Galatiyeku 3 - Mewar Alqawarang

Maito Ɓaarem wa Sa Chem kha Waare Zop

¹ Tun nggu̱bu̱ng Galatiyeku, ki zu̱mki ɗyinonwa? Nga nang, nga wutki Yesu Masiya nu̱ katlki nda gha ɗyin qu̱far kaatli ye nu ye dalangi.

² Yang ɓa, bu shi nga zhamndi ye nu kaada. Shwat Jiimbi shakhshakhndi a ɓa ye nu ku̱me tun a mbu Bibitang mu, yang ku̱me tun wa maita ɓalar nun tu̱kki?

³ Alapa tun nggu̱bu̱ngan wanang goma? Wonji tun wa nggaasan ndu̱ Jiimbi shakhshakhndi ɗawar ɗo, yang leendang tun a shim lauɗa san ndu̱ komkomi ɓaanu!

⁴ Yang leendang bonyeku zum zumndi nun zaki nang ku̱ kha bam mu? Tun a na wa ɗyen ka shi?

⁵ Magham nu̱ vu̱rki Jiimbi ɓaran ye nu, tu̱ shi ɗye lazhamku chele ɓanwang ɗa, shi ku̱me tun a mbu Bibiti mu, yang ku̱me maitar nun shiki sarchi nun tu̱kki ɓalar ɓu̱ Masiya mu?

⁶ Nggu̱t ma khar viti ɓu̱ Yibram ɓa. A nje bu̱laran za, “Ku̱me Yibram wa maita Magham, tu̱ Magham shiga nda nu̱ mbu̱ nu̱ dambi.”

⁷ Yang ɗo, zu̱n man gha nu̱ ɗyine nduki nu̱ maitaki Magham wor ke qusonggi ɓu̱ Yibram.

⁸ Bu̱lar Ɓalar ɓu̱ Magham wa zu̱ zhu za ɓeeni nduki nu̱ke ɗya Yakhudeku ɓa ka gwa khar waare sola gume Magham nu̱ ku̱nshe maitar nda. Ku̱me zhu wa zu̱ Labar Mbarkandang ye Yibram za, “Larji kap ka gwa barke nu̱ ku̱n shoro.”

⁹ Wanang tu̱k aaki maitaki Magham wa shi barke yenda, su̱yen ndu̱ Yibram nu̱ maito.

¹⁰ Jiwa kap nduki nu̱ tamanki za wor ka gwa dlu̱r she Magham ku̱me wora mbu Bibiti ɓu̱ Musa, wa mi barke ɓaanda. Jiwa bu̱lar Ɓalar ɓu̱ Magham wa zu̱ za, “Njif nu̱ke nu̱ mbu ɗyi nu̱ke a nje bu̱laran mbu̱ Lagarkati Bibitang ɓa, Magham wa mi barke ɓaran.”

¹¹ Ɗyi nang a ye dalangi, nduk a nje ka khaki nu̱ dambi she Magham nu̱ ku̱nshe khutlo bibitang ɓa. Ku̱me a nje bu̱laran za, “Nu̱ jeembu ka gwa ɗana nu̱ ku̱nshe maito.”

¹² Bibitang dlaran ve maito ɓa. Ba wa nu̱ke a nje bu̱laran za, “Njif nu̱ tlu̱naki ɗyiku nang kap ka ɗana nu̱ ku̱n she wora.”

¹³ Yang chem wa lawa mbe miiri barke ɓu̱ Bibitang, ku̱me Masiya wa gwa miiri barke ku̱me chem tu̱ dli ɗyinerem. Jiwa a nje bu̱laran za, “Kap njif nu̱ mu̱tki katlan me qu̱fari barke ɓaran miiran.”

¹⁴ Masiya Yesu dli ɗyineremang ma ku̱ barke nu̱ vu̱rki ye Yibramang khan ɗyine nduki nu̱ ke ɗya Yakhudeku ɓa tu̱k. Nang ke ɗyi nu̱ saki chem gwa Jiimbi nu̱ shiki alqawaranang nu̱ ku̱nshe maito nyem shiki.

Bibitang ndu̱ Alqawarang

¹⁵ Nyeezaku, bu wut nga ye nu mbe ɗyi nyem ka shiki meeni ndu̱ wuri. Mbu̱ nduki rap wa ching alqawar gha chele ɓaanda, tu̱ yang sa khar wora ma ku̱ kha ma saidu ɓu̱ alqawar nu̱ wor daki, nduk a nje nu̱ke ka laadaki nu̱ gha ɓa, yang nduk ɓu̱ paata ɗyi nggur nu̱gha mban zum ɓa.

