Luka 1 - Mewar Alqawarang

Nggarsan

¹ Nu̱ke nduki khang wa shi bu̱lar ɗyine ɗyiku nu̱ shiki chele ɓaarem,

² ba wa ni nu̱ mbu Yesu ku nu̱ gumapaali nu̱ke a tlu̱nar wopar ɓalar ɓu̱ Magham nu̱ shiki ɗyiku nang mbu̱ yiti wora zu̱ki yerem.

³ Wa shi mbari nga ndu̱ vara njel nga su̱ ɗyiku nang yor kap ku̱me ngaa laɓ mban nu̱gha mbari vu̱ nggarsan, su̱ ghayi, Tiyofilus.

⁴ Ngaa shim ndaa su̱ ɗyiku na yoro ku̱me zu̱n na zhire ɓu̱ ɗyi no shogakyang.

Ɓalar Khar ɓu̱ Yokhana nu̱ Baptisme

⁵ Sarchi nu̱ke Khiridus kuji gwaanji nu̱ Yakhudiya a mbu̱ kwaaɗari, kuru nu̱ tlu̱nar mbu̱ Rafti ɓu̱ Magham nggur a nje dlu̱man za Zakariya, ɗya kuru me sham ɓu̱ Abija. Rong ma kaani, Elizabet nokhzan ɗya tom me sham kuru ɓu̱ Kharuna.

⁶ Ku̱lmbu̱r ɓaanda ɗya nu̱ sawar Magham ku, wa ka khutlo Wopar ɓu̱ Magham ndu̱ zu̱r ɓaran wa nu̱ shipaki.

⁷ Wa geema ku, yang aa da woi kha wor ɓa ku̱me Elizabet kwarandan.

⁸ Sarchi ngguri Zakariya wa ɗu̱ ma tlu̱nar mbu̱ kib ɓu̱ Maghamang, ku̱me ɗya me tlu̱nar ɓu̱ me sham kuru ɓu̱ Abija.

⁹ Tu̱ dat Zakariya ku ma va ɗye zhi mu̱nkandi mbu̱ Rafti ɓu̱ Magham ku̱me nang ke me ghai ɓu̱ kuruku.

¹⁰ Sarchi nu̱ Zakariya viki nu̱ mbu̱ Rafti ɓu̱ Magham ma va ɗye zhi mu̱nkandang, tabar nduki a nje dam a bararku.

¹¹ Tu̱ nu̱ ru̱kti ɓu̱ Magham wuɗ varan ye Zakariya chingndan ɗyin bu̱n zu̱ma ndu̱ du̱ku̱l nu̱ka vaki ɗye zhi mu̱nkandi ɗyinanang.

¹² Tu̱ Zakariya ku̱zha su̱yen ndu̱ tu̱kti sawar maɗyikandi.

¹³ Kom tu̱ nu̱ ru̱kti ɓu̱ Maghamang ze nda za, “Tu̱k na sawa ɓa, Zakariya; Magham wa tu̱k ghoori ɓaaro, Elizabet nokhzor ka shi ghu̱rɓan, tu̱ kha ye khusku, yang to ka sa dlu̱man za Yokhana.

¹⁴ Mbor ka ɓa shi mu̱ni, to ka ɓa kasha maɗyi. Yang nduki khang ka kasha khar ɓaran tu̱k.

¹⁵ Ku̱me ka kha ma nduk gori she Magham, yang ɓu̱ za ɗyema ndu̱ aa nyi ɗyi nu̱ka kuyaki nduk ɓa. Ka nyel nda ndu̱ Jiimbi shakhshakhndi me ku̱ kha nda.

¹⁶ Ka sa nduki nu̱ Israila khang tu̱ gaɓ nu̱ she Maghamndi ɓaanda Zhinkir gwaanji.

¹⁷ Ka ɗa ɓa mbu̱ du̱mbu̱r ndu̱ memu̱nar tlu̱nar ɓu̱ annabi Iliya, chin ka ɗa ɓa ki gume Zhinerem gwaanji ma daasa nduki yenda me ku̱ ɗa ɓa. Ka sa memu̱na khuzuku tu̱ gaɓ nu̱ ɗyin qusonggi ɓaanda, nu̱ nggarvarku ka gwa dlu̱mndi wor ye kaɗari ɓu̱ nduki ɓu̱ Magham.”

