Galatiyeku 1 - Mewar Alqawarang

Zoɓar Qaandi

¹ Lagarkati nang a vi sha, nga Bulus pude ɓu̱ Yesu. Khar ɓang ma pude nang ɗya nduk datki nga ɓa yang shir ɓu̱ nduk zum ɓa. Daatang a vi she Yesu Masiya ndu̱ Magham Zhinki nu̱ jiiki ndu̱ Yesu ɓar mbe mu̱ti.

² Nyeezerem nu̱ke a su̱yen ndu̱ nga fan, kap a qaandi ye tabar ɓu̱ nu̱ mbu Yesu ku nu̱ke a Galatiya.

³ A zoɓa qaandi ye nu ku za, ku̱ mu̱nkir ndu̱ qaandi memu̱nar na viki she Magham ndu̱ Yesu Masiya kha gha su̱yen ndu̱ tunu.

⁴ Masiya Yesu vu̱rki varan ku̱me solarku ɓaarem, ma ku̱ lawa rem mbu̱ zaman malkandi nang. Yang shi nang mbe shimndi ɓu̱ Magham Zhinerem.

⁵ Bu ku̱ zhaaji kha nda koɗokhsi ɓa. Amin.

Labar Mbarkandi nggur a nje Zum ɓa

⁶ Nga lazham ɗyi nu̱ke tun a shiran nang maɗyi. Mbu̱ sarchi koɗomma tun a shim njig njif nu̱ qaki nu nu̱ ku̱nshe mu̱nkir ɓu̱ Masiya ma mbu mewar labar nggur zum.

⁷ Ai, Labar mbarkandi nggur a nje zum ɓa. Shwat nduki a nje nu̱ke a rokhdla nu nu̱ mbu̱ yen, a shim nggoɗ nda zhire ɓu̱ Labar mbarkandi ɓu̱ Masiya nu̱gha.

⁸ Yang nga zu̱ran ye nu, mbu̱ njif nggur chele ɓaarem wa zu̱ labar nggur ye nu zum ndu̱ Labar mbarkandi nyem zu̱ki ye nu nang, aa ɗya nu̱ ru̱kti ɓu̱ Magham na viki viɗi, bu ku̱ Magham mi barke ɓaran!

⁹ Ba wa nyem zu̱ki ye nu zhu, nga maataran ye nu leendang nu̱ ɗyine kap njif nu̱ shiki waazu labar nggur ye nu zum ndu̱ Labar mbarkandi nun tu̱kkyang, bu ku̱ Magham mi barke ɓaran!

¹⁰ Yang ɓalar nang ka sa tu̱ nduki da za nga shimkya ku̱ nduki maita nga mu? Auwo. Nga shimkya ku̱ Magham tlogha su̱ ɗyi nu̱ke nga shiran mu yang nga shimkya ku̱ mu̱n nga memu̱na nduki mu? Auwo. Mbu̱ nga shim mu̱n memu̱na nduki tu̱ga nang kha ma maavi ɓu̱ Masiya ɓa.

Magham Qaki Bulus ku̱ kha ma Puda

¹¹ Nyeezaku, nga shim zu̱n nu nu̱ ɗyine wopar Labar mbarkandi nu̱ke nga san nang a vi she nduk ɓa.

¹² Nga dlu̱ kha Yesu Masiya mbu̱ zhine yelndi.

¹³ Tun wa tu̱k labar khar viti ɓang zhu mbu̱ pooni ghaari ghai ɓu̱ Yakhudekwang, nang chingki gha shanggu̱ɗang. Tang ki vu̱r bonye maɗyikandi ye tabar ɓu̱ nu̱ mbu Magham ku, tang shim ku̱ su̱ya nga wor nu̱gha guma da.

¹⁴ Tun wa zu̱n tu̱k nu̱ ɗyine nga mbu̱ ghaari ghai ɓu̱ Yakhudeku nang. Nga gwa zu̱mndi guma mbu̱ ghaari ghai nang tang duk nu̱ ji ɗyina ku nga nu̱ zhiri mburi me ghai ɓu̱ zhikanerem ku nang maɗyi.

¹⁵ Yang Magham mbu̱ mu̱nkir ɓaran wa daati nga me ku̱ kha nga nu̱ dam, tu̱ qa nga, tu̱ shim

¹⁶ ku̱ qu̱n nji yita ma zu̱n nga Yi ɓaran Yesu, ma ku̱ shi nga waazu Labar Mbarkandang ye nduki nu̱ke ɗya Yakhudeku ɓa. Yang nu̱ shiki ɗyiku nang ya, nang laɓ sawari she aaki ɓa,

¹⁷ yang nang ɗu̱ Urshalima she nduki nu̱ khaki ma pudeku gumera ɓa. Ɗyi nang shiki chin ke, tang ji fan ndu̱ fan tang ɗu̱ mbu̱ dlar ghai ɓu̱ Laru̱beku, kom tang a gaɓ nu̱ Damaskus.

¹⁸ Kom qu̱rse sonyi kunung, tang ɗu̱ Urshalima ma na Kefas chin ke, Siman Biturus. Tang a shi qaandi gwanggu̱m qurmun chem a su̱yen.

¹⁹ Ye sarchi ni, nang na aa da chele ɓeeni Pudekwang ɓa, kope Yaqub khachin Zhinerem gwaanji.

²⁰ Ɗyi nu̱ke nga bu̱laran ye nu nang, ɗya kwatama ɓa, ɗya ba zhire ni, chele ɓang ndu̱ Magham.

²¹ Qu̱rse nang tu̱k, nga ɗu̱ mbu̱ ghai Siriya ndu̱ Kilikiya.

²² Yang ye sarchi naandang, tabar ɓu̱ nu̱ mbu Masiya nu̱ke a mbu̱ ghai Yakhudiya, nu̱ zu̱ndi nga ku yiti ndu̱ yiti ɓa.

²³ Yang wa tu̱k labaran ku za, “Njif nu̱ ka vu̱rki bonye yerem zhu nang, wa gaɓ a waazu maito nu̱ shimki ku̱ su̱ya nji nu̱ ghang!”

²⁴ Tu̱ gor dlu̱m Magham ku ku̱me ɗyi nu̱ shiki nu̱ ku̱n sha.