Luka 3 - Mewar Alqawarang

Waazu ɓu̱ Yokhana nu̱ Baptisme

¹ Sarchi nu̱ke Nggomne gwaanji (Kaisar) Tiberiya khu̱lki sonyi gwanggu̱m qurmun a kwaaɗari, Nggomna Puntus Bilatus kya kwaaɗar ɗyine Yakhudiya. Kuji Khiridus a kwaaɗar Galili; khachin Filibus a kwaaɗar Ituriya ndu̱ Tarakunitas; Lisaniyas a kwaaɗar Abiliya.

² Yang Khanana ndu̱ Kayafa ke gorkir ɓu̱ kuruku. Ye sarchi ni tu̱ Magham shi ɓalar ye Yokhana yi ɓu̱ Zakariya gar.

³ (Tu̱ Yokhana baara me Gaawu Urdun nang ɓar kap) a waazu za ku̱ ndukya nggoɗi tu̱ shi baptisme gwar yaapar solarku.

⁴ Wa nu̱ke a nje bu̱laran mbu̱ lagarkati ɓu̱ Annabi Yishaya, “Su̱ qur njif ngguri gar a qari za, ‘Daasa ma maa peetar ye Zhinerem gwaanji, ɗu̱r ma njiva nu̱ gha yenda.

⁵ Paasa ma aa nyi zoɗa nu̱ gha, wul ma aa nyi dleng ndu̱ ɗawar nu̱gha, ɗu̱r ma ɗyiku nggoɓkandi nu̱ gha shwarat. Kwaɗa ma njiv malkandi nu̱ gha tu̱ shi mbari.

⁶ Nduk kap ka na ɗanar ɓu̱ Magham.’ ”

⁷ Ku̱me nang, tu̱ Yokhana ze tabar nduki nu̱ ɗa ɓa ki ma ku̱ shi baptisme ye wora za, “Tun pooni khuskarku! Ki wuuki nu za ɗa nu shokhnar ɓu̱ Magham nu̱ kya ɓara na?

⁸ Tlu̱na ma ɗyiku nu̱ke ka wuɗki za tun wa nggoɗi. Anya nu zu̱ran za, ‘Ai Yibram ke zhinerem ɓa.’ Ku̱me nga zu̱ran ye nu, Magham ka ɗu̱ma tu̱ gaɓ nu̱ ndogdiku nang ma qusonggi ɓu̱ Yibram.

⁹ Aa ye leendangang, wa du̱ng me shuuvi nu̱ ve dlu̱dlarsi su̱ qu̱far kwang. Aa nyi qu̱far nu̱ke nu̱ kha qusonggi mbarkandi ɓa, ka ku̱m nu̱ gha tu̱ mbuk nu̱ ɓai.”

¹⁰ Yang tu̱ tabar ndukyang zham nda za, “Chem ka shi kya nu̱ma?”

¹¹ Tu̱ Yokhana tlogha ye wor za, “Njif nu̱ke luktiku a nje kha nda rap, ku̱ vu̱r dandang ye mu̱dlen nu̱ kya nje kha nda ɓa, njif nu̱ke ɗye zu̱mndi a nje kha nda tu̱ shaata mu̱dlen si.”

¹² Tu̱ nu̱ dlu̱r zhaanggal ku a ɓa ma ku̱ shi baptisme ye wora, tu̱ zham nda ku za, “Maalu̱m, chem ka shi kya nu̱ma?”

¹³ Tu̱ tlogha ye wor za, “Ka dlu̱ nu dukti ɗyi nu̱ saki nu ma dlu̱ran ɓa.”

¹⁴ Tu̱ sojeku tu̱k zham nda za, “Chem ɗa, shem kya nu̱ma?” Tu̱ tlogha ye wor za, “Lawa nu mu̱zhin ɓar kha nduk du̱mbu̱r du̱mbu̱r ɓa, yang shi nu kwatame nu̱ ɗyine nduku ku̱me wa zhang vu̱rtan ye nu gha ɓa, gu̱n ma memu̱na nu ndu̱ mu̱zhindi chere ɓaanu.”

¹⁵ Yang nu̱ke ndukyang a ku̱rsa ɓar ɓu̱ Masiya ku, tu̱ taman ku mbu̱ memu̱na wor za bai Yokhana ke Masiya ɗo gom.

¹⁶ Tu̱ Yokhana ze wor kap za, “Ɓang baptismyang ngaa shiran ye nu ndu̱ ɗyim, yang njif nggur nu̱ dukki nga gwaari a nje a ɓari. Njifang, aa zo paghamndi ɓaran nang gama kwatlan yenda nu̱ gha ɓa. Ka ɓa shi baptisme ye nu ndu̱ Jiimbi shakhshakhndi ndu̱ ɓai.

¹⁷ Du̱ɓ zhaari ɓaran a kha nda, ka zhar ye gur ɓaran nu̱gha, tu̱ taba ye gura nu̱ mbu̱ gatle. Yang ka va ɓiɓyang nu̱gha ndu̱ ɓai nu̱ke nu̱ka shi piita ɓa.”

