Luka 17 - Mewar Alqawarang

Shogar ɗyine Sola

¹ Tu̱ Yesu ze nu̱ mburindakwang za, “Ɗye sar nduki ma sola ba a nje aakochi, yang njif na ɓa ki si ɗya ɗye zhiyaye.

² Ye ku̱ nduk sa da chele qusonggi nang ma zop, kuzhom ku̱ gu̱n vu̱nar nu̱ ve quran, tu̱ yang mbuk nda nu̱ mbu̱ ɗyim chitndi.

³ Kosama va nun gha mbari. “Mbu̱ mu̱dlo wa shi zop yoro, to wu nda, mbu̱ wa khuɗ yaapar khaaro, to yaapa nda.

⁴ Aa ka shi zop yor sar mut mbu̱ fu̱ɗar da, tu̱ yang ku̱s ɓar sho ma khuɗ yaapari, to yaapa nda.”

Pudekwang wa Khuɗ Shaatar Maito

⁵ Kom tu̱ Pudekwang ze Yesu za, “Zhinerem gwaanji, shoto vu̱rti zhire yerem!”

⁶ Tu̱ Yesu tlogha ye wor za, “Mbu̱ maito kha ba koɗomma wa pooni mastad, to ka ɗu̱ma ze qu̱far zhar nang no za, ‘Ɓu̱ɗ va ta pa va gha mbu̱ ɗyim chitndi,’ yang ka shi ɗyi no zu̱ki yendang.”

Khar ma Maavi Mbarkandi

⁷ “Yang ki chele ɓaanu nu̱ke maavyang kha nda nu̱ke a ghuti yenda, aa a khutlokya guno ndu̱ɓangku yenda. Mbu̱ maavyang a gaɓ gar, ɗa, nu̱ rafti ɓaranang ka shi wakho zu̱ran yenda za, ‘Kho gha to zu̱m ɗye zu̱mndi mu?’

⁸ Alapa ɓu̱ ze maavyang za, ‘Dooso ɗyi nu̱ke ngga zu̱mki to kosa mbu̱ va nu̱gha, to vu̱r ɗye zu̱mndi virkir ya dong to ɗa ɓa si tang zu̱m tang za, kom to zu̱m ɓa gana fan ɓa goma?’

⁹ Yang ka kuna maavyang ku̱me wa shi tlu̱nar nu̱ zu̱ki yenda mu?

¹⁰ Wanang tu̱k mbu̱ tun wa shi ɗyi nu̱ zu̱ki ye nu, tun zu̱ nun za, ‘Chem a khar maava, yang chem a shikya ba tlu̱nar ɓaarem nu̱ ku̱ski.’ ”

Yesu wa Shaana nu̱ Khaati Gwaanjiku Gwang

¹¹ Nu̱ Yesu ku̱ski njiv ma yir Urshalima, tu̱ mbu ɗyin koɗokh nu̱ shakki chele ɓu̱ dlar ghai Samariya ndu̱ Galili.

¹² A ma viiri nu̱ mbu̱ gure nggur tu̱ nu̱ khaati gwaanjiku wor gwang gama ndu̱ chin, yang a ɓakh ndu̱ maa nu̱ke a sang.

¹³ Tu̱ da su̱qura wor nu̱ viɗi, tu̱ wopa ku ye Yesu za, “Yesu, Zhinerem gwaanji, no zhiyaye ɓaarem!”

¹⁴ Nu̱ Yesu naki wor tu̱ zu̱ za, “Ɗu̱ ma tun a wuɗ va nu ye kurukwang!” Nu̱ kya mbu̱ yir ku, tu̱ shaana ku mbe khaatang.

¹⁵ Nu̱ nduk da chele ɓaanda naki chin wa gwa shaanar mbe khaatang, tu̱ ɗa gaɓ nu̱ gana tu̱ da su̱quran nu̱ viɗi a kuna Magham.

¹⁶ Tu̱ ɗa ɓa tu̱ kurum gha gume Yesu, tu̱ wuɗ kunar ɓaran yenda, yang njifang ɗya khuzi Samariya.

¹⁷ Tu̱ Yesu shi zhamndi za, “Woɗye ɗa, nduki gwangndang kap shaanaki ɓa goma? Yang a fu̱nke nduki mu̱dlamndang na?

