Galatiyeku 2 - Mewar Alqawarang

Pudekwang wa Dlu̱ Bulus

¹ Qu̱rse sonyi gwanggu̱m vat tang gaɓ nu̱ Urshalima tu̱k su̱yen ndu̱ Barnaba ndu̱ Titus.

² Nga ɗu̱ ku̱me Magham wa wut ya za ɗu̱ nga, nang khu̱lki tang qa dlegumeku ɓu̱ nu̱ mbu Yesu kwang nu̱ konggol tang zu̱ su̱ Labar mbarkandi nang wopaki ye nduki nu̱ke ɗya Yakhude ku ɓa ndang ye wora. Nga shi wanang ku̱me nang shim ku̱ tlu̱nar nang shiki ndu̱ nu̱ke nga shiran kha bam ɓa.

³ Yang aa chin Titus nu̱ yir ɓanga, nu̱ke ɗya Gu̱rik, ai nduk a nje nu̱ rannaki nda za ku̱ dla san nu̱gha ɓa.

⁴ Ɓalar ku̱ nduk dla san nu̱gha nang a vi she nduki nu̱ kotaran ku za wor nyeezerem, nu̱ ɗa viki nu̱ chele ɓaarem mbu̱ tuka. Yang a vi ku ma su̱bu̱r dli ɗyin nyem gwaki nu̱ ku̱nshe Masiya Yesu nu̱ gha. A shim gaɓ ndu̱ chem ku ma maava,

⁵ yang nyem vu̱r zalale ni ye wor sar da ɓa, ma ku̱ zhire ɓu̱ Labar mbarkandi nang kha gha su̱yen ndu̱ tunu.

⁶ Yang ɓu̱ nduki nu̱ daki wor za ɗya dlegumeku nang, nu̱ shaata aa nu̱m nu̱ ɗyine shogar nang shiki ɓa. (Ye nar ɓanga, aa nu̱zhinakon kikimndan kap da sha. Ku̱me Magham nu̱ka kuma nduk ndu̱ ɗyi nu̱ke nduk a naran dam ɓa).

⁷ Yang wa na tlu̱nar nu̱ Magham vu̱rki ya ku, nu̱ wopar Labar mbarkandi ye ku̱rjiku nu̱ke su̱ wor dlaran ɓa, ba wa nu̱ vu̱rki ye Biturus ku̱ shi ye Yakhudekwang.

⁸ Magham nu̱ ru̱kki Biturus nu̱ she Yakhudekwang, chin ru̱kki nga tu̱k nu̱ she nduki nu̱ke ɗya Yakhudeku ɓa ndang.

⁹ Nar mu̱nkir nu̱ Magham shiki ya saki tu̱ Yaqub ndu̱ Biturus ndu̱ Yokhana tlogha san. Wor dlu̱ki nga ndu̱ Barnaba memu̱na wor da wor ke du̱mbu̱r ɓu̱ dlegumeku ɓu̱ tabar nu̱ mbu̱ Yesu ku. Chem wa zu̱ chele ɓaarem nu̱ ɗyine chem ka ɗu̱ she nduki nu̱ke ɗya Yakhudeku ɓa, yang ɓaanda wor ka ɗu̱ she Yakhudeku.

¹⁰ Yang tu̱k wa kor yerem ku za ku̱ mona mi ni nu̱ song ku nu̱ke a nje chele ɓaanda ɓa. Yang nang ke ɗyi nu̱ke nga kasha shiran maɗyi.

Bulus wa shi Ɓalar ve Biturus

¹¹ Sarchi nu̱ Biturus a ɓa ki Antakiya, nyem gamaki yiti nu̱ yiti tang shi ɓalar ve nda, ku̱me wa shi ɗyi nu̱ke torop ɓa.

¹² Gumapaali, wa ka zu̱m ɗye zu̱mndi ndu̱ nu̱ mbu Yesu ku nu̱ke ɗya Yakhudeku ɓa. Yang nu̱ Yaqub ru̱kki ɓeeni nduki ma yir Antiyok, tu̱ Biturus dut varan ɓar she nduki nu̱ke ɗya Yakhudeku ɓa ndang tu̱ kha nu̱ konggol. Shi wanang ku̱me a sawa nduki nu̱ke a shim ku̱ dla su̱ nduki nu̱ke ɗya Yakhudeku ɓa nu̱gha.

¹³ Tu̱ yang ɓeeni Yakhudeku nu̱ mbu Yesu kwang shi song zhire tu̱ mbu ɗyi nu̱ Biturus shikyang, tu̱ ɗyen sa Barnaba tu̱ gal gha tu̱k.

¹⁴ Nang nggu̱tki, nu̱ shi ɗyi nang ku mbe zhire ɓu̱ Labar Mbarkandang ɓa, tang ze Biturus mbiyiti wor kap, nga za, “To Yakhude nduku, yang kap ndu̱ ta khar viti ɓaaro wa njif nu̱ke ɗya Yakhude nduk ɓa. Yang leendang ta ma ranna nduki nu̱ke ɗya Yakhudeku ɓa ku̱ mbu me ghai ɓu̱ Yakhudeku mu?”

¹⁵ “Chem nu̱ke ɗya chem khar ye Yakhudeku, yang chem nu̱ sola wa nduki nu̱ke ɗya Yakhudeku ɓa.

¹⁶ Yang chem wa zu̱n nu̱ ɗyine nduk ɓu̱ kha waare sola gume Magham nu̱ ku̱nshe mburi Bibitang ɓa, kope wa maita Yesu Masiya. Ku̱me nang chem wa vu̱r vaarem ye Masiya Yesu. Chem shi wanang ma ku̱ kha mi waare sola gume Magham nu̱ ku̱nshe dlar vaarem nu̱ ve Masiya, nyem mbu nu̱ ku̱nshe mburi Bibitang ɓa. Ku̱me nduk a nje nu̱ke ka khaki waare sola gume Magham nu̱ ku̱nshe mburi Bibitang ɓa.

¹⁷ “Yang mbu̱ chem a shim khar waare sola gume Magham nu̱ ku̱nshe dlar vaarem nu̱ ve Masiya, nang wa wut nu̱ ɗyine chem nu̱ vaarem chem nu̱ sola ɗo, yang nang a wutan za Masiya gaɓki ndu̱ chem ma nu̱ sola mu? Auwo, ɗyen wanang sar da ɓa!

¹⁸ “Mbu̱ yang nga gaɓ tang ki du̱n ɗyi nang gu̱ɗaki nu̱ gha, nga kha ma nu̱ zhar bibitang.

¹⁹ Ai, nu̱ ku̱nshe bibitang nga mu̱tan, bibitang tlaghaki nga, ma kha nga ma nu̱ nyifi she Magham.

²⁰ Wa kaatli nga gha su̱yen ndu̱ Masiya. Yang nga nje ndu̱ nyifi ɓa, Masiya kya khar mbya. Khar ɓang mbu̱ man var nang, nga shikya khar maito mbe Yi ɓu̱ Magham, chin nu̱ ndolaki nga tu̱ mu̱t ku̱me nga.

²¹ Ɓang nang zhang mu̱nkir ɓu̱ Magham gha ɓa. Yang mbu̱ nduk ka gwa jeembu she Magham nu̱ ku̱nshe mburi bibitang, nang wa wut nu̱ ɗyine Masiya shikya mu̱ti bamndi.”