Luka 2 - Mewar Alqawarang

Labar Khar ɓu̱ Yesu

¹ Mbu̱ qaandi virkirku naandang, Nggomne gwaanji (Kaisar) nggur a nje nu̱ kya kwaaɗar ɗyin dlar ghai khang, dlu̱man za Agustus. Tu̱ sa za ku̱ shiga ru̱m nduki nu̱ kya mbu̱ bu̱n kwaaɗar Roma ma zhaanggali.

² Nang ke pooni shigar nu̱ gumapaali nu̱ shiki. Shi shigarang sarchi nu̱ke Kiriniyus a kwaaɗar dlar ghai Siriya.

³ Tu̱ aaki ɗu̱ mbu̱ ghai ɓaran ma ku̱ shiga nda.

⁴ Tu̱ Yusufu tu̱k njig Nazaret nu̱ kya mbu̱ dlar ghai Galili, tu̱ ɗu̱ Baitalami nu̱ kya mbu̱ dlar ghai Yakhudiya, ye ma nu̱ khaki kuji Dauda. Yusufu ɗu̱ nje ma shigarang ku̱me a zhikankir ndu̱ Dauda.

⁵ Sarchi ni, Maryam nu̱ke a ma ɓu̱r Yusufu a ghu̱rɓan, yang ɗu̱ ku su̱yen ma ku̱ shiga wora.

⁶ A far ku, tu̱ sarchi khar ɓaran shi.

⁷ Tu̱ kha ye khuski gomir ɓaran, tu̱ ɗyikhla nda nu̱ mbu̱ kapari, yang ku̱me song maa kha, tu̱ sa nda nu̱ mbu̱ ɗye zu̱r ɗye zu̱mndi ye ɗye nggarku.

Nu̱ Khutloku nu̱ Tu̱kki Labar mbarkandi

⁸ Nu̱ khutloku nggur a nje ve dalang ngguri Baitalami nu̱ke a bu ɗyin shapir ɓaanda chele virkiri.

⁹ Tu̱ nu̱ ru̱kti ɓu̱ Magham ruuma wora, tu̱ zhaaji ɓu̱ Magham shi yarang ɗyine wora, tu̱ ku̱zha ku maɗyi.

¹⁰ Tu̱ nu̱ ru̱kti ɓu̱ Maghamang ze wor za, “Tu̱k nu sawa ɓa, tu̱k ma, ngaa ɓa nu̱ labar mu̱nkandi ye nu, nduki kap ka shi kashar maɗyi ku̱men.

¹¹ Wa kha nu̱ ɗanar ye nu meeni mbu̱ ghai ɓu̱ Dauda, dlu̱man za Masiya, Zhinerem gwaanji.

¹² Tun ka nan ve nang, mbu̱ tun wa ɗi, tun ka gwa woi ɗyikhlaran mbu̱ kapari qaandan mbu̱ ɗye zu̱r ɗye zu̱mndi ye ɗye nggarku.”

¹³ Tu̱ tabar nu̱ ru̱ktiku ɓu̱ Magham a zhur mbu̱ viɗi tu̱ gor dlu̱m Magham ku su̱yen ndu̱ nu̱ ru̱kti ɓu̱ Magham nu̱ gumapaalyang. A zu̱ran ku za,

¹⁴ “Zhaaji ye Maghamndi nu̱ viɗi, mbu̱ larji yang ku̱ nduki nu̱ Magham tu̱kki mu̱ndi ɓaanda kha ndu̱ qaandi memu̱na.”

¹⁵ Gaanje nu̱ ru̱ktiku ɓu̱ Magham wa gaɓ vaanda nu̱ viɗi, tu̱ nu̱ khutlo kwang ze yen ku za, “Ɗyem Baitalami chem a na ɗyi nu̱ Magham zu̱ki yeremang.”

¹⁶ Tu̱ zhang vaanda ma yir Baitalami. Nu̱ khu̱lki ku, tu̱ gwa Maryam ndu̱ Yusufu, tu̱ na woyang qaandan mbu̱ ɗye zu̱r ɗye zu̱mndi ye ɗye nggarku.

¹⁷ Nu̱ naki woyang ku, tu̱ vu̱r labar ɗyi ni nu̱ ru̱kti ɓu̱ Maghamang zu̱ki ye wor ɗyine woyang.