¹⁸ Ndu̱ poona ɓalarku nangang khang, tu̱ Yokhana shi waazu labar mbarkandang ye ndukyang.

¹⁹ Yang Yokhana wa shi wuuri ye Khiridus nu̱ kwaaɗar Galili ku̱me kuji Khiridus wa ɓu̱r Khirudiya nokhzi khachin, wonji wa shi ɗyiku galkandi khang.

²⁰ Tu̱ Khiridus shaata solar ɓaran nu̱ si nu̱ke khiiki Yokhana gha zhaaru̱m.

Wa Shi Baptisme ye Yesu

²¹ Qu̱rse shir baptisme ye ndukyang kap, tu̱ shi ye Yesu tu̱k, yang nu̱ke Yesu a barari, tu̱ maa viɗi wa qu̱ni.

²² Tu̱ Jiimbi ɓu̱ Magham a shur nu̱ ɗyine nda wa mboole. Tu̱ ɓalar a vi viɗi za, “To Yi ɓanga ngaa ndola ro, Nga tu̱k mu̱ndi ɓaaro maɗyi.”

Dlu̱dlarsi Yesu

²³ Yesu wa khu̱l sonyi ɗyin kunung sarchi nu̱ nggaki su̱ tlu̱nari, nduki ka qa nda za, yi ɓu̱ Yusufu, chin Yusufang, yi ɓu̱ Kheli.

²⁴ Kheli yi ɓu̱ Matat, Matat yi ɓu̱ Lawi, Lawi yi ɓu̱ Malki, Malki yi ɓu̱ Jannai, Jannai yi ɓu̱ Yusufu, Yusufu yi ɓu̱

²⁵ Matatiya, Matatiya yi ɓu̱ Amos. Amos yi ɓu̱ Nakhum, Nakhum yi ɓu̱ Azaliya, Azaliya yi ɓu̱ Najaya

²⁶ Najaya yi ɓu̱ Maata, Maata yi ɓu̱ Matatiya, Matatiya yi ɓu̱ Shimeya, Shimeya yi ɓu̱ Josek, Josek yi ɓu̱ Joda.

²⁷ Joda yi ɓu̱ Joanan, Joanan yi ɓu̱ Resa, Resa yi ɓu̱ Zarubabel, Zarubabel yi ɓu̱ Shiyaltiyel, Shiyaltiyel yi ɓu̱ Niri. Niri yi ɓu̱ Malki,

²⁸ Malki yi ɓu̱ Adi, Adi yi ɓu̱ Kosama, Kosama yi ɓu̱ Almadama, Almadama yi ɓu̱ Er,

²⁹ Er yi ɓu̱ Joshuwa. Joshuwa yi ɓu̱ Eliyezar, Eliyezar yi ɓu̱ Jorim, Jorim yi ɓu̱ Matat, Matat yi ɓu̱ Lawi,

³⁰ Lawi yi ɓu̱ Simiyon, Simiyon yi ɓu̱ Yakhuda, Yakhuda yi ɓu̱ Yusufu, Yusufu yi ɓu̱ Jonam, Jonam yi ɓu̱ Eliyakim.

³¹ Eliyakim yi ɓu̱ Malaya, Malaya yi ɓu̱ Mainana, Mainana yi ɓu̱ Matata, Matata yi ɓu̱ Natan, Natan yi ɓu̱ Dauda.

³² Dauda yi ɓu̱ Jesse, Jesse yi ɓu̱ Obida, Obida yi ɓu̱ Boaz, Boaz yi ɓu̱ Salmon, Salmon yi ɓu̱ Nashon.

³³ Nashon yi ɓu̱ Aminadab, Aminadab yi ɓu̱ Arni, Arni yi ɓu̱ Khesruna, Khesruna yi ɓu̱ Peresa, Peresa yi ɓu̱ Yakhuda,

³⁴ Yakhuda yi ɓu̱ Nyagham. Nyagham yi ɓu̱ Yishaku, Yishaku yi ɓu̱ Yibram, Yibram yi ɓu̱ Tera, Tera yi ɓu̱ Nakhor,

³⁵ Nakhor yi ɓu̱ Serug, Serug yi ɓu̱ Reyu, Reyu yi ɓu̱ Peleg, Peleg yi ɓu̱ Eber, Eber yi ɓu̱ Shela.

³⁶ Shela yi ɓu̱ Kenan, Kenan yi ɓu̱ Arfakhshad, Arfakhshad yi ɓu̱ Shem, Shem yi ɓu̱ Nukhu, Nukhu yi ɓu̱ Lamek.

³⁷ Lamek yi ɓu̱ Metusela, Metusela yi ɓu̱ Enok, Enok yi ɓu̱ Jared, Jared yi ɓu̱ Makhalalel, Makhalalel yi ɓu̱ Kenan

³⁸ Kenan yi ɓu̱ Enosh, Enosh yi ɓu̱ Set, Set yi ɓu̱ Adamu, Adamu, ɓu̱ Magham.