¹⁸ Tu̱ Zakariya tlogha za, “Ɗyinang ka shi kikimnda? Wonji nga ndu̱ nokhza kap chem wa geema.”

¹⁹ Tu̱ nu̱ ru̱kti ɓu̱ Maghamang ze nda za, “Nga ke Jibu̱railu nang ka chingki gha gume Magham. Magham a ru̱kki nga ma zu̱ labar mu̱nkandi nang yoro.

²⁰ Yang ku̱me ta keela ɓalar nang zu̱ki yoro, no maita ɓa, ta ma ɗu̱ma ɓala tu̱k ɓa kope gaanje khar ɓu̱ Woyang. Ɗyi nang zu̱ki nang ka nyel kap mbu̱ sarchi ɓaran.”

²¹ Tu̱ nduki nu̱ke a bu Zakariya damang damta ku̱me wa shoɓ maɗyi mbu̱ rafti ɓu̱ Maghamang.

²² Nu̱ Zakariya viki nu̱ dam, nu̱ ɗu̱ma ɓala ye wor ndu̱ men ɓa, tu̱ ka bu ɓalarang ye wor ndu̱ kharan. Nu̱ ndukyang naki wanang, tu̱ zu̱n ku za yiti Zakariya wa na tun mbu̱ rafti ɓu̱ Maghamang.

²³ Yang Zakariya nu̱ gaɓ nu̱ kaa ɓaran ɓa, ba a nje mbu̱ kib ɓu̱ Maghamang kope gaanje woɗar me tlu̱nar ɓaran.

²⁴ Ɗyina shi nu̱ shoɓ maɗyi ɓa, tu̱ Elizabet shi ghu̱rɓan, tu̱ yang tuka varan gha me chere qurmun.

²⁵ A zu̱ran mbu̱ memu̱naran za, “Magham ɗye kuna, ku̱me wa daa kawar ɓang gume nduki khang mbu̱ sarchi nang.”

Ɓalar Khar ɓu̱ Yesu

²⁶ Chere ɓu̱ Elizabet njong ndu̱ ghu̱rɓandang, tu̱ Magham ru̱k nu̱ ru̱kti ɓaran Jibu̱railu nu̱ mbu̱ ghai Nazaret nu̱ke a mbu̱ dlar ghai Galili.

²⁷ She wonkhar nggur nu̱ tloghaki ɓu̱rti ye Yusufu, zhikan Dauda, dlu̱man za Maryam.

²⁸ Tu̱ Jibu̱railu ɗu̱ she Maryam za, “Gappu̱ra, to no gwaki mu̱nkir she Magham, Magham a su̱yen ndu̱ to.”

²⁹ Tu̱ Maryam damta maɗyi ndu̱ pooni qaandi nang.

³⁰ Tu̱ nu̱ ru̱ktang ze nda za, “Tu̱k na sawa ɓa Maryam, ta gwa mu̱nkir she Magham.

³¹ To ka shi ghu̱rɓan, to kha woi ye khusku, to ka qa dlu̱man Yesu.

³² Ka kha ma nduk gori, ka ɓa qa nda Yi ɓu̱ Magham nu̱ viɗi. Magham Zhinkir gwaanji ka vu̱r kwaaɗar ɓu̱ zhikan Dauda yenda.

³³ Ka shi kwaaɗar ɗyine me vi ɓu̱ Nyagham koɗokhsi ɓa. Yang koɗokh nje ve kwaaɗar ɓaran rong tu̱k zu̱m ɓa.”

³⁴ Tu̱ yang Maryam zham nu̱ ru̱ktang za, “Ɗyinang ka shi kikimndana, nu̱ke nang zu̱n khusku ɓa?”

³⁵ Tu̱ nu̱ ru̱ktang ze nda za, “Jiimbi shakhshakhndi ɓu̱ Magham ka shur nu̱ ɗyinoro, zalale ɓu̱ Magham nu̱ viɗi ka lu̱pa ro. Ku̱me nang, woyang ka kha shakhshakh, ka qa nda Yi ɓu̱ Magham.

³⁶ Nggu̱t ɓa, kheeti ɓa Elizabet nu̱ke geemaran, yang kap ndu̱ nang a ghu̱rɓan. Chere ɓaran njong meeni ndu̱ ghu̱rɓandang aa nu̱ke kwarandan.