¹⁸ Kap nduki nu̱ tu̱kki labar nang, tu̱ khuɓ me wor ku̱me lazham ɗyi ni nu̱ khutlori ku nang zu̱ki.

¹⁹ Yang Maryam nu̱ mona ɗyiku na aa da ɓa, ba a kwaaran mbu̱ memu̱naran aakochi.

²⁰ Tu̱ nu̱ khutlokwang gaɓ a kham Magham ku a gor dlu̱man, ku̱me ɗyi nu̱ yiti wor naki tu̱ dlu̱mndi wor tu̱kki. Wa gwa ɗyiku nang kap ba wa ni nu̱ ru̱kti ɓu̱ Maghamang zu̱ki ye wora.

Wa Ɗu̱ ma Sa Yesu nu̱ mbu̱ Khar Magham

²¹ Nu̱ dlaki su̱ woyang gaanje qaandi miyasi, tu̱ qa dlu̱man Yesu, ba wa ni nu̱ ru̱kti ɓu̱ Maghamang qaki nda me ku̱ daa ghu̱rɓandi ɓaran.

²² Sarchi nu̱ke sadke shiɓti ru̱gnar khar woi ɓu̱ Maryam shiki, wa nu̱ Taurete ɓu̱ annabi Musa zu̱ki, tu̱ ɗa ɓa ndu̱ chin ku Urshalima ma sa nda nu̱ mbu̱ khar Magham.

²³ Ba wa nu̱ Taurete ɓu̱ Magham zu̱ki za, “Ka qa aa nyi gomir ye khusku shakhshakh she Magham.”

²⁴ Su̱yen ndu̱ vu̱rti sadke wa nu̱ Tauretyang zu̱ki, za ku̱ vu̱r da chele ɓu̱, “mboole kurkutuk rap ndu̱ mboole masar rap.”

Simiyon wa Na Masiya

²⁵ Yang ku̱maandi nggur a nje Urshalima dlu̱man za Simiyon, ɗya nu̱ jeembu ndu̱ komkomi ghaari ghai ye Magham. A bu ɓar ɓu̱ Masiya ma du̱ng memu̱na Israila, Jiimbi shakhshakhndang nje ɗyine nda.

²⁶ Jiimbi shakhshakhndi wa wuɗ yenda za ɓu̱ mu̱ɗ ɓa kope wa na Masiya nyedli alqawar ɓu̱ Magham.

²⁷ Tu̱ Jiimbi shakhshakhndi mbu ndu̱ chin ma yir mbu̱ Rafti ɓu̱ Magham. Sarchi nu̱ Maryam ndu̱ Yusufu ɗu̱ki ma sa Yesu nu̱ mbu̱ khar Magham ba wa nu̱ Tauretyang zu̱ki.

²⁸ Tu̱ Simiyon dlu̱ woyang, tu̱ gor dlu̱m Magham a zu̱ran za,

²⁹ “Zhinkir gwaanji, leendang bu ku̱ maavi ɓa mu̱ɗ nu̱ qaandi memu̱na ba wa no zu̱kyang.

³⁰ Ku̱me yita wa na nu̱ ɗanar

³¹ no daasaki ye nduki kap.

³² Ɗya yarang nu̱ke a ma wuɗ Magham ye nduki, chin ke zhaaji ɓu̱ nduki ɓa Israila.”

³³ Tu̱ Yusufu ndu̱ Maryam shi lazham ɗyi nu̱ Simiyon zu̱ki nu̱ ɗyine woyang.

³⁴ Tu̱ Simiyon sa barke ye wora, tu̱ yang ze Maryam man woyang za, “Nggu̱ɗu, Magham wa dat woi nang ku̱me ku̱ kha ma ɗye ji sar she ɓeena nduki, yang tu̱k ku̱ kha ma njiv ɗanar she nduki khang Israila. Yang tu̱k ka kha ma ɗye zhang she nduki.

³⁵ Ku̱me nang, kwaari nu̱ memu̱na nduki khang ka ɗa vi ye dalangi. Ɗyi na yang ka shi yor gu̱rgu̱r ba wa kaskar zhokhki memu̱na ro.”

