Filipiyeku 2 - Mewar Alqawarang

Wuti Katar Ɗyin ɓu̱ Masiya

¹ Mbu̱ke khar viti ɓaanu mbe Masiya a pa du̱mbu̱r ye nu, mbu ndolar ɓaran a du̱ng memu̱na nu, mbu tun a khar ndu̱ yen mbe Jiimba, mbu tun a ndola yen tun a tu̱k zhiyaye ɓu̱ yen.

² Nga khutonu ku̱ shi nu ɗyi nu̱ke ka mu̱nki mba maɗyi. Bu ku̱ kwaari ɓaanu kha da, tun a ndola yen, tun a gonta ɗyinonu ye yen.

³ Ku̱ shi nu aa nu̱m ndu̱ ndolar ɗyin ndu̱ gwaari ɗyin ɓa, tun kata ɗyinonu nu̱gha. Bu ku̱ aaki gaɓ ndu̱ mu̱dlen wa dukti nda.

⁴ Ku̱ ɗang nu vaanu ɗyenda ɓa, ɗang ma nduki tu̱k.

⁵ Bu ku̱ kha nu ndu̱ pooni ɗye shir ɓu̱ Masiya Yesu.

⁶ Aa nu̱ke chin Magham, nu̱ da khar ɓaran ku̱rku̱r ndu̱ Magham ma ɗyi nggur ɓa,

⁷ tu̱ yang gaɓ ndu̱ ɗyinan wa chin aa nu̱m ɓa, tu̱ da shipar ɓu̱ maava. Tu̱ ɗa ɓa mbu̱ shipar ɓu̱ nduku.

⁸ Na ɓa ki mbu̱ shipar ɓu̱ nduku, tu̱ kata ɗyinan nu̱gha tu̱ qan su̱quran gha ye mu̱ti, i, khar pooni mu̱ti nu̱ kaatli me qu̱fari.

⁹ Ku̱me nang Magham wa vu̱r zhaaji yenda tu̱ duk aa nu̱m. Tu̱ vu̱r dlu̱m yenda nu̱ dukki aa nyi dlu̱m,

¹⁰ Ku̱me mbu̱ dlu̱m Yesu, aa nyi me purmi ku̱ kurum gha, ɗyiku nu̱ke a viɗi, ndu̱ vu̱ghai, ndu̱ ɗyi nu̱ke a gargha ndu̱ maa vu̱ghai.

¹¹ Aa nyi ghin ka saida za Yesu Masiya ɗya Zhinerem gwaanji, ma vu̱r zhaaji ye Magham Zhinki.

Khar Ɓaarem ma Yarang ɓu̱ Larji

¹² Ku̱me nang, raptaku, nga khutonu ba wa nun ka tu̱kki ɓalar ɓang aakochi aa nga nje su̱yen ndu̱ tun ɓa, yang leendang shaata man si nu̱ke nga nje su̱yen ndu̱ tun tu̱k ɓa. Zu̱m ma guma tun ki tlu̱nar nu̱ gwar ɗanar ɓaanu ndu̱ sawari ndu̱ dlu̱rti vari.

¹³ Jiwa Magham kya tlu̱nar mbu̱ memu̱na nu, viɗ ɗyine ku̱rti shimndi ɓaran, ma ku̱ shi nu ɗyi nu̱ dlu̱ki mban.

¹⁴ Mbu̱ ɗyi nu̱ke tun a shiran kap, ku̱ shi nu nda ndu̱ ruru ndu̱ keele ɓa,

¹⁵ ma ku̱ kha nu waare zop, nduki nu̱ke wakaran, qusonggi ɓu̱ Magham nu̱ke chiɓir mbir ve wor ɓa. Tun a khar mbu̱ nduki galkandi nu̱ mu̱narku, yang kha ma ma yarang nu̱ke a wuti chele nduki nu̱ larji nang.

¹⁶ Kha ma ma yarang nu̱ke a wuti, tun khuɓ ɓalar nu̱ka vu̱rki nyifiri nang maɗyi, ngga shi wakhti ye Fu̱ɗar nu̱ke Masiya ka ɗa gaɓki ku̱me nang shi wute tang za bonye bam ɓa.

¹⁷ Vu̱rti zhire ɓaanu ndu̱ tlu̱nar nun shiki mbe Zhinerem gwaanji a khar wa dlar sadka yenda, yang aa tom ɓang mbu̱ɗki ku̱me sadke nang, ngga tu̱k mu̱ndan, tang kasha ndu̱ tun kap tu̱k.

¹⁸ Memu̱na nu ka kha ɓong, tun kasha su̱yen ndu̱ nga tu̱k.

Timoti ndu̱ Epafu̱roditus

¹⁹ Nga sa memu̱nara mbe Zhinerem gwaanji Yesu nu̱ ɗyine ngga ru̱k Timoti nu̱ she nu ɓu̱ shoɓ ɓa, ma ku̱ gwa nga du̱mbu̱r tu̱k nu̱ ku̱nshe tu̱kti labar ɓaanu.

²⁰ Nang na njif nu̱ saki nun ve memu̱naran wa chin ɓa.

²¹ Aaki damtakya nu̱ ɗyi ɓaran ɗyenda, nu̱ damta nu̱ ɗyi ɓu̱ Yesu Masiya ɓa.

²² Ai, tun wa zu̱n ki ke Timoti kwa, tun wa zu̱n tlu̱nar Labar mbarkandi nyem shiki ndu̱ chin wa woi ndu̱ zhin.

²³ Ku̱me nang nga sa memu̱nara nu̱ ɗyine ngga ru̱kti nda nu̱ she nu ɗau mbu̱ nga tu̱k ɗyi nu̱ke ka ɗatlki ndu̱ nga gana fan.

²⁴ Yang nga maita Zhinkir gwaanji shwat nu̱ ɗyine nga ndu̱ vara ngga ɗa ɓa ɓu̱ shoɓ ɓa.

²⁵ Nga na wa shipa a ru̱k nga Apafaroditus. Ɗya khata ndu̱ mu̱dla mbu̱ tlu̱nar nu̱ke nga shiran, yang ɗya mu̱dla mbu̱ wute ɓang tu̱k, ɗya ye ru̱kti ɓaanu nu̱ke tun a ru̱kki nda ma ku̱ shi tlu̱nar ya.

²⁶ Jiwa a shim na nu kap, yang damtaran ku̱me tun wa tu̱k za wa shi khaati.

²⁷ Wanangang, khaati wa ngga nda wa ka mu̱ɗi. Yang Magham wa tu̱k zhiyaye ɓaran, yang chin ɗyenda ɓa, wa tu̱k zhiyaye ɓang tu̱k. Mbu̱ wanang ɓa tu̱ga su̱bu̱rti mbu ka shi ya khang.

²⁸ Nang ke ɗyi nu̱ saki tang shim ru̱kti nda ma ku̱ kasha nu na nda tu̱k, tu̱ yang kata damtarku ɓanga.

²⁹ Gaɗa ma nda ndu̱ kashar maɗyi ku̱me Zhinerem gwaanji. Tun vu̱r zhaaji ye pooni nduki nang wa nu̱ shipaki,

³⁰ ku̱me wa shi bing mu̱ti ku̱me tlu̱nar ɓu̱ Masiya ɗo, wa vu̱r nyifi ɓaran ma shaatar nu̱ke nun ɗu̱ma shiran ya ɓa.