Filipiyeku 3 - Mewar Alqawarang

Gwar dlu̱r Zhirekandi she Magham

¹ Ye lauɗar san, nyeezaku, shi ma kashar mbe Zhinerem gwaanji. Bu̱lar ɗyiku nang ye nu nu̱ kha ma ɗye damta ya ɓa. Yang wonji ka kha ndu̱ boota ye nu mbe maito ɓaanu.

² Ku̱r ma ɗyinonu nu̱ yiɗaku nandang, nu̱ tlu̱nar malkandi ku, nu̱ dlar vaanda nu̱gha, za wora dla si nggwa.

³ Ai, chem ke nu̱ dlarsi mbarkandi, chem nyem ka gharki ghai ye Magham nu̱ ku̱nshe Jiimbi shakhshakhndi, chem a wakhti ndu̱ Masiya Yesu, yang nyem maita tlu̱nar ɗyin mbu̱ manva ɓa.

⁴ Aa nu̱ke ngga ɗu̱ma dla vara nu̱ ve tlu̱nar ɗyin mbu̱ manva, mbu̱ ngga shi. Mbu̱ nduk a nje nu̱ke a tamandan za tun kha nda nu̱ke chin ka ɗu̱ma dla varan nu̱ ve tlu̱nar ɗyin mbu̱ man va, ku̱ zu̱n nu̱ ɗyine nga dukti nda ve nang.

⁵ Ku̱me ɓang dla sa ya ye fu̱ɗar nu̱ miyasi nu̱ khaki nga, mbe dlu̱dlarsi, nga ye Israila, me sham ɓu̱ Banyami, nga Yakhuda nggeng. Yang mbu̱ chem a shikya ɓalar mbu me ghai nu̱ke a mbu̱ ghaari ghai ɓu̱ Yakhudekwang, nga Parise mban.

⁶ Mbu̱ ɗya ɓalar zhiri ghaari ghai ɓu̱ Yakhudeku, nga vu̱r bonye ye tabarku ɓu̱ nu̱ mbu Yesu, mbe mburi ɗyiku nu̱ Bibitikwang zu̱ki, zop vya mban ɓa.

⁷ Yang ɗyi nu̱ khaki ya ma zu̱mndi guma mbu̱r fara, wa kha ya ma asar leendang ku̱me Masiya.

⁸ Ai, tun a nje nu̱ dukki zu̱ndi Masiya Yesu Zhinerem gwaanji zhaaji ɓa. Nga da aa nu̱m ma asar sha, mbu̱ nga ku̱rti nda ndu̱ zhaaji zu̱ndi Masiya Yesu Zhinerem gwaanji. Nga mbu̱ɗ aa nu̱m kap ku̱me chin. Nga gaɓ ndu̱ wor ma ɗyi bamndi ma ku̱ gwa nga Masiya,

⁹ tang khan mbe nda tu̱k. Yang ku̱me dambi ɓang mbe mbu Bibiti ghaari ghai ɓa, kope nu̱ ku̱nshe dambi nu̱ nduk ka gwaki nu̱ ku̱nshe maito mbe Masiya, nang ke dambi nu̱ke nduk ka gwaki she Magham mbe maito.

¹⁰ Nga shim ku̱ zu̱n nga Masiya ndu̱ zalale ji ɓaran ɓar mbe mu̱ti. Nga shim ku̱ za nga me ɓanga mbu̱ bonye nu̱ zaki, tang kha wa chin mbe mu̱ti ɓaran.

¹¹ Ku̱me aa shi kikimndi, gwa nga tang khu̱l ye jiiri ɓar mbe mu̱ti.

Zhangndi Vari ma Khu̱dli ye maa Lauɗarsi Ɗarang

¹² Nang zu̱ nga za nga khu̱l ye maa nu̱ shipaki ku̱ khu̱l nga ɓa, yang nang kha nyeedlan zum ɓa, nga zhangkya vara ma ku̱ gwa nga tang shi loobo, ku̱me Masiya Yesu wa woɗa shiga nga nu̱ mbu̱ ɓaran.

¹³ Nyeezaku, nang gwa tang khuɓ ɗyen nu̱ mbu̱ khara dong ɓa. Yang ɗyi da nang ka shiki chin ke, nga ka mona ndu̱ ɗyi nu̱ peetaki, tang vu̱r du̱mbu̱r ɓang ye ɗyi nu̱ke a guma.

¹⁴ Nga zhang vara ku̱ gwa nga tang basan ma gwa ɗye ɓi qari ma yir mbu̱ viɗi nu̱ Magham qaki nga maaran nu̱ ku̱nshe Masiya Yesu.

¹⁵ Ku̱me nang ku̱ shi mi kwaari ɗyine ɗyiku nang kap ɓaarem, chem nyem gorki mbe ɗyin mbu̱ Jiimba. Mbu̱ yang kwaari ɓu̱ ɓeeni nduki chele ɓaanu wa ngga yen ndu̱ nang, Magham ka wut ɗyen ye nu tu̱k ba.

¹⁶ Ɗyi gwaanji chin ke, ye maa nyem khu̱lki kap, ku̱ zu̱m mi guma si.

¹⁷ Nyeezaku, gonta ma ɗyinonu ndu̱ ɓeenan tun mbu nu ɗyi nu̱ke chem a shiran, tun nggu̱t nduki nu̱ khar viti ɓaanda khaki torop ndu̱ ɗyi nyem wutki ye nu tu̱k.

¹⁸ Jiwa nduki a nje nang shiki ɓalar ye nu ɗyine wor sar khang. Yang nga maataran ye nu tu̱k leendang ndu̱ ɗyim ghoori, nu̱ ɗyine khar viti ɓaanda wa sa wor tu̱ kha ma nu̱ zhangndi mu̱ti ɓu̱ Masiya ɗyin qu̱far kaatlang.

¹⁹ Yang ka su̱ya ku ye lauɗar san. Mbu wor ke maghamndi ɓaanda. A worol ku ndu̱ ɗye kawar nu̱ shiki ku. Ɗyin larji ke damtar ɓaanda.

²⁰ Yang chem qusa kwaaɗar mbu̱ viɗi. Chem a bu ɓar ɓu̱ Nu̱ ɗana rem fara mbu̱ viɗi, chin Zhinerem gwaanji Yesu Masiya.

²¹ Chin ke nu̱ zalale sar aa nu̱m kap nu̱ mbu̱ bu̱nan. Ka nggoɗ man vaarem ndu̱mkandi nang nu̱gha nu̱ ku̱nshe zalale ɓaranang, tu̱ gaɓ ndu̱ wor tu̱ kha wa man varan nu̱ zhaaji nang.