Romeku 10 - Mewar Alqawarang

¹ Nyeezaku, ɗyi nang shimki guma ndu̱ aa nu̱m kap chin ke ku̱ Israila gwa ɗanari. Nang ke barar ɓang ye Magham nu̱ke nga shiran ku̱me wora.

² Nga zu̱n ɗya nu̱ memu̱nar zhiri ghaari ghai ye Magham ku, yang a shiran ku waare zu̱ndi zhire ni.

³ Nu̱ke nu̱ zu̱n njiv dambi nu̱ ɗa viki she Magham ku ɓa, tu̱ yang sa njiv gwar khar waare solar ɓaanda zum, tu̱ nang sa wor tu̱ zhang njiv dambi ɓu̱ Magham gha.

⁴ Masiya ke lauɗar su̱ Bibitang, ma ku̱ aaki nu̱ maitaki nda kha ma nu̱ dambu gume Magham.

Ɗana ɗya ɓu̱ Aaki

⁵ Musa wa shi bu̱lar ɗyine gwar khar waare sola nu̱ ku̱nshe mbu Bibitang. Wa zu̱ za, “Njif nu̱ mbuki Bibitiku nang ka kha ndu̱ nyifi nu̱ ku̱nshe wora.”

⁶ Yang wonji ɗyi nu̱ Bu̱lar ɓalar ɓu̱ Magham zu̱ki ɗyine gwar khar waare sola nu̱ ku̱nshe maito, “Zu̱ na mbu̱ memu̱na no za, ‘Ki ka dlaki nu̱ viɗa?’ ” (Ma ku̱ ɗa zhur ndu̱ Masiya).

⁷ “Bai tu̱k no za, ‘Ki ka zhurki nu̱ gargha mbu̱ maa vu̱ghaiya?’ ” (Mban za ma ku̱ ɗa ji ndu̱ Masiya ɓar mbe mu̱ti.)

⁸ Ɗyi nu̱ke bu̱lar Ɓalar ɓu̱ Magham a zu̱ranang chin ke, “Ɓalar ɓu̱ Magham a nje bing ndu̱ to, a nje mbu̱ me ro, kom ndu̱ mbu̱ memu̱na ro.” Ɓalar nang chin ke ɓalar maito nu̱ke chem a waazu ni. Za,

⁹ mbu̱ ta saida ndu̱ me ro no za, “Yesu ke Zhinerem gwaanji.” To maita tu̱k mbu̱ memu̱na ro nu̱ ɗyine Magham wa ji ndu̱ chin ɓar mbe mu̱ti, to ka ɗana.

¹⁰ Jiwa nduk ka maita mbu̱ memu̱naran ma gwa khar waare sola gume Magham, yang tu̱k nduk ka saida ndu̱ men tu̱ gwa ɗanari.

¹¹ Ba wa nu̱ Bu̱lar Ɓalar ɓu̱ Magham zu̱ki za, “Kap njif nu̱ maitaki nda ɓu̱ tu̱k kawa ɓa.”

¹² Jiwa nu̱ shakh chele ɓu̱ Yakhudeku ndu̱ nduki nu̱ke ɗya Yakhudeku ɓa nu̱ gha ɓa. Zhinkir gwaanji nang, ke Zhinkir gwaanji ɓu̱ aaki, chin ke nu̱ vu̱r barke khangndi ye kap nduki nu̱ ka ghoki yenda.

¹³ Ba wa nu̱ Bu̱lar Ɓalar ɓu̱ Magham zu̱ki tu̱k za, “Kap njif nu̱ qaki dlu̱m Zhinkir gwaanji ka gwa ɗanari.”

¹⁴ Yang wor ka qa njif nu̱ke nu̱ wor maita nda ku ɓa ma ku̱ shaata wor ɗa kikimndana? Ka shi kikimndi tu̱ wor maita njif nu̱ke nu̱ wor tu̱k labar ɓaran ɓa nda na? Yang ka tu̱k ku kikimndana, mbu̱ nduk a nje nu̱ke ka shiki waazu ye wor ɓa?

¹⁵ Nu̱ waazu kwang ka shi waazwang kikimndana, mbu̱ nu̱ ru̱k wor ɓa? Ba wa nu̱ke a nje bu̱laran za, “Khu̱dli ɓu̱ nduki nu̱ ɗa ɓaki ndu̱ Labar Mbarkandang ɗya ɗyi mbarkandi maɗyi!”

¹⁶ Yang nduki nu̱ Israila kap dlu̱ki Labar Mbarkandang ɓa. Ba wa nu̱ Yishaya zu̱ki za, “Zhinkir gwaanji, ki maitaki labar nyem zu̱kyang na?”

¹⁷ Ku̱me nang, maito ka ɓa nu̱ ku̱nshe tu̱kti labarang, yang nduk ka tu̱k labar nang nu̱ ku̱nshe ɓalar ɓu̱ Masiya.

¹⁸ Yang bu shi nga zhamndi, “Nu̱ tu̱k labarang ku de?” Wa tu̱k ku shwat, Jiwa Bu̱lar Ɓalar ɓu̱ Magham wa zu̱ za, “Su̱ qur wor wa ɗu̱ mbu̱ larji kap, ɓalarku ɓaanda wa khu̱l aa fu̱n mbu̱ larji.”

¹⁹ Bu zham nga nu̱ si tu̱k. “Woɗye ɗa, Israila nu̱ da mban ku ɓa mu?” Gumapaali, Musa wa zu̱ za, “Ngga sa nu tun shi zhiri ɓu̱ nduki nu̱ke ɗya dlar maa ku ɓa, ngga sa tu̱ dlar maa ɓu̱ nduki nu̱ke nu̱ zu̱n tun ku ɓa sa nu tun shi shokhna.”

²⁰ Yang Yishaya wa zu̱ ɓalar ɓu̱ Magham sawa su̱ ɓa nu̱ zu̱ki za, “Nduki nu̱ke nu̱ kaala nga ku ɓa, wor gwaki nga. Nga wut vara ye nduki nu̱ke nu̱ zham maa nu̱ke nga su̱ ku ɓa.”

²¹ Yang ɗyine ɓalar ɓu̱ Israila, Magham wa zu̱ tu̱k za, “Nga piɗi nga zoɓa khara nga khuɗ nduki nu̱ nggarvarku ndu̱ nu̱ zhangndi tu̱kti maari.”