³⁷ Tun a nje ka ku̱naki Magham ɓa.”

³⁸ Tu̱ Maryam tlogha za, “Wonji nga Magham, ku̱me nga maavi ɓaaro, bu ku̱ ɓalar no zu̱ki nang kha ya ma wanang.” Tu̱ nu̱ ru̱kti ɓu̱ Maghamang ɗu̱ varan.

³⁹ Nu̱ qan khang qu̱rsan ɓa, tu̱ Maryam ji nu̱ waakho ma yir dlar ghai nu̱ke a mbu̱ dlengkwang, tu̱ gal nu̱ mbu̱ dlar ghai nggur Yakhudiya,

⁴⁰ tu̱ vi nu̱ kaa ɓu̱ Zakariya tu̱ shi qaandi ye Elizabet.

⁴¹ Yang ba nu̱ Elizabet tu̱kki su̱qur gappu̱re ɓu̱ Maryamang, tu̱ woyang shi qushumndi mbe nda, tu̱ Jiimbi shakhshakhndi nyel nda.

⁴² Tu̱ da su̱quran nu̱ viɗi za, “To nu̱ barka mbu̱ nusuki, woi nu̱ke ta ghu̱rɓandanang ɗya nu̱ barka tu̱k!

⁴³ Nga ki ɗo nu̱ke man Zhinerem gwaanji ka ɗa ɓa ki sha?

⁴⁴ Nggu̱t ɓa, ba nang tu̱kki su̱qura gappu̱re ɓaaro, tu̱ woyang nu̱ke a mbyang shi qushumndi a kashari.

⁴⁵ Barkya ve ro, to no maitaki ɗyi nu̱ Magham zu̱ki, ku̱me Magham ka nyel ɓalar ɓaran.”

Taazi Gwaari Dlu̱m Magham

⁴⁶ Tu̱ Maryam tlogha za, “Ngaa gor dlu̱m Magham mbu̱ memu̱nara,

⁴⁷ Ngaa kashar mbu̱ nyifi ɓanga ku̱me Magham nu̱ ɗanar nga.

⁴⁸ Ku̱me wa kwaari nga aa nu̱ke nga maavi ɓaran katakandi, no ya ka, gana fan aa nyi nduk ka qa nga za nu̱ barka.

⁴⁹ Ku̱me nu̱ zalalyang wa shi ɗyi gwaanji ya. Dlu̱man shakhshakh.

⁵⁰ Ɗaanar ɓaran ye nu̱ sawar nda, wa ka mbu ɗyin zhikanki ma yir ɗyin zhikanki.

⁵¹ Wa shi tlu̱nar gwaanji ku̱me bu̱nan shokhku̱rokh; wa lakhta ɗyi nu̱ gwaari ɗyin ku tamanki memu̱na wora.

⁵² Wa fed kujiku ɓar mbu̱ kwaaɗar ɓaanda, tu̱ na zhaaji ɓu̱ nduki nu̱ke ndu̱mndan ku̱me ɗya aa nu̱m ku ɓa.

⁵³ Wa vu̱r ɗyi mbarkandi ye nu̱ nungndiku, tu̱ komba nu̱ gu̱narku ɓar khar wor rap.

⁵⁴ Wa shaata maavi ɓaran Israila, ku̱me wa tu̱k zhiyaye ɓaran,

⁵⁵ wa nu̱ zu̱ki ye zhineremku, ma yir she Yibram ndu̱ pooniku ɓaran tu̱k woɗasi ɓa.”

⁵⁶ Tu̱ Maryam kha gha ndu̱ Elizabet me chere kunung, kom tu̱ gaɓ nu̱ kaari.

Khar ɓu̱ Yokhana nu̱ Baptisme

⁵⁷ Nu̱ sarchi khar woi ɓu̱ Elizabet shiki, tu̱ kha ye khusku.

⁵⁸ Tu̱ nu̱ bing ɓaranku ndu̱ kheetiku ɓaran tu̱k labar ɗaanar maɗyikandi nu̱ Magham shiki yenda, tu̱ shi kashar ku su̱yen ndu̱ chin.

