Matta 3 - Mewar Alqawarang

Waazu ɓu̱ Yokhana nu̱ Baptisme

¹ Ba mbu̱ qaandiku naandang, tu̱ Yokhana nu̱ baptisme a vi a waazu mbu̱ gaari nu̱ke a Yakhudiya,

² a zu̱ran za, “Nggoɗ ma tun njig solar ɓaanu, ku̱me kwaaɗar viɗi a shi bing.”

³ Nang ke njif nu̱ annabi Yishaya shiki ɓalar ɓaran za, “Su̱ qur njif nggur a wopar mbu̱ gaari a zu̱ran za, ‘Daasa ma njiv peetar ye Zhinerem gwaanji, kwaɗa ma yiti njivkwang yenda nu̱ gha kwatu̱ra!’ ”

⁴ Yang Yokhana sakya lukti nu̱ shiki ndu̱ ghosi dliimokh, ɗye gu̱ndi mbu̱ varanang ɗya ku̱zu̱m, ɗye zu̱mndi ɓaran ɗya mbeega ndu̱ ɗyim ɗyiri.

⁵ Tu̱ nduki nu̱ Urshalima ndu̱ Yakhudiya kap, ndu̱ ghaiku nu̱ke a me Gaawu Urdun a ɓa ku she nda

⁶ a zu̱ solar ɓaanda, tu̱ ku̱s baptisme ye wora mbu̱ Gaawu Urdunang.

⁷ Yang nu̱ Yokhana naki Pariseku ndu̱ Sadukeku khang a ɓar she nda ma ku̱ shi baptisme ye wora, tu̱ ze wor za, “Tun ye ghu̱ɓtiku! Kya wuuki nu za ɗa nu shokhnar ɓu̱ Magham nu̱ke a ɓara na?

⁸ Shi ma tlu̱nar nu̱ke ka wuɗki za tun wa nggoɗi.

⁹ Taman nu mbu memu̱na nu za, ‘Yibram ke zhunonu ɓa,’ ku̱me nga zu̱ran ye nu Magham ka ɗu̱ma shi qusonggi ye Yibram ndu̱ ndogdiku nang.

¹⁰ Aa leendang wa kar wa du̱ng me shino nu̱ ve su̱ qu̱farkwang, aa nyi qu̱fa nu̱ zhangki khar woi mbarkandi gha, ka ku̱m nda nu̱ gha tu̱ mbuk nu̱ ɓai.”

¹¹ Ngaa baptisme ye nu ndu̱ ɗyim ma saidu nggooti njigti solar ɓaanu, Yang gaanja njif nu̱ dukki nga gwaari a ɓari, nu̱ke aa paghamndi ɓaran nang khu̱l ku̱ fed nga nu̱ gha ɓa. Chin ka ɓa shiki baptisme ye nu ndu̱ Jiimbi shakhshakhndi ndu̱ ɓai.

¹² Ɗye zhaari ɓaran a nje kha nda, ka zhar ye gur ɓaran, tu̱ khi ye gura nu̱ mbu̱ gatle ɓaran, tu̱ yang va ɓiɓyang nu̱gha ndu̱ ɓai nu̱ke nu̱ka shi piita ɓa.

Wa shi Baptisme ye Yesu

¹³ Ye sarchi nang, tu̱ Yesu a ji Galili tu̱ ɗa ɓa Gaawu Urdun she Yokhana ma ku̱ shi baptisme yenda.

¹⁴ Tu̱ Yokhana shim nggu̱tli nda tu̱ ze nda za, “Nga nu̱ke ngaa gang shi na baptisme ya, yang to ɗa ɓa sha tu̱k?”

¹⁵ Tu̱ yang Yesu tlogha yenda za, “Njig ku̱ kha ma wanang leendang, ku̱me wa shi mbari shem aa nyi tun nu̱ke ɗya shimndi ɓu̱ Magham.” Kom tu̱ Yokhana tlogha yenda.

¹⁶ Nu̱ shiki baptisme ye Yesu, ba nu̱ viki ɓar mbu̱ ɗyimang, tu̱ maa viɗ qu̱ni, tu̱ na Jiimbi ɓu̱ Magham a shurti nu̱ ɗyine nda wa shipar mboole.

¹⁷ Tu̱ ɓalar a vi viɗi a zu̱ran za, “Nang ke woi ɓanga ndolakandi, memu̱nara mu̱n ndu̱ chin maɗyi.”