓaanda.

Magham wa ka Ɗaana Aaki

²⁵ Nyeezaku, nga shim wut nga ɗyi tukakandi nggur ye nu ku̱ zu̱n nu, ma ku̱ kha nu ma nu̱ gwaari ɗyin ɓa. Kaaku̱ɗakh memu̱nar ɓu̱ ɓeeni nduki nu̱ Israila nang ɗya ba me sarchi koɗomma, a bu kya sarchi nu̱ke khang ɓu̱ nduki nu̱ke ɗya Yakhudeku ɓa nu̱ke a ɓar she Magham ku̱ nyedli.

²⁶ Viɗ ɗyine nang Israila kap ka ɗana. Ba wa nu̱ke a nje bu̱laran za, “Nu̱ ɗanar ka ɗa vi Sikhiyona. Ka da zhangndi mburi Magham ɓar mbe zhikankirku ɓu̱ Nyagham.

²⁷ Nang ke alqawar ɓang ndu̱ wora, sarchi nu̱ke ngga daki solar ɓaanda ɓara.”

²⁸ Mbu̱ ye me ɓu̱ Labar Mbarkandang, Yakhudeku wa kha ma nu̱ kare ɓu̱ Magham ku̱me tunu. Yang mbu̱ ye me ɓu̱ daati, wa gwa ndolarku she Magham ku̱me zhikankirku ɓaanda.

²⁹ Jiwa Magham nu̱ka gaɓ men nu̱ gana mbe vu̱rti ɓaran ndu̱ qar ɓaran ɓa.

³⁰ Ba wa nu̱ke tun nu̱ke ɗya Yakhudeku ɓa, tun wa zhang mbu su̱qura Magham gha, yang leendang wa ɗaana nu ku̱me zhangndi mburi su̱qur ɓaanda.

³¹ Wanang tu̱k Yakhudeku wa kha ma nu̱ zhangndi mburi su̱qur Magham leendang. Ɗyi nang shi ma ku̱ ɗaana wora nu̱ ku̱nshe ɗaanar nu̱ Magham shiki ye nu.

³² Jiwa Magham wa gu̱n ndukiku gha kap tu̱ kha ma nu̱ zhangndi mburi su̱quran, ku̱me ku̱ ɗaana nji wor kap.

Khamndi Magham

³³ Ai, khang gu̱nar ndu̱ kirti kaɗari ɓu̱ Magham ndu̱ zu̱ndi ɓaran koɗokhsi shwat ɓa! Ɗyiku nu̱ka kumaki wa duk ku̱ nduk laɓ mban, njiv ɓaran wa duk du̱mbu̱r ku̱ nduk na!

³⁴ “Sar da ki zu̱nki ɗyin mbu̱ memu̱na Zhinkir gwaanja na? Sar da ki vu̱rki sawari yenda?

³⁵ Sar da ki vu̱rki ɗyi nggur ye Magham nu̱ ku̱ski ku̱ Magham gaɓ si yenda?”

³⁶ Jiwa aa nu̱m a vi she nda, nu̱ ku̱nshe nda, kom ma yir she nda tu̱k. Bu ku̱ zhaaji kha Magham koɗokhsi ɓa. Amin.