Kolosiyeku 3 - Mewar Alqawarang

¹ Nu̱ke Magham wa ji ndu̱ tun ɓar mbe mu̱ti su̱yen ndu̱ Masiya, sa ma memu̱nanu nu̱ ɗyine ɗyiku nu̱ke a mbu̱ viɗi, ye maa nu̱ke Masiya a si, a nje kharan ɗyin bu̱n zu̱me ɓu̱ Magham.

² Sa ma memu̱nanu nu̱ ɗyine ɗyiku nu̱ke a mbu̱ viɗi, ku̱ damta nu ndu̱ ɗyiku nu̱ke a larji ɓa.

³ Jiwa tun mu̱tan, yang nyifi ɓaanu a nje tukaran su̱yen ndu̱ Masiya mbe Magham.

⁴ Masiya ke nyifi ɓaanu zhirekandi. Mbu̱ a ɓa tu̱k, tun ka ɓa kha gha su̱yen ndu̱ chin tun gwa me ɓaanu mbe zhaaji ɓaran.

Mewar Khar Viti ndu̱ Geema Khar Viti

⁵ Ku̱me nang tlagha ma ɗye shir nu̱ka saki shimndi ɗyiku bam bam nu̱ larji nang ɓar memu̱nanu. Wor ke, zawari, ndu̱ ɗye zop, ndu̱ melakh malkandi ndu̱ shimndi ɗyiku malkandi, ndu̱ zhiri malkandi, (nang ke ghaari ghai ye mu̱lu̱mku).

⁶ Ku̱me pooni ɗyiku malkandi nang ka saki tu̱ shokhnar ɓu̱ Magham ta ɓa nu̱ ɗyine nu̱ zhangndi tu̱kti maari ku.

⁷ Mbu̱r fara sarchi nu̱ke khar viti ɓaanu mbar ɓa, tun wa ka tlu̱na pooni ɗye shir malkandi ku nang.

⁸ Yang leendang wa ku̱s ku̱ shakh nu ndu̱ ɗye shir malkandiku nang kap. Njig ma shokhna ndu̱ khang shimndi ɗyiku bam bam ndu̱ maatli memu̱na. Ku̱ pu̱zi bam bam ndu̱ maatli ɓalar a vi mbu̱ me nu ɓa.

⁹ Ku̱ shi nu wollo ye yen ɓa, nu̱ke tun wa njig ɗye shir ɓaanu nun ka shiki mbu̱r fara ndu̱ tlu̱narku ɓaran,

¹⁰ tun wa da mewar ɗye shir mbarkandi. Nang ke njif mewakandi nu̱ Magham du̱ngki nu̱ke a gaɓti nu̱ chin tu̱ kha mewa aa nyi sarchi ma ku̱ kha wa chin, ma ku̱ sa nu tun zu̱n nda mbari.

¹¹ Nu̱ke tun wa gwa mewar ɗye shir mbarkandi, tun wa kha ma ɗyi dandi. Yakhudeku nu̱ nduki nu̱ke ɗya Yakhudeku ɓa, chem kap ɗyi dandi. Aa soro dlaran aa soro dlaran ɓa kap chem da. Nduki nu̱ke shaanaran ɓa, nu̱ nji nduki, maaviku ndu̱ nduki nu̱ke ɗya maava ɓa, yang Masiya ke aa nu̱m, Masiya kya mbe aaki.

¹² Tun ke nduki ɓu̱ Magham a ndolanu tu̱ daato nu ma ku̱ kha nu ma ɓaran. Ku̱me nang tun ki na zhiyaye ɓu̱ yen, tun a mbarkir ye yen, ndu̱ katar ɗyin ndu̱ ɓu̱tokh memu̱nar ndu̱ gu̱ndi memu̱na.

¹³ Tun ki shi kaɗanyi ndu̱ yen. Mbu̱ njif nggur chele ɓaanu wa shi zop ye mu̱dlen, tun ndu̱m yenda. Wa nu̱ Zhinkir gwaanji yaapaki solar ɓaanu ye nu, tun ndu̱m ye yen tu̱k.

¹⁴ Dukti ɗyiku nang, tun ndola yen, ku̱me ndola ka gu̱nki aa nu̱m kap nu̱ ve yen ma ku̱ kha wa nu̱ Magham shimki.

¹⁵ Qaandi memu̱nar nu̱ Masiya ka vu̱rki ma ku̱ mbu ndu̱ tun mbe ɗyi nu̱ke tun a ma shiran kap, jiwa Magham qa nun mbu̱ man var da ku̱me qaandi memu̱nar nang, tun kha ma nu̱ kunar Magham aakochi.

¹⁶ Wa ku̱s ku̱ yele ɓalar ɓu̱ Masiya khan mbu̱ memu̱na nu. Tun a shogaran ye yen, tun a wu yen mbe aa nyi pooni kaɗari. Tun a taazi Zabure ndu̱ nu̱ khamndi Magham, tun a taazi ku mbe jiimba ye Magham, tun a kuna nda mbu̱ memu̱na nu.

¹⁷ Mbu̱ ɗyi nu̱ke tun a shiran kap, aa mbe ɓala aa tlu̱na, tun shir nda mbu̱ dlu̱m Zhinerem gwaanji Yesu, tun a kuna Magham Zhinki nu̱ ku̱nshe nda.

Pooni Khar nu̱ Shipaki nu̱ Mbu Yesu mbu̱ Rafa

¹⁸ Tun nusuku ɓu̱rkandi, vu̱r ma vaanu ye zhime nu, jiwa nang ke ɗyi nu̱ shipaki shi nu, tun nu̱ mbu Yesu.

¹⁹ Tun khuzuku, ndola ma nusuku ɓaanu. Ku̱ kha nu kaku̱ɗakh ye wor ɓa.

²⁰ Tun qusonggi, ɗya tlu̱nar ɓaanu mbe Masiya ku̱ mbu nu su̱qur zhinonu ndu̱ mononu aakochi, ku̱me nang ke ɗyi nu̱ke Magham a shimndan.

²¹ Tun zhinkirku ndu̱ mankirku, pu̱ɗanu maa kha ye qusonggi ɓaanu, ma ku̱ datl me bu̱n wor ɓa.

²² Tun maaviku, mbu ma zu̱r ɓu̱ zhinonu nu̱ rafa mbe aa nyi tunu. Ku̱ shi nu tlu̱nar nar yiti wa nduki nu̱ke a shim ku̱ nduki makhta wor ɓa, me ɓu̱ nang, tun shi tlu̱nar ɓaanu chele ɓaanu ndu̱ Magham, wa nu̱ke nu̱ sawar Magham ku ka shiki.

²³ Mbu ɗyi nu̱ke tun a shiran kap, shi ma ndu̱ memu̱na nu da ba wa tun a shiran ye Zhinkir gwaanji, tun a shiran ye nduk ɓa.

²⁴ Kor ma nu̱ ɗyine Zhinkir gwaanji ka vu̱r ɗye ɓi ye nu nu̱ du̱ngki gha ku̱me nduki ɓaran. Jiwa Masiya ke Zhinkir gwaanji nu̱ rafa nu̱ke tun a ghar ghai yenda!

²⁵ Yang nu̱ tlu̱nar zop, ka gwa ɗye ɓi ɓu̱ zop ɓaran, ku̱me Magham ka kuma aaki ku̱rku̱r.