Luka 5 - Mewar Alqawarang

Yesu wa Qa Pudeku ɓaran nu̱ Gumapaali

¹ Sarchi ngguri Yesu chingndan gha me ɗyim chitndi nu̱ Janisarat. Tu̱ ndukiku ku̱s ba songndi nu̱ she nda ma tu̱k ɓalar ɓu̱ Magham.

² Tu̱ Yesu na du̱mbu̱lku rap du̱ngdan gha me ɗyim chitndang, yang nu̱ ku̱si yurvikwang wa vi ɓarku mban, a shiɓ lemku ɓaanda nu̱ gha.

³ Tu̱ Yesu vi nu̱ mbu̱ du̱mbu̱l da chele ni, nu̱ke ɗya ɓu̱ Siman. Tu̱ Yesu khuti nda za ku̱ tu̱pa du̱mbu̱lang ɓar me gu̱mndang ku̱ song si nu̱ mbu̱ ɗyimang koɗom. Nu̱ khaki gha mbu̱ du̱mbu̱lang tu̱ anya shogar ye ndukiku.

⁴ Nu̱ woɗaki shogarang tu̱ ze Siman za, “Shoto tu̱pa du̱mbu̱lang nu̱ ye maa nu̱ke kiri tun zu̱ lemang tun ka ku̱s yurvi.”

⁵ Tu̱ Siman tlogha yenda za, “Chem wa za bonye mbu̱ virkir nang yang nyem gwa chem ku̱s aa nu̱m ɓa. Yang nu̱ke to zu̱kyang ngga zu̱ lemang.”

⁶ Nu̱ zu̱ki lemang ku tu̱ ku̱s yurviku khang maɗyi tu̱ lemang nggasi ɓyakhti.

⁷ Nu̱ naki wanang tu̱ qa nyeezan nu̱ke a mbu̱ du̱mbu̱l dandang ku̱me ku̱ shaata wora, na ɓa ki ku tu̱ du̱mbu̱l rap nyel ndu̱ yurvyang tu̱ du̱mbu̱lkwang nggaasi khiiri nu̱ mbu̱ ɗyimang ku̱me taɗar ɓu̱ yurvyang.

⁸ Nu̱ Siman Biturus naki ɗyi nu̱ shikyang tu̱ kurum gha gume Yesu za, “Njig tu̱ nga, Zhinerem gwaanji, nga nu̱ sola.”

⁹ Biturus ndu̱ nyeezankwang kap tu̱ shi lazham ku ku̱me khang ɓu̱ yurvi nu̱ ku̱skikwang.

¹⁰ Kap ndu̱ Yaqub ndu̱ Yokhana qusonggi ɓu̱ Zabadi nu̱ke a dumndiku su̱yen ndu̱ Simanang. Tu̱ Yesu ze Siman za, “Tu̱k na sawa ɓa, leendang to ka kha ma nu̱ ɓar ndu̱ nduki.”

¹¹ Tu̱ du̱ng du̱mbu̱lkwang gha me gu̱mndang tu̱ njig aa nu̱m ndu̱ aa nu̱m ku tu̱ mbu gaanje Yesu.

Yesu wa Shana Khuski nggur nu̱ Khaati gwaanji

¹² Sarchi ngguri Yesu wa ɗu̱ mbu ghai ngguri, tu̱ gwa njif nggur nu̱ke khaati gwaanji wa zu̱m du̱mbu̱r ɓaran. Nu̱ njifang naki Yesu, ta ɓa tu̱ qan gha gume nda. Tu̱ khuti nda za, “Da gwaanji mbu̱ ta tlogha, to shaana nga.”

¹³ Tu̱ Yesu zoɓa kharan tu̱ su̱ɓa nda tu̱ zu̱ za, “Nga tlogha, shono!” Fan ndu̱ fan tu̱ khaati gwaanjang ngga njifang gha.

¹⁴ Tu̱ Yesu wuri nda za, “Zu̱ na ye aaki ɓa, yang ɗu to ɗa wuɗ va ye kuruku. To ɗa shi vu̱rti ku̱me khana shakhshakh, wa nu̱ annabi Musa zu̱ki za ku̱ nduk shi ku̱me wuɗ na ye nduki nu̱ ɗyine ta shaana.”

¹⁵ Kap ndu̱ wanang labar ɓu̱ Yesu ba viri nu̱ aa fu̱n, ndukiku khang ba tabar ma tu̱kti nda a gang shaanari me khaatiku nu̱ke a ve wora.

¹⁶ Yang Yesu wa ka ɗu̱ gar ma barari chin ɗyenda.

Yesu wa Shaana nu̱ Khaati Zurɗari

¹⁷ Sarchi ngguri Yesu a shogar ye nduki, tu̱ Pariseku su̱yen ndu̱ nu̱ zu̱ndi Taurete ku a ɓa ku, a vi mbu̱ gureku Galili ndu̱ Yakhudiya, kom ndu̱ Urshalima, kharan ku a tu̱k shogarang. Zalale ɓu̱ Zhinerem gwaanji a nje su̱yen ndu̱ chin ma shaana nu̱ khaatiku.

¹⁸ A nje ku kharan gha tu̱ nduki a ɓa ndu̱ njif nggur nu̱ khaati zurɗari qaandan ɗyine ku̱rbuk. A bonye viri ndu̱ chin ku mbu̱ raftang ku̱me ɗu̱ nda ndu̱ chin gume Yesu.

¹⁹ Yang nu̱ gwa njiva ku ɓa ku̱me khang ɓu̱ nduki. Nu̱ naki maa vi nje ɓa, tu̱ dlan viɗi ku ɗyine kibang tu̱ qu̱n ɗyin kibang kom tu̱ ɗa zhurti nda nu̱ gume Yesu ɗyine ku̱rbukang chele ndukyang.