¹⁶ Wanang tu̱k, Magham wa ching ndu̱ alqawar gha chele ɓaran ndu̱ Yibram ndu̱ pooni ɓaran tu̱k. Lagarkatang nu̱ zu̱ za, “Ndu̱ pooniku” ɓaran ɓa, ma ku̱ taman mi za wor khang. Zu̱ za, “pooni ɓaaro” nduk kaada, chin ke Masiya.

¹⁷ Ɗyi nu̱ke nga zu̱ranang chin ke, Magham wa ching ndu̱ alqawar chele ɓaran ndu̱ Yibram. Yang bibiti nu̱ ɗa ɓa ki si sonyi won vat ndu̱ ɗyin kunungndi qu̱rsan nang ɓu̱ sa tu̱ alqawar nu̱ shiki zhu tangndi nang kha bam ɓa.

¹⁸ Mbu̱ tu̱ga nduk ka gwa barke ɓu̱ Magham nang mbe mburi Bibitang, tu̱ga nduk ɓu̱ gwa nu̱ ku̱nshe alqawarang ɓa. Yang Magham mbe mu̱nkir ɓaran wa vu̱r barkyang ye Yibram nu̱ ku̱nshe alqawarang.

¹⁹ Yang mbu̱ wanang nu̱m saki tu̱ ɗa ɓa ndu̱ Bibitang na? Shaata Bibitang nu̱ si ma ku̱ wut sola ye dalangi. A ɓa si ma ku̱ shi boote si ma ɓar sarchi nu̱ke pooni ɓu̱ Yibram nang ka ɗa ɓa ki, ku̱me shi alqawarang ku̱me chin. Yang wonji Bibiti nang, ɗya nu̱ ru̱kti ɓu̱ Magham vu̱rki, nu̱ ku̱nshe nu̱ somta.

²⁰ Yang nduk ka gang nu̱ viri nu̱ tala, mbu̱ke ɓalarang a chele ɓu̱ nduki rap, yang Magham kaada.

Ɗyi nu̱ Ɗa Ɓa ki ndu̱ Bibitang ku̱men

²¹ Yang ɗa, Bibitang a zhang yen ndu̱ alqawar ɓu̱ Maghamang mu? Ɗyen wanang shwat ɓa! Mbu̱ tu̱ga aa ɓa ndu̱ Bibiti nu̱ka vu̱rki nyifiri ye nduki, tu̱ga nduk ka gwa dambi ɓu̱ Magham nu̱ ku̱nshe mbu Bibitang.

²² Yang bu̱lar Ɓalar ɓu̱ Maghamang zu̱ za larji kap a khar maavi ɓu̱ sola. Shi wanang ku̱me ku̱ vu̱r alqawar nu̱ shiki nu̱ ku̱nshe maitar Yesu Masiya ye nduki nu̱ maitaki.

²³ Me ku̱ maito a ɓa, Bibiti nang wa khiirerem gha wa chem a zhaaru̱m, chem ɓu̱ ɗu̱ma lawar ɓa kope nu̱ ku̱nshe maito mbe Masiya a ɓa.

²⁴ Nang a wutan za wa sa rem nu̱ mbu̱ khar Bibitang ma ku̱ kha ma ɗyi nu̱ke ka daki rem nu̱ she Masiya. Chem gwa khar waare sola mbe maito nu̱ ku̱nshe nang.

²⁵ Yang leendang nu̱ke sarchi ɓu̱ maito a ɓa, chem a mbu̱ bu̱n Bibitang tu̱k ɓa.

²⁶ Tun kha ma qusonggi ɓu̱ Magham kap ɓaanu nu̱ ku̱nshe maitar Masiya Yesu.

²⁷ Wa shi baptisme ye nu kap ɓaanu mbe Masiya, ku̱me nang tun wa da ɗye shir ɓu̱ Masiya, tu̱ kha ma ɗye shir ɓaanu.

²⁸ Ku̱me nang, nduk ɓu̱ shakh chele ɓu̱ Yakhudeku ndu̱ Khelene ku ɓa, woi ndu̱ maava ɓa, yang nusu ndu̱ khusku tu̱k zum ɓa. Kap ɓaarem chem ɗyi dandi mbu̱ khar ɓaarem mbe Masiya Yesu.

²⁹ Yang mbu̱ tun ɓu̱ Masiya, tun wa kha ma pooni ɓu̱ Yibram, tun ka gwa ɗye mbu̱ ge ɓu̱ Magham viɗ ɗyine alqawarang.