Filipiyeku 4 - Mewar Alqawarang

Par Du̱mbu̱ri

¹ Ku̱me nang, tun nyeezaku nang saki nu̱ ve memu̱nara aakochi, tang ki kasha na nga nu maɗyi, tun nun ka mu̱nki memu̱nara, tun nang ka shiki wakhti ndu̱ tunu. Nga khutonu tun ching gha shaanggu̱ɗang mbe Zhinkir gwaanji, tun nu̱ke nga ndolaran.

² Nga khutoro Afodiya, nga khutoro Su̱ntiki, tun shi khar mu̱nkandi ndu̱ yen mbe Zhinkir gwaanji.

³ Tun, nyeezaku mbu̱ tlu̱nar nang nu̱ shir zhire, nga khutonu ku̱ shaata nu nusuku nang, ku̱me wa shi tlu̱nar ku maɗyi su̱yen ndu̱ nga mbu̱ tlu̱nar wopar Labar Mbarkandang. Wor ndu̱ Ku̱lemen ndu̱ ɓeeni nduki nu̱ke a tlu̱nar su̱yen ndu̱ nga, wor nu̱ke dlu̱m wor a nje bu̱laran mbu̱ Lagarkati Nyifiri.

⁴ Shi ma zhakhzhakh mbe Zhinkir gwaanji aakochi. Nga maataran ye nu tu̱k nga za, shi ma zhakhzhakh!

⁵ Kha ma ndu̱ ɗu̱bar memu̱na ye aaki. Zhinerem gwaanji wa shi bing ɓari.

⁶ Ku̱ damta nu ndu̱ aa nu̱m ɓa, mbu̱ aa nu̱m kap gho ma ye Magham mbe barar ndu̱ khuti, su̱yen ndu̱ kunari.

⁷ Shir wanang ka sa tu̱ qaandi memu̱nar ɓu̱ Magham nu̱ke wa peeta kwaari ɓu̱ nduku, khutlo memu̱na nu ndu̱ kwaari ɓaanu mbe Masiya Yesu.

⁸ Ye lauɗar san, nyeezaku, ki ma kwaari ɗyine ɗyiku nu̱ke ɗya zhire, ɗyiku nu̱ke zhaaji si, ɗyiku nu̱ke torop, ɗyiku nu̱ke shakhshakh. Kom ndu̱ ɗyiku nu̱ke ku̱ nduk shimi, ɗyiku nu̱ke ku̱ nduk na tu̱ makhta, ɗyiku nu̱ dukki mbaari, kom ndu̱ ɗyiku nu̱ke ku̱ nduk kuna.

⁹ Shi ma boote ndu̱ ɗyi nun shogaki tun dlu̱ ye vaanu ndu̱ ɗyi nun tu̱kki, ɗyi nun naki mbya. Shir wanang ka sa tu̱ Magham nu̱ vu̱rti qaandi memu̱na kha gha su̱yen ndu̱ tunu.

Bulus wa kuna Vu̱rti ni nu̱ mbu Yesu ku nu̱ Filipi shiki

¹⁰ Nga kasha maɗyi mbe Zhinkir gwaanji ku̱me tun wa gwa zalale nggu̱ti nga leendang. Aa nu̱ke tun wa damta ndu̱ nga mbu̱r fara, yang nun gwa zalale ku̱ shi nu aa nu̱m ya ma ku̱ wut nu ɓa.

¹¹ Nang zu̱ wanang ku̱me nga mbu̱ song ɓa. Ai, nga shoga khar mbe aa nyi damta mbu̱ aa nyi tun nang gwaki ɗyina mban.

¹² Nga zu̱n khar mbu̱ nugun ndu̱ khar mbu̱ yele. Nga zu̱n ashiri khar mbu̱ aa nyi tunu, aa mbu̱ meeri aa mbu̱ zhi mbu, aa mbu̱ song aa mbu̱ gwari.

¹³ Ngga ɗu̱ma shi aa nu̱m nu̱ ku̱nshe Masiya nu̱ ka vu̱rki du̱mbu̱r shiran ya.

¹⁴ Yang kap ndu̱ nang tun wa shi torop nun shaataki nga mbu̱ bonye ɓanga.

¹⁵ Tun Filipiyeku, ai, tun wa zu̱n nu̱ ɗyine ye sarchi nun nggaki su̱ gwa Labar Mbarkandang ndu̱ sarchi nang njigki Makidoniya. Tabar ɓu̱ nu̱ mbu Yesu ku a nje nu̱ gontaki ɗyin wor ndu̱ nga tu̱ vu̱r ɗyin me khar wor ya ɓa kope tun ɗyenda.

¹⁶ Ai, aa mbu̱r fara sarchi nu̱ke nga Tasalonika tun wa ka ru̱k ɗyiku nu̱ke nga gangndan ya sar khang.

¹⁷ Yang taman nu za nga laɓkya ɗyi nggur she nu ɓa, auwo, nga shimkya gwa nu ɗyi nu̱ke ka shaataki nu̱ ɗyine du̱ngndi ɓaanu.

¹⁸ Tun wa shi aa nu̱m ya, ɗyi nun shiki wa duk ɗyi nu̱ke nga gangndan. Mba zhiran, nu̱ke nga gwa ɗyiku nun ru̱kki su̱ ya mbu̱ khar Apafaroditus. Nang ɗya sadke nu̱ke zhiran mu̱n maɗyi, ɗya vu̱rti mbarkandi nu̱ke Magham ka dlu̱ki san tu̱ tu̱k mu̱ndan.

¹⁹ Maghamndi ɓang ka vu̱r ɗyi nu̱ke tun a gangndan kap ye nu ku̱rti khang gu̱nar ɓaran mbe Masiya Yesu.

²⁰ Zhaaji wa kha Maghamndi ɓaarem ndu̱ Zhinkir ɓaarem, koɗokhsi ɓa. Amin.

Khar Mu̱ndi

²¹ Shi ma qaandi ye nduki ɓu̱ Magham mbe Masiya Yesu. Nyeezerem nu̱ke a su̱yen ndu̱ nga ku a zoɓa qaandi ɓaanda ye nu.

²² Nduki ɓu̱ Magham kap a qaandi ye nu, yang nu̱ shi wa nduki nu̱ke a mbu̱ rafti ɓu̱ Kaisar ɓa.

²³ Ku̱ mu̱nkir ɓu̱ Zhinerem gwaanji Yesu Masiya kha gha su̱yen ndu̱ tunu. Amin.