⁵⁹ Nu̱ qaandi miyasi shiki, tu̱ ɗa ɓa ku ma dla su̱ woyang, tu̱ ji ma sa dlu̱m Zakariya yenda ku ku̱me nang ke dlu̱m zhin,

⁶⁰ yang tu̱ Elizabet man woyang zhang gha za, “Dlu̱m woyang ɗya Yokhana.”

⁶¹ Tu̱ ndukyang zu̱ za, “Sar da nu̱ wor tu̱k dlu̱m na mbu̱ pooni ɓaanda ɓa.”

⁶² Tu̱ ndukyang zham dlu̱m woyang she zhin ndu̱ buuri khari,

⁶³ tu̱ zhin woyang bu ndu̱ kharan za ku̱ vu̱r ɗye bu̱lar yenda, tu̱ bu̱lan ɗyin ɗye bu̱larang za, “Dlu̱m woyang ɗya Yokhana.” Tu̱ ndukyang kap shi lazham.

⁶⁴ Fan ndu̱ fan tu̱ men qu̱ni, tu̱ ghiindan kwatli, tu̱ shi ɓalari a sa barke ye Magham.

⁶⁵ Tu̱ nu̱ bing ɓaanda kap tu̱k sawar ku, tu̱ labar nang ɗu̱ aa fu̱n mbu̱ dlar ghai Yakhudiya;

⁶⁶ tu̱ nduki nu̱ tu̱kki kap ki kwaari ɗyine ɗyi nang, tu̱ ku̱s zu̱ran ku za, “Woi nang ka ɓa kha kya ma nu̱ma?” Ku̱me khar Maghamang nje ɗyine nda.

Zakariya wa Gor Dlu̱m Magham ku̱me Khar ɓu̱ Yokhana

⁶⁷ Tu̱ yang Jiimbi shakhshakhndi nyel Zakariya zhin woyang, tu̱ zu̱ ɓalar ɓu̱ Magham za,

⁶⁸ “Barke ye Maghamndi ɓu̱ Israila Zhinerem gwaanji, ku̱me wa kor nduki ɓaran tu̱ dli ɗyin wora.

⁶⁹ Aa ɓa ndu̱ nu̱ ɗanar yerem me vi kwaaɗar ɓu̱ maavi ɓaran Dauda,

⁷⁰ ba wa nu̱ zu̱ki nu̱ ku̱nshe annabiku shakhshakhndi nu̱ dlu̱r ɓalarku she Magham nu̱ kya nje ku zhu tang.

⁷¹ Za chin ka lawa rem ɓar mbu̱ khar nu̱ zhangndiku ɓaarem, ndu̱ nu̱ kareku ndu̱ chem.

⁷² Ka na zhiyaye ɓu̱ zhikanerem, ka kor ndu̱ alqawar ɓaran shakhshakhndi ku̱me ku̱mndar shakhshakhndi ɓaran.

⁷³ Nang ke ku̱mndar nu̱ ku̱mndaki ye zhinerem Yibram

⁷⁴ za chin ka lawa rem ɓar mbu̱ khar nu̱ zhangndiku ɓaarem ku̱me gharmi ghai yenda sawa su̱ ɓa.

⁷⁵ Ku̱me khami shakhshakh ndu̱ jeembu mbu̱ khar viti ɓaarem kap.

⁷⁶ To woi nang tu̱k, ka ɓa qa annabi ɓu̱ Maghamndi nu̱ viɗi. To ka khan gume Zhinerem gwaanji ma daasa njiv ɓar ɓaran.

⁷⁷ To ka ɗa ɓa ndu̱ labar ye ndukiku ɓaran za ka gwa ɗanar ku nu̱ ku̱n she yaapar solar ɓaanda.

⁷⁸ Ku̱n she nar zhiyaye ɓu̱ Maghamndi ɓaarem sarchi nu̱ke yarang ɗanar ɓu̱ Magham ka ɗa ɓa ki yerem viɗi,

⁷⁹ ma vu̱r yarang ye nduki nu̱ke kharan mbu̱ zhumi, ndu̱ jiimbi mu̱ti. Ka khutlo saarerem ku̱ mbu njiv nu̱ke qaandi memu̱nar a si.”

⁸⁰ Tu̱ Yokhana shi gori ndu̱ du̱mbu̱r mbu̱ Jiimbi shakhshakhndi, yang kharan varan gha gar ma yir sarchi nu̱ shipaki ku̱ wuɗ varan ye Israila.