Galatiyeku 6 - Mewar Alqawarang

Shir Ɗyi Mbarkandi ye Yen

¹ Nyeezaku, mbu̱ wa ku̱s nduk a sola, tun nu̱ke tun a sawa Magham, tun taata nda tun a gaɓ ndu̱ chin ye njivi. Yang ku̱rma vaanu, ku̱ gaɓti nu̱ mu̱dlonu ye njivang sa tun nggu̱ɗ nu̱ mbu̱ buuri zum ɓa.

² Da ma kuɗar ɓu̱ yen, shir wanangang ka sa tun nyel bibiti ɓu̱ Masiya.

³ Mbu̱ nduk a da varan za chin ɗyi ngguri, yang ɗya aa nu̱m ɓa, a lambakya varan.

⁴ Ku̱ aaki buu tlu̱nar nyin shiki tu̱ na ka. Mbu̱ mbari, kom ka kasha tlu̱nar mbarkandi nyin shikyang, ɓu̱ buu ɗyinan ndu̱ njif nggur ɓa.

⁵ Jiwa aaki ku̱ dakya kuɗar ɓu̱ ɗyinan.

⁶ Ku̱ nduki nu̱ke a shoga ɓalar ɓu̱ Magham shi mbarkir ye maalu̱m nu̱ke a shogaran ye worang.

⁷ Ku̱ lamba nu ɗyinonu ɓa, nduk nu̱ ka shi me ghu̱m ye Magham ɓa. Ɗyi nu̱ nduk kaɓki kap, ka ku̱mkya ba chin.

⁸ Mbu̱ nduk wa vu̱r varan ye shimndi ɓu̱ manva mu̱ti a buri nda. Mbu̱ yang vu̱rkya varan ye shimndi ɓu̱ Jiimba ka gwakya nyifi nu̱ke ɓu̱ shi woɗa ɓa.

⁹ Ku̱me nang ku̱ nggum mi ndu̱ shir ɗyi mbarkandi ɓa. Sarchi a nje a ɓari nu̱ke chem ka ɓa gwaki boote nu̱ke barke a si.

¹⁰ Ku̱me nang, kap sarchi nyem gwaki zalale ni, chem shi mbarkir ye aaki, nu̱ shi wa ye mu̱dlerem ku nu̱ mbu Yesu ɓa.

Lauɗarsi Ɓalarang

¹¹ Nggu̱t ma bu̱lar rututundi nang bu̱laki ye nu ndu̱ khara ka!

¹² Nduki nu̱ kya ranna nu za ku̱ dla nu sonu nu̱ gha nang, a shim wutan za wor nduki mbarkandi. Yang shi wanang ku̱me a sawa bonye nu̱ke wor ka zaki mbu̱ wa zu̱ku za kaatli Masiya gha me qu̱far kaatlang ɗyenda ka ɗanaki nduku.

¹³ Ai, aa wor nu̱ zu̱ran ku za ku̱ dla nu so nu nu̱gha nang nu̱ka mbu Bibitang ku kap ɓa. A shim ku̱ dla so nu ye nun gha ma ku̱ zu̱ku za tun a mbu wora.

¹⁴ Yang ngam ɓu̱ shi wakhti sar da ɓa. Aa ngga shi, buka shi nga ndu̱ qu̱far kaatli ɓu̱ Zhinerem gwaanji Yesu Masiya. Jiwa mu̱ti ɓaran ɗyin qu̱far kaatlang saki tang mu̱t ye shimndi ɗyin larji tu̱ ɗyin larji kha mu̱tan sha.

¹⁵ Dlarsi ndu̱ song dlarsi ɗya aa nu̱m ɓa, ɗyi nu̱ khaki nu̱ boota chin ke ku̱ nduk kha ma mewar du̱ngdi.

¹⁶ Ku̱ qaandi memu̱nar ndu̱ nar zhiyaye kha nduki nu̱ke a mbu mewar bibiti nang, nang ke nduki nu̱ mburiku zhirekandi kap ndu̱ Israila nu̱ke ɓu̱ Magham.

¹⁷ Qu̱rse nang, ku̱ aaki damta nga ndu̱ ɗyi nggur tu̱k ɓa, ku̱me chiɓir mbirku nu̱ke a vya wa wut nu̱ ɗyine nga maavi ɓu̱ Yesu.

¹⁸ Bu ku̱ mu̱nkir ɓu̱ Zhinerem gwaanji Yesu Masiya kha gha su̱yen ndu̱ tunu, nyeezaku. Amin.