Galatiyeku 4 - Mewar Alqawarang

¹ Yang mbu̱ nu̱ zu̱mndi ɗye mbu̱ ge ɗya woi koɗomma dong, chin wayen ndu̱ maava, aa nu̱ke ɗyin mbu̱ raftang ɓaran kap.

² A mbu̱ bu̱n nu̱ molar nda ku a nggu̱t gu̱nar ɓaranang yenda ku kope sarchi nu̱ zhin du̱ngki yendang wa nyedli.

³ Chem ba wanang tu̱k, chem a khar wa qusongga pichichi chem maaviku nu̱ke a mbu shogar ku ɓu̱ nduki nu̱ larji nang.

⁴ Yang nu̱ sarchi a khu̱lki tu̱m, tu̱ ɗa ru̱k Yi ɓaran. Yang kha nda nu̱ ku̱nshe nusu ɗyenda. Kha nda nu̱ mbu̱ bu̱n Bibitang,

⁵ ma ku̱ dli ɗyin nduki nu̱ke a mbu̱ bu̱n Bibitang, tu̱ gaɓ ndu̱ wor ma qusonggi ɓu̱ Magham.

⁶ Nu̱ke tun qusonggi ɓaran tu̱ Magham a ru̱k nu̱ Jiimbi Yi ɓaran nu̱ mbu̱ memu̱na nu, a qa Magham za, “Aba, Zhinki.”

⁷ Ku̱me nang, to maava tu̱k ɓa, to Yi ɓaran. Yang nu̱ke to Yi ɓaranang, Magham ka sa to zu̱m ɗye mbu̱ ge ɓaran.

Damtar ɓu̱ Bulus ku̱me Nduki nu̱ Galatiya

⁸ Mbu̱r fara nun zu̱n Magham ɓa, tun a ghar ghai ye mu̱lu̱mku nu̱ke ɗya aa nu̱m ku ɓa.

⁹ Yang nu̱ke tun wa zu̱n Magham leendang, “Aa nu̱ke ɗya Magham zu̱nki nu” Shi kikimndi tun a gaɓ ma mbu̱ shogarku ɓu̱ nduki nu̱ larji nang nu̱ke khukhutan kwang na? Ai, a khar ɗye zhiyaye ku. Nu̱m saki tun a shim gaɓ nu tun kha ma maavi ɓaanda tu̱ka?

¹⁰ Tun wa gaɓ tun a khutlo fu̱ɗarku ndu̱ chereku ndu̱ sarchiku zum zum ndu̱ sonyiriku.

¹¹ Ɗyi nun shiki nang wa sa tang tu̱k sawa, ba wa no za bonye nang zaki ɗyinonu nang wa kha bam!

¹² Yang nga khutonu nyeezaku, kha ma wa nga jiwa nga wa tun tu̱k yang nun shi zop ya sar da ɓa.

¹³ Tun wa zu̱n nu̱ ɗyine khaati nang shiki, saki tang gwa njiv ɓar ndu̱ Labar Mbarkandang ye nu gumapaali.

¹⁴ Aa nu̱ke pooni khaati nang shikyang aa ɓa ndu̱ damtar ye nu maɗyi, kap ndu̱ nang nun ndu̱mndi nga ɓa yang nun zhang nggu̱ti nga gha ɓa. Tun wa dlu̱ri nga ba wa no za nga nu̱ ru̱kti ɓu̱ Magham nu̱ ɗa zhurki viɗi, tun dlu̱ri nga ba wa nun dlu̱ki Masiya Yesu nu̱ varan.

¹⁵ Tun wa kasha maɗyi ye sarchi naandang! Yang leendang a fu̱n kashar nun shiki ku̱me nga ɗo? Ku̱me nga maita nu̱ ɗyine ye sarchi naandang mbu̱ ka shi, tu̱ga tun ka fu̱lokh yito nu tun vu̱r ya!

¹⁶ Yang leendang alapa tun wa gaɓ ndu̱ nga ma nu̱ zhangndi ɓaanu ku̱me nga zu̱ zhire ye nu?

¹⁷ Nduki nu̱ shogar wollo ku nang a shim gwa ɗyinonu, yang a ku̱rkya ɗyi mbarkandi ndu̱ tun ɓa. A shimkya shakh chele ɓaarem, ma ku̱ memu̱na nu gaɓ nu̱ she wora.