²⁰ Nu̱ Yesu naki maito ɓaandang tu̱ ze njif qankandang za, “Khusku, ta gwa yaapar solari.”

²¹ Ni nu̱ zu̱ndi Taurete ku ndu̱ Parisekwang shiki kwaari mbu̱ memu̱na wora. Tu̱ nggaasi zu̱ran ye yen ku za, “Na shwat ɗya kiya nu̱ kya ɓalar ndu̱mndi ye Magham nangang? Ki ka ɗu̱ma ki yaapa sola? Kope Magham ɗyenda.”

²² Yang nu̱ke Yesu zu̱nki kwaari ɓa nda, tu̱ ze wor za, “Nu̱m saki tun a pooni kwaari nangang,

²³ Nyi dukki nu̱ ndolndola? Zu̱r za wa yaapa solar ɓa yor mu. Yang, ‘Ju to shi yir mu?’

²⁴ Yang ku̱me nga shim ku̱ zu̱n nu̱ zalalya nje kha Yi ɓu̱ nduku ma yaapa sola mbu̱ larji.” Tu̱ ze njif zurɗakandang za, “Nga zu̱ran yoro, ju, to daa ku̱rbukang to ɗu̱ va kaari.”

²⁵ Fan ndu̱ fan tu̱ njifang ji nu̱ viɗi mbu̱ yiti wor tu̱ da ku̱rbuk ɓaran tu̱ ɗu̱ kaari a gor dlu̱m Magham.

²⁶ Tu̱ kap ɓaanda shi lazham ku maɗyi su̱yen ndu̱ tu̱kti sawari tu̱ gor dlu̱m Magham ku tu̱ ku̱s zu̱ran ku za, “Meeni chem wa na ɗye lazham.”

Yesu wa Qa Lawi (Matta)

²⁷ Gaandan, tu̱ Yesu vi ɓar mbu̱ ghayang, tu̱ gama ndu̱ njif nggur nu̱ dlu̱r zhaanggali dlu̱man za Lawi, kharan gha ye maa dlu̱r zhaanggali. Tu̱ Yesu ze nda za, “A mburi nga.”

²⁸ Tu̱ Lawi njig ɗyi nu̱ke a shiranang kap, tu̱ ji ta mburi nda.

²⁹ Tu̱ Lawi ngga zu̱mndi gwaanji ye Yesu nu̱ she nda kaari, su̱yen ndu̱ nu̱ dlu̱ zhaanggal ku khang ndu̱ ɓeena nduki tu̱ ku̱s zu̱m ɗye zu̱mnda ku su̱yen ndu̱ wora.

³⁰ Yang Pariseku ndu̱ Maalu̱mku ɓaanda kap ndu̱ nu̱ zu̱ndi Taurete kwang, tu̱ nggaasi ruru ku. Tu̱ zu̱ ye nu̱ mburi Yesu kwang za, “Nu̱m saki tun a zu̱mndi ndu̱ zari su̱yen ndu̱ nu̱ dlu̱r zhaanggal ku ndu̱ nu̱ solarkwang na?”

³¹ Tu̱ Yesu tlogha ye wor za, “Njif nu̱ke khat ve nda ɓa ɓu̱ laɓ nu̱ kuzhi ɓa, kope njif nu̱ke khaatan.

³² Na nga ɓa ma qa nu̱ jeembu ɓa, nga ɓa ku̱me nu̱ solarku, ku̱ nggoɗi, ku̱ njig solarku ɓaanda.”

Zhamndi ɗyine Shir Zhumti

³³ Tu̱ gaɓ tu̱ ze Yesu ku za, “Nu̱ mbu Yokhana kwa wa ka shi zhumti ku aa nyi sarchi su̱yen ndu̱ barari. Nu̱ mbu Parisekwang wa ka shi wanang tu̱k, yang nu̱ mburor ku nu̱ ka shi zhumti ku ɓa ba a zu̱mndi ku ndu̱ zari sot.”

³⁴ Tu̱ Yesu tlogha ye wor za, “Tun a tamandan tun ka ɗu̱ma nggu̱tl rafti nu̱ zhin ɓu̱rti ndu̱ ɗye zu̱mndi, mbu̱ke a su̱yen ndu̱ nu̱ zhin ɓu̱rtang mu?

³⁵ Sarchi a nje a ɓari nu̱ke ka ɓa da nu̱ zhin ɓu̱rtang ɓara tu̱ njig wora, kom qu̱rsan ka ɓa shi zhumti ku.”

³⁶ Tu̱ Yesu zu̱ nggar mbu̱ ɓalar ye wor za, “Nduk nje ka dlaki ma ngguri ve kapar ɓaran mewakandi tu̱ gontan ve kapar ɓaran gu̱makandi ɓa. Mbu̱ke wa shi wanang, wa ɓyakh kapar ɓaran Mewakandang nu̱gha yang gontarang ɓu̱ shi mbar ye kapar gu̱makandang ɓa.

³⁷ Wanang tu̱k nduk nu̱ka khi ɗyim anap mewakandi nu̱ mbu̱ kidlingndi ku̱zu̱mndi gu̱makandi ɓa. Mbu wa shi wanang, kidlingndang ka wudli tu̱ ɗyim anapang mbu̱ɗi wonji kidlingndang wa su̱bu̱ri.

³⁸ Ɗyim anap mewakandi ka zu̱n mbu̱ kidlingndi ku̱zu̱mndi mewakandi.

³⁹ Nduk ɓu̱ shim ɗyim anap mewakandi gaanje wa za gu̱makandi ɓa. Ku̱me ka zu̱ za, ‘Gu̱makandang wa duk nu̱ mu̱ndi.’ ”