Romeku 1 - Mewar Alqawarang

Nggarsan

¹ Lagarkati nang a vi she Bulus, maavi ɓu̱ Masiya Yesu, nu̱ qaki nda ma ku̱ kha ma pude ɓu̱ Yesu, tu̱ waka nda nu̱ gha ma ku̱ wopa Labar mbarkandi ɓu̱ Magham.

² Magham wa shi alqawar Labar mbarkandi nang zhu tang nu̱ ku̱nshe annabiku ɓaran, ba wa nu̱ke a nje bu̱laran mbu̱ bu̱lar Ɓalar ɓu̱ Magham shakhshakhndi.

³ Yang Labar Mbarkandang a shikya ɓalar ɓu̱ Yi ɓaran Masiya Yesu Zhinerem gwaanji. Ye khar ɓaran nduku, mbu̱ manva a vi me sham ɓu̱ Dauda.

⁴ Yang ye khar ɓaran Jiimbi nu̱ khar shakhshakh nu̱ me Maghamndi ɓaran wa wut Yesu Masiya ndu̱ zalale maɗyikandi za shwat ɗya Yi ɓu̱ Magham nu̱ ku̱nshe jiiri ɓaran mbe mu̱ti.

⁵ Barke ɓu̱ Yesu Masiya ndu̱ dlu̱man saki chem gwa mu̱nkir tu̱ qa rem ma khami ma pudeku ɓaran, ma ku̱ qa mi nduki nu̱ mbu̱ ghaiku kap ku̱ maita tu̱ mbu zu̱r ɓaranku.

⁶ Tun a mban kap, tun nu̱ Magham qaki nu tun kha ma ɓu̱ Yesu Masiya.

⁷ Nga bu̱laran ye nu kap ɓaanu nu̱ke tun a Roma, tun nu̱ke Magham a ndolaran, tu̱ qa nu ma ku̱ kha nu ma khalandi ɓaran. Ku̱ mu̱nkir ndu̱ qaandi memu̱nar she Magham Zhinerem ndu̱ Zhinerem gwaanji Yesu Masiya kha gha su̱yen ndu̱ tunu.

Barar Wuti Kunari

⁸ Gumapaali nga kuna Maghamndi ɓanga nu̱ ku̱nshe Yesu Masiya ku̱me tun kap, nu̱ke labar maito ɓaanu wa ɗu̱ aa fu̱n mbu̱ larji.

⁹ Magham nu̱ke nga tlu̱nar yenda ndu̱ memu̱nara da nu̱ ku̱nshe wopar Labar mbarkandi ɓu̱ Yi ɓaran, ke saidu ɓanga nu̱ ɗyine nang laada kwaaronu

¹⁰ aakochi mbu̱ barar ɓang ɓa. Nga khuti nda nu̱ ɗyine, mbu̱ ɗya shimndi ɓaran, aa kikimndi gwa nga tang a ɓa she nu.

¹¹ Jiwa nga shim na nu maɗyi, ma ku̱ vu̱r nga mu̱nkir nggur nu̱ mbe jiimba nu̱ke ka paki du̱mbu̱r ye nu.

¹² Shimndi ɓang chin ke, ku̱ pa mi du̱mbu̱r ye yen, tang pa du̱mbu̱r ye nu nu̱ ku̱nshe maito ɓanga, tun pa du̱mbu̱r ya ndu̱ ɓaanu tu̱k.

¹³ Nyeezaku, nga shim zu̱n nu nu̱ ɗyine ngaa shim ɓar she nu sar khang, yang ma ɓar meeni wa nggu̱tli nga shir wanang. Ɗyi nu̱ saki tang shim ɓarang chin ke, ku̱ gwa nga tang wopa Labar Mbarkandang chele ɓaanu tu̱ nduki maita, ba wa nang shiki chele nduki nu̱ke ɗya Yakhudeku ɓa.

¹⁴ Taɗar ɓu̱ nduki a nje ɗyina, Yakhudeku ndu̱ nduki nu̱ke ɗya Yakhudeku ɓa, nu̱ zu̱ndi ku ndu̱ nu̱ song zu̱ndi ku.

¹⁵ Nang ke ɗyi nu̱ saki tang wopa Labar Mbarkandang ye nu, tun nduki nu̱ Roma.

Zalale ɓu̱ Labar Mbarkandang

¹⁶ Labar Mbarkandang ɗya ɗye kawa sha ɓa, ku̱me chin ke zalale ɓu̱ Magham nu̱ka vu̱rki ɗanar ye anyi nduk nu̱ maitaki, Yakhudeku ke nu̱ gumapaali, kom ndu̱ nduki nu̱ke ɗya Yakhudeku ɓa.

¹⁷ Jiwa chin wutki dambi na viki she Magham, yang nduk ka gwa dambi nang nu̱ ku̱nshe maitaran vu̱ nggarsan ma yir she lauɗarsan. Ba wa nu̱ke a nje bu̱laran za, “Nu̱ dambi, ka ɗana mbe maito ɓaran.”

Solar ɓu̱ Nduki Kap

¹⁸ Jiwa a wut shokhnar ɓu̱ Magham mbu̱ viɗi ɗyine song sawar Magham, kom ndu̱ tlu̱nar mu̱narku ɓu̱ nduki nu̱ka zhangki zhire gha ku̱me tlu̱nar malkandi ɓaanda.

