Kolosiyeku 2 - Mewar Alqawarang

¹ Nga shim ku̱ zu̱n nu pooni tlu̱nar maɗyikandi nang shiki ku̱me tunu ndu̱ nduki nu̱ Laudikiya, ndu̱ nduki nu̱ke nu̱ zu̱ndi nga ku sar da ɓa.

² Yang nga shi nang ma ku̱ gwa du̱mbu̱r ku tu̱ gonta ɗyin wor mbe ndola. Gwar ɗyiku nang ka sa tu̱ gwa gu̱nar gwaanji nu̱ maito nu̱ke memu̱nar rap rap si ɓa nu̱ dar mbu̱ ɗyi tukakandi ɓu̱ Magham nang ke Masiya ndu̱ varan.

³ Chin ke ɗye qu̱ndi nu̱ qu̱ndi kap gu̱nar tukakandi nu̱ kaɗari ndu̱ zu̱ndi ɓu̱ Magham.

⁴ Nga zu̱ nang ye nu ma ku̱ aaki lamba nu ndu̱ keele bamndi ɓa, aa me mbaran shoro.

⁵ Aa nu̱ke nga nje su̱yen ndu̱ tun mbu̱ manva ɓa, nga su̱yen ndu̱ tun mbu̱ jiimba. Nga kashar maɗyi ku̱me labar nang tu̱kki za tun a nje su̱yen chingndan shaanggu̱ɗang mbu̱ maito nun shiki mbe Masiya.

Mburi Masiya a ɓa ndu̱ Mewar Khar Viti

⁶ Nu̱ke tun wa dlu̱ Masiya Yesu tu̱ kha ma Zhinonu gwaanji, shi ma khar viti ɓaanu mbe nda.

⁷ Shi ma dlu̱dlarsi mbe nda tun ku̱s tun du̱ng khar viti ɓaanu nu̱ ɗyine nda, tun shi du̱mbu̱r nu̱ si mbu̱ maito ɓaanu, ba wa nyem shogaki ye nu, tun a kuna nda aa nyi sarchi.

⁸ Ku̱ njig nu tu̱ nduk gaɓ ndu̱ tun ma maava nu̱ ku̱nshe lambar bamndi nu̱ kaɗari ɓu̱ nduk ɓa. Pooni zu̱ndi nang a vi she nduki nu̱ke a larji, kom ndu̱ khu̱kheetiku nu̱ke a zalale ndu̱ larji, nu̱ ɗa vi she Masiya ɓa.

⁹ Ku̱me kap me Maghamndi ɓu̱ Magham a nje kharan mbe Masiya sarchi nu̱ gaɓki ma nduku.

¹⁰ Wanang tu̱k tun wa kha nyeedlan mbe nda, chin nu̱ke chin kya viɗi ɗyine aa nyi nu̱ kwaaɗa ndu̱ nu̱ zalala.

¹¹ Tun wa gwa mewar dlarsi mbe nda, yang ɗya pooni dlarsi nu̱ke nduk ka shiki ndu̱ kharan ɓa, ɗya pooni dlarsi nu̱ke Masiya shiki ye nu, nu̱ fetki ɗye shir malkandi ɓaanu nu̱ manva ɓara.

¹² Baptisme nu̱ shiki ye nwang, pakya nu gha su̱yen ndu̱ Masiya. Tu̱ ji nu̱ tun ɓar su̱yen ndu̱ Chin nu̱ ku̱nshe baptismyang tu̱k, nu̱ ku̱nshe maito ɓaanu mbe zalale ɓu̱ Magham nu̱ jiiki ndu̱ chin ɓar mbe mu̱ti.

¹³ Mbu̱r far tun mu̱tan ku̱me sola tun nduki nu̱ke ɗya Yakhudeku ɓa, yang Magham wa ji ndu̱ tunu, tun kha ndu̱ nyifiri mbe Masiya. Wa ndu̱m solarku ɓaarem yerem.