Saidu ɓu̱ Khanatu ɗyine Masiya

³⁶ Geema nokhzi nggur a nje nu̱ke ku̱du̱wan yang ɗya annabi, dlu̱man za Khanatu yi ɓu̱ Panuwel, a vi mbu̱ pooni ɓu̱ Asha. Shi khar ɓu̱rti ba me sonyi mut, tu̱ zhimen mu̱ɗi.

³⁷ Sonyi ɓaran ɗyin miyasi qu̱m vat, yang nu̱ njig mbu̱ Rafti ɓu̱ Magham sar da ɓa, kharan nje a ghar ghai ye Magham fu̱ɗar ndu̱ virkiri, a zhumti ndu̱ barari.

³⁸ Ba ye sarchi ni tu̱ vi nu̱ she wora, tu̱ kuna Magham, tu̱ shi ɓalar ɓu̱ Yesu ye nduki nu̱ke a bu dli ɗyin ɓu̱ Urshalima kap.

Gaɓti nu̱ Nazaret

³⁹ Nu̱ Yusufu ndu̱ Maryam woɗaki meghai nu̱ shipaki ku̱ shi ku kap, ba wa nu̱ Tauretyang zu̱ki, tu̱ gaɓ ku nu̱ mbu̱ dlar ghai Galili, tu̱ ɗu̱ mbu̱ ghai ɓaanda Nazaret.

⁴⁰ Tu̱ woyang shi gori ndu̱ du̱mbu̱r mbu̱ jiimba, nyeedlan ndu̱ kaɗari, mu̱nkir ɓu̱ Magham a su̱yen ndu̱ chin.

Yesu wa Shi Shogar ye Maalu̱mku

⁴¹ Yusufu ndu̱ Maryam wa ka ɗu̱ ku Urshalima aa nyi sonyi ma tabar peetar ɗyin,

⁴² nu̱ Yesu khu̱lki sonyi gwanggu̱m rap tu̱ ɗu̱ ndu̱ chin ku Urshalima ma tabarang ba wa nu̱ su̱nki ku sot.

⁴³ Gaanje tabarang, ta ku̱s njiv ku ma gaɓti nu̱ kaa Nazaret. Tu̱ Yesu, woyang kha varan gha Urshalima waare zu̱ndi ɓu̱ Yusufu ndu̱ man.

⁴⁴ Ku̱me a tamandan ku za Yesu a nje chele ɓu̱ nu̱ yir kwang. Tu̱ shi yir ku me piti da, kom tu̱ nggaasi laɓ nda chele raptikirku ɓaanda ndu̱ kheetiku ɓaanda.

⁴⁵ Nu̱ke nu̱ gwa nda ku ɓa, tu̱ gaɓ ku nu̱ Urshalima maa kaala nda.

⁴⁶ Ye fu̱ɗar nu̱ kunung, ta gwa nda ku mbu̱ Rafti ɓu̱ Magham kharan chele Maalu̱mku a gwa dlu̱mndan ye wora, yang a zhamndi ye wor tu̱k.

⁴⁷ Tu̱ ndukikwang kap ki lazham ɓu̱ zu̱ndi ɓaran ndu̱ pooni tloghar zhamndi nu̱ shiki.

⁴⁸ Nu̱ naki nda, tu̱ shi lazham ku, kom tu̱ man ze nda za, “Yi ɓanga, nu̱m saki to shi yerem wanang? Chem wa damta chem a laɓtoro, nga ndu̱ zhu.”

⁴⁹ Yang tu̱ Yesu tlogha ye wor za, “Tun a laɓti nga ma nu̱ma? Nun zu̱n za wa ku̱s shi nga tlu̱nar ɓu̱ Aba ɓang de?”

⁵⁰ Yang nu̱ daa mbu̱ ɗyi nu̱ Yesu zu̱ki ye wora ɓa.

⁵¹ Tu̱ Yesu gaɓ nu̱ Nazaret su̱yen ndu̱ wora a mbu zu̱r ɓaanda. Tu̱ man, Maryam ki kor ɗyiku nang mbu̱ memu̱naran.

⁵² Tu̱ Yesu zu̱m guma mbe kaɗari ndu̱ gwaari a gwa mu̱nkir she Magham ndu̱ nduki.