¹⁸ Ai, mbar ku̱ nduk shi pooni ɗyi nu̱ shiki ku nang, mbu̱ ku̱rkya ɗyi mbarkandi. Yang ku̱ shi aakochi tu̱k, nu̱ ku̱s mbu̱ nga nje su̱yen ndu̱ tun ɗyenda ɓa.

¹⁹ Tun qusonggi ɓanga, nang ke bonye nu̱ rapan nang zaki wa nokhzi nu̱ke a ɗyin purman ma kha nun dam. Yang ngga zu̱m guma ndu̱ bonye nang kope ɗye shir ɓu̱ Masiya wa kha gha mbu̱ memu̱na nu.

²⁰ Awai! Tu̱ga nga su̱yen ndu̱ tun leendang, mbu̱m nga su̱qura nu̱gha. Ai, nga damtaran maɗyi ku̱me tunu!

Shogar ɗyine yi ɓu̱ Khajara ndu̱ Saratu

²¹ Zu̱ ma ya, tun nu̱ke tun a shim ku̱ mbu nu Bibitang, tun wa da mbu̱ ɗyi nu̱ke Bibitang zu̱ki mu?

²² Jiwa a nje bu̱laran za qusa khuzuku a nje kha Yibram wor rap, dandang, man ɗya maava, dandang manang ɗya maava ɓa.

²³ Woi nu̱ke manang ɗya maava, Yibram gwa nda ve njiv nu̱ke ka khaki aa nyi woi. Yang ɓu̱ woi dandi nu̱ke man ɗya maava ɓa ndang kha nda nu̱ ku̱nshe alqawar nu̱ Magham shiki ye Yibram.

²⁴ Ɗyi nang a wutkya ɗyi nggur yerem, nusuku rapndi nang a khar wa pooni alqawarku rap. Khajara ke man maaviku, a khar wa alqawar nu̱ shiki ɗyin Dleng Sinai.

²⁵ Chin Khajara a khar wa chin ke Dleng Sinai nu̱ke a mbu̱ maa ɓu̱ Laru̱beku, a wut shipar ghai Urshalima nu̱ke a nje leendang, ku̱me chin ndu̱ qusonggi ɓaran ɗya maaviku.

²⁶ Yang ɓu̱ Urshalime nu̱ke a mbu̱ viɗi ɗya maava ɓa yang chin ke manerem.

²⁷ A nje bu̱laran za, “Shi kashari, to nokhzi nu̱ke kwarandan, to nu̱ke noka kha woi ɓa, shi zhanara to zhur ɗyim gho ku̱me ɓong memu̱na to nu̱ke no zu̱n bonye khar woi ɓa. Ku̱me qusonggi ɓu̱ nokhzi nu̱ke zhimen yaɓki nda gha wa shi khang ku. Wa duk qusonggi ɓu̱ nokhzi nu̱ke zhimen a nje su̱yen ndu̱ chin.”

²⁸ Nyeezaku, leendang chem wa kha ma qusonggi ɓu̱ Magham nu̱ ku̱nshe alqawarang ba wa nu̱ Yishaku khaki.

²⁹ Ye sarchi naandang woi nu̱ khaki nda ve njiv nu̱ ka khaki aakyang wa vu̱r bonye ye woi nu̱ khaki nda nu̱ ku̱nshe zalale ɓu̱ Jiimbi shakhshakhndi. Yang ɗyen ba wanang ma ɓar meeni.

³⁰ Yang a nje bu̱laran mbu̱ bu̱lar Ɓalar ɓu̱ Magham za, “Kombo nokhzi nu̱ke ɗya maavi nang ɓara ndu̱ woi ɓaranang. Ku̱me woi ɓu̱ maavi nang ɓu̱ gwa shakhti ɗye mbu̱ ge su̱yen ndu̱ woi ɓu̱ nokhzi nu̱ke ɗya maava ɓa ndang ɓa.”

³¹ Ku̱me nang, nyeezaku, chem qusonggi ɓu̱ maava ɓa, chem qusonggi ɓu̱ nokhzi nu̱ zalalyang.