Kolosiyeku 4 - Mewar Alqawarang

¹ Tun zhinkirku nu̱ rafa, khuɓ ma maaviku ɓaanu mbari. Tun vu̱r ɗyi nu̱ shipaki ku̱ gwa ku ye wora. Kor ma nu̱ ɗyine tun tu̱k Zhinkir gwaanji a nje kha nu viɗi.

² Ching ma nu̱ ɗyine barari, tun kha vaanu buran, tun a wut kunar ɓaanu ye Magham.

³ Shi ma barar yerem tu̱k, ma ku̱ Magham qu̱n njiv nu̱ke chem ka wopaki ɓalar ɓaran, chem wut ɗyi tukakandi ɓu̱ Magham nang ye nduki, chin ke, labar ɓu̱ Masiya. Ɗyi tukakandi nang saki nga nje khiiran zhaaru̱m.

⁴ Tun shi barar ya ma ku̱ zu̱ nga ɗyi tukakandi nang ye dalang maɗyi ba wa nu̱ shipaki shi nga.

⁵ Mbe khar ɓaanu ndu̱ nduki nu̱ke ɗya nu̱ mbu Yesu ku ɓa, tun shi aa nu̱m ndu̱ kaɗari, tun a boote ndu̱ aa nyi zalale nu̱ke a kha nu.

⁶ Bu ku̱ ɓalar ɓaanu kha ɓu̱tokh, mu̱n ma tu̱ki, yang wa shipa zu̱n nu njiv tloghar su̱ zhamndi nu̱ke nduki ka shiki ye nu.

Lauɗarsi Zoɓar Qaandi

⁷ Tikikus ka zu̱ ɗyi nu̱ke nga mban ye nu kap. Ɗya mu̱dlerem nu̱ke chem a ndolaran maɗyi, ɗya nu̱ shir zhire mbu̱ tlu̱nar ɓaran. Nga ndu̱ chin kap chem a shikya tlu̱nar ɓu̱ Zhinkir gwaanji.

⁸ Nang ke ɗyi nu̱ saki nga ru̱kti nda nu̱ she nu ma ku̱ memu̱nanu shi mu̱ni nu̱ labar ɓaarem nu̱ke tun ka tu̱kki mbu̱ men.

⁹ Wonji Onisimus su̱yen ndu̱ chin, ɗya da chele ɓaanu. Ɗya mu̱dlerem nu̱ke chem a shim nda maɗyi, ɗya nu̱ shir zhire tu̱k. Nduki rapndi nang ka zu̱ ɗyi nu̱ke chem a mban ye nu.

¹⁰ Aristakus, chin nu̱ke a nje su̱yen ndu̱ nga zhaaru̱m, za shi nga qaandi ye nu, kom ndu̱ Markus nu̱ke a khar khachinki ku ndu̱ Barnaba. (Chin ke njif nang zu̱ki ye nu nga za ku̱ dlu̱ nu nda kha nu rap rapang).

¹¹ Joshuwa nu̱ka qaki nda za Justus, a qaandi ye nu tu̱k. Nduki kunungndi nang ke Yakhudeku chele nduki nu̱ke a tlu̱nar ku̱me kwaaɗar ɓu̱ Magham su̱yen ndu̱ nga. Yang wa shaata nga ku maɗyi.

¹² Apafaras da chele ɓaanu, nu̱ke ɗya maavi ɓu̱ Masiya Yesu, a qaandi ye nu. A barar maɗyikandi aakochi ku̱me tunu a khuɗ Magham ma ku̱ ching nu gha shaanggu̱ɗang, tun kha nyeedlan, tun a tlu̱na shimndi ɓu̱ Magham, mbonu kaada.

¹³ Aa nga ndu̱ ɗyina ngga saida pooni tlu̱nar maɗyikandi nu̱ke Apafaras a shiran ma ku̱ shaata nji nu ndu̱ nduki nu̱ Laudikiya ndu̱ nu̱ Khirapolis.

¹⁴ Luka, nu̱ kuzhiri nu̱ke chem a ndola nda, ndu̱ Dimas, a qaandi ye nu ku.

¹⁵ Shi ma qaandi ya ye nyeezerem ku nu̱ke a Laudikiya, ndu̱ Nimfa su̱yen ndu̱ tabar ɓu̱ nu̱ mbu Yesu ku nu̱ka tabaki nu̱ kaa ɓaran.

¹⁶ Mbu̱ tun wa nggu̱t mbu̱ lagarkati nang, tun ru̱k ye tabar ɓu̱ nu̱ mbu Yesu ku nu̱ke a Laudikiya, ma ku̱ nggu̱t ku tu̱k. Tun nggu̱t mbu̱ lagarkati nu̱ke nduki nu̱ Laudikiya ka ɓa ɗa ru̱kki ye nu tu̱k.

¹⁷ Tun ze Arkipus tu̱k nun za, “Shi to lauɗa su̱ tlu̱nar nu̱ Zhinkir gwaanji vu̱rki yorang.”

¹⁸ Nga Bulus nga kya bu̱la qaandi nang ye nu ndu̱ khara. Ku̱ mona nu nu̱ ɗyine nga nje khiiran zhaaru̱m ɓa. Ku̱ mu̱nkir ɓu̱ Magham kha gha su̱yen ndu̱ tunu.