¹⁸ Yang chele ɓaanda, aa da nduk a nje na ɓa ki ma wuɗ kunar ɓaran ye Magham ɓa kope runggi nang ɗyenda?”

¹⁹ Tu̱ Yesu ze njifang za, “Ju to ɗu̱ va ro, maito ɓa wa shaana ro.”

Ɓar ɓu̱ Kwaaɗar ɓu̱ Magham.

²⁰ Sarchi ngguri, tu̱ Parisekwang shi zhamndi ye Yesu ɗyine sarchi nu̱ke kwaaɗar ɓu̱ Magham ka ɗa ɓa ki, tu̱ Yesu tlogha zham nda ye wor za, “Nduk nu̱ka na ɓar ɓu̱ kwaaɗar ɓu̱ Magham ndu̱ yiti ɓa.

²¹ Sar da nduk a nje nu̱ke ka wuɗki ye nu za, ‘Wonji nda fan,’ ndu̱ ‘Wonda nda far ɓa,’ ku̱me kwaaɗar ɓu̱ Maghamang chele ɓaanu.”

²² Kom tu̱ ze nu̱ mburindakwang tu̱k za, “Sarcha ɓar nu̱ke tun ka shimki na aa fu̱ɗar da mbu̱ fu̱ɗarku ɓu̱ Yi ɓu̱ nduku, yang tun ɓu̱ na ɓa.

²³ Nduki ka ze nu za, ‘Wonda nda fara!’ Ndu̱ ‘Wonji nda fan’ yang aa da ɗu̱nu ma naran ɓa.

²⁴ Ku̱me ɓar ɓu̱ Yi ɓu̱ Nduk ka kha wa wuti maari nu̱ka jiiki fan tu̱ ɗu̱ fara mbu̱ maa viɗi.

²⁵ Yang Yi ɓu̱ Nduk ka za bonye zum zum dong, tu̱ nduki nu̱ qaandi virkir meeni wuɗ zhangndi yenda.

²⁶ “Ba wa nu̱ shiki mbu̱ qaandi virkir ɓu̱ annabi Nukhu, ka shi wanang tu̱k sarchi nu̱ke Yi ɓu̱ nduk ka ɗa gaɓki.

²⁷ Nduki a zu̱mndi ndu̱ zari, a ɓu̱rti a ɓu̱rtan ɓar ku, ma khu̱dli sarchi nu̱ Nukhu viki nu̱ mbu̱ du̱mbu̱lang, kom tu̱ ɗyimang tlagha wor ru̱m.

²⁸ “Shi ba wanang tu̱k mbu̱ qaandi virkir ɓu̱ Lot, nduki a zu̱mndi ndu̱ zari, a masar ku a masaran ɓara, a kaɓti ku a du̱ndiku.

²⁹ Yang ba fu̱ɗar nu̱ Lot njigki ghai Sodom, tu̱ romndi ɓai ndu̱ ndogdiku gu̱rgu̱rndi a mbata viɗi tu̱ tlagha wor nu̱gha kap.

³⁰ “Ka shi ba wanang fu̱ɗar gaɓti ɓu̱ Yi ɓu̱ Nduku.

³¹ Ye fu̱ɗaran, ku̱ njif nu̱ke a viɗi ɗyin kib ɓaran a zhur yaghai ma da ɗye varan nu̱ke a mbu̱ kiba ɓa. Wanang tu̱k, ku̱ njif nu̱ke a gar a gaɓ nu̱ kaari ɓa.

³² Kor ma nokhzi Lot ɓa.

³³ Aaki jiiki ma ɗang nyifi ɓaran ka mbu̱ɗ nyifirang, yang mbu̱ wa vu̱r nyifi ɓaran, ka ɗana kya nyifirang.

³⁴ Nga zu̱ran ye nu mbu̱ virkir naandang, ka gwa nduki rap qaandan ɗyin gaanggir da, ka daa da tu̱ njig da.

³⁵ Ka gwa nusuku rap a khi ye gurku su̱yen, ka daa da tu̱ njig da.

³⁶ Ka gwa khuzuku rap gar, ka daa da tu̱ njig da.”

³⁷ Tu̱ nu̱ mburindakwang zham nda za, “Zhinerem Gwaanji, ɗyi nang ka shi fu̱na?” Tu̱ Yesu ze wor za, “Kap maa nu̱ke liipe a nje gochikku ka taba nu̱ nje.”