¹⁴ Tu̱ pasha kudum malkandi bu̱lakandi ɗyinerem nu̱ gha, kom ndu̱ bibiti nu̱ke a si, tu̱ pasha wor nu̱gha guma da, nu̱ ku̱nshe kaatlan gha me qu̱far kaatli.

¹⁵ Wa lawa ɗye dakhlar ɓu̱ nu̱ zalale ku ndu̱ nu̱ kwaaɗarku ɓara, tu̱ wuɗ kawar ye wor ye dalangi, nu̱ ku̱nshe duti wor gaanje nda mbu̱ kashar zu̱mndi loobo dakhlar ɓaran.

Mburi Bibitikwang nu̱ Gama ɓa

¹⁶ Ku̱me nang ku̱ njig nu tu̱ aaki sa bibiti nu̱ ɗyine ɗyi nu̱ke tun ka zu̱mki ndu̱ nu̱ke tun ka zaki ɓa. Yang ku̱ sa bibiti nu ɗyine song mburi tabar ngguri, ndu̱ zhar ɓu̱ chere, ndu̱ maasi ye Fu̱ɗar Maasi tu̱k ɗo ɓa.

¹⁷ Ɗyiku nang kap a khar wa shipar ɓu̱ ɗyiku nu̱ke a wut ɗyi nu̱ke ka ɗa ɓa ki gana fan ye nduki, yang zhire ɓu̱ ɗyiku nang kap ɗya Masiya.

¹⁸ Ku̱me nang ku̱ njig nu tu̱ nu̱ pakhti ɗyin nggur shi nggu̱ti zop ye nu ku̱me yitan wa ka na ɗyin mbu̱ tuka ɓa. Pooni nduki nang wa ka gang vaanda nu̱ ve wuti katar ɗyin nu̱ wollo ndu̱ ghaari ghai ye nu̱ ru̱kti ku ɓu̱ Magham. Yang alapa ɓa a wutkya gwaari ɗyin nu̱ke ɗyin su̱ ɓa, ɗya nu̱ ndolar ɗyin ku ndu̱ nu̱ pooni ɗye shir malkandi ɓu̱ nduk ɗyenda.

¹⁹ Ai, pooni nduki nang wa woɗa shakhti ku ndu̱ Masiya nu̱ke chin ke dle gume ɓu̱ tabar ɓu̱ nu̱ mbu Yesu ku, man varang kap a dlakya vaanda nu̱ ve nda. Ai, Masiya kya zu̱mndi ndu̱ man varang tu̱ sa tu̱ kha ye maa da nu̱ ku̱nshe me barku ndu̱ gu̱rauku, tu̱ ki gwaari ndu̱ gwaari nu̱ Magham saki ku̱ shi ku.

Mu̱ti ndu̱ Khar Viti Su̱yen ndu̱ Yesu

²⁰ Nu̱ke tun wa mu̱t su̱yen ndu̱ Masiya, tun wa shakh ndu̱ khu̱kheetiku malkandi nu̱ larji nang, nu̱m saki tun ki khar ɓaanu wa tun ɓu̱ larji ma ɓar meenang na? Nu̱m saki tun ki mbu bibitiku nu̱ke nduki a vu̱rtan ye nu

²¹ wa nu̱ka zu̱ki ku za, “Ku̱ su̱ɓa nu ɓa, ku̱ dar nu ɓa, ku̱ khuɓ nu ɓa” nda na?

²² Pooni bibitiku nang a shikya ɓalar ɗyine ɗyiku nu̱ke nu̱ka shoɓ ku ɓa. Ɗya ɗyi nu̱ nduk shiki ndu̱ shogar ɓu̱ nduku.

²³ Ye nar ɓu̱ nduki pooni bibitiku nang kaɗari nje mban, wa ka vu̱r var wor tu̱ wut katar ɗyin ɓaanda mbe ghaari ghai nu̱ke a shiran ku aa nu̱ke kap ɗya wollo, tu̱ nduki ka vu̱r bonye ye var wora. Yang zhire ni chin ke bibitiku nang zalala nje su̱ nu̱ke ka shaataki nduk tu̱ duk du̱mbu̱r shimndi ɓu̱ manva ɓa.