¹⁹ Jiwa wa zu̱n ɗyi nu̱ shipaki ku̱ nduk zu̱n ɗyine Magham ku, ku̱me Magham wa wut ye wora ye dalangi.

²⁰ Aa nu̱ke me Maghamndi ɓu̱ Magham ndu̱ zalale ɓaran nu̱ke nu̱ka shi woɗa ɓa ɗya ɗyi nu̱ke nu̱ka shi ku̱ nduk na ndu̱ yiti ɓa. Yang ma nu̱ shiki larji wa wut ɗyiku nang ye dalangi, nduk ka da mbu̱ ɗyiku nang nu̱ ku̱nshe ɗyiku nu̱ du̱ngki. Ku̱me nang ɓala kha nduk ɓa!

²¹ Wa zu̱n Magham ku, yang kap ndu̱ nang nu̱ vu̱r zhaaji yenda ye khar ɓaran chin Magham ɓa, yang nu̱ kuna nda ku zum ɓa. Me ɓu̱ nang, tu̱ kwaari ɓaanda kha bam, memu̱na wor nu̱ke nu̱ka da mbu̱ tun ɓa ndang tu̱ kha zhum.

²² Aa nu̱ke a zu̱ran ku za wor ghu̱rtan, yang nggu̱bu̱ngan ku.

²³ Tu̱ zhang ghar ghai ye Magham nu̱ zhaaji nu̱ke nu̱ka mu̱t ɓa, tu̱ ki ghar ghai ye mu̱lu̱mku nu̱ shiki mbu̱ shipar ɓu̱ nduku nu̱ka mu̱tki. Kom ndu̱ shipar ku ɓu̱ ɗyikhtiku, ndu̱ ɗye nggarku, ndu̱ pooni su̱tiku ndu̱ kashangku.

²⁴ Ku̱me nang tu̱ Magham yaɓ wor gha tu̱ ki shim ɗyi malkandi ku zum zum mbu̱ memu̱na wora, tu̱ ka shi boote ndu̱ var wor a shi ɗye kawar ku ndu̱ yen.

²⁵ Wa njig zhire ɓu̱ Magham ku tu̱ dlu̱kya wollo. A ghar ghai ndu̱ tlu̱nar ye ɗyiku nu̱ Magham du̱ngki, me ɓu̱ chin nu̱ du̱ngki ɗyikwang, yang chin shipaki ku̱ kuna mi nda koɗokhsi ɓa. Amin.

²⁶ Ku̱me nang tu̱ Magham yaɓ wor gha tu̱ ka shim shir ɗye kawarku bam bam. Tu̱ nusuku ɓaanda nggoɗ tu̱ njig qaandi ndu̱ khuzuku wa nu̱ Magham du̱ngki ku̱ nduk shi, tu̱ ka qan ndu̱ yen ve njiv nu̱ke nu̱ shipa ɓa.

²⁷ Wanang tu̱k, nu̱ zawar shiki du̱mbu̱r chele ɓaanda, tu̱ khuzuku njig qaandi ndu̱ nusuku ba wa nu̱ Magham du̱ngki ku̱ shi ku. Tu̱ khusku ndu̱ khusku ku̱s tlu̱na ɗye kawar chele ɓaanda, nang ke ɗyi nu̱ saki tu̱ ɗa dut kumar nu̱ shipaki tlu̱nar malkandi ye ɗyin wora.

²⁸ Nu̱ke wa zhang zu̱n Magham ku gha, tu̱ Magham njig wora tu̱ ku̱s kor ɗyi bamndiku tu̱ ka shi ɗyi nu̱ke nu̱ shipa ku ɓa.

²⁹ A nje ku nyeedlan ndu̱ ɗyi galkandi, ndu̱ mu̱nari, ndu̱ melakh, ndu̱ ɗye shir malkandi ku. Nyeedlan ku ndu̱ zhiri malkandi, ndu̱ tlaghar mu̱ti, ndu̱ dakhlari, ndu̱ nyiglar maa, ndu̱ ɗyooti mbu. Ɗya nu̱ ndaana ku,

³⁰ nu̱ khu̱ɓti nduki, nduki nu̱ zhangki Magham gha, nu̱ pu̱zi ku bam bam. Kom ndu̱ nu̱ gwaari ɗyin ku, nu̱ khamndi ɗyin wora, nu̱ shimndi mu̱na nduki, nu̱ zhangndi tu̱kti maari ku ye man wor ndu̱ zhin wora.

³¹ Nu̱ nggarvar ku, ndu̱ nu̱ zhangndi nyedli alqawarku, ndu̱ nu̱ song ndolar ku, ndu̱ nu̱ song nar zhiyaye ku.

³² Wa zu̱n bibitiku ɓu̱ Magham ku nu̱ ɗyine nu̱ ɗye shir malkandiku nang mu̱ti shipaki wora, yang nu̱ ching nu̱ ɗyine shir ɗyi nu̱ nggu̱tlki ku nang ɗyenda ɓa. Tu̱ ka ji su̱ nduki nu̱ke a tlu̱na ɗyi malkandi ku nang.