Filipiyeku 1 - Mewar Alqawarang

Zoɓar Qaandi

¹ Zoɓar qaandi nang a vi she Bulus ndu̱ Timoti maaviku ɓu̱ Masiya Yesu, ma yir she kap nu̱ mbu Masiya Yesu nu̱ke a mbu̱ ghai Filipi. Kom ndu̱ dlegumeku ɓu̱ tabar ɓu̱ nu̱ mbu Yesu ku ndu̱ nu̱ shaatar ɓu̱ dlegumeku.

² Ku̱ Mu̱nkir ndu̱ qaandi memu̱nar na viki she Magham Zhinerem ndu̱ Zhinerem gwaanji Yesu Masiya kha gha su̱yen ndu̱ tunu.

Barar ɓu̱ Bulus ye Filipiyeku nu̱ Mbu Yesu

³ Nga ka kuna Magham mbu̱ nga kwaaronu aakochi.

⁴ Nga ka shi kashar maɗyi sarchi nu̱ke nga barar ye Magham ku̱me tun kap,

⁵ ku̱me tun wa gonta ɗyinonu ndu̱ nga mbu̱ tlu̱nar wopar Labar mbarkandi nang, ji ye fu̱ɗar nu̱ gumapaali ma ɓar meeni.

⁶ Nga maita nu̱ ɗyine chin nu̱ nggaki su̱ tlu̱nar mbarkandi chele ɓaanu nang, ka zu̱m guma ndu̱ shiran ma yir ve lauɗar san ye Fu̱ɗar nu̱ke Masiya Yesu ka ɗa gaɓki.

⁷ Wa shi torop ku̱ kor nga nu aakochi, tun kap ɓaanu, nu̱ke nga sa nun ve memu̱nara. Ku̱me a nga khiiran zhaaru̱m, aa nga kanggakya Labar mbarkandang chem wa shakh mu̱nkir ɓu̱ Magham su̱yen.

⁸ Magham ka saida nga nu̱ ɗyine nga shim na nu nu̱ pooni ndolar ɓu̱ Masiya Yesu.

⁹ Nga barar ku̱ Magham sa tu̱ ndolar ɓaanu ndu̱ zu̱ndi Magham nun shiki ndu̱ dar mbu̱ aa nyi tun shaata tu̱ duk wanang.

¹⁰ Gwar wanang ka shaata nu tun ɗu̱ma dat ɗyi nu̱ dukki mbaari, ku̱me ku̱ Fu̱ɗar ɓar ɓu̱ Masiya gwa nu wakaran, waare zop.

¹¹ Nga barari ku̱ khar viti ɓaanu kha nyeedlan ndu̱ tlu̱nar mbarkandi ku nu̱ ka wutki ɗye shir mbarkandi nu̱ke nduk ka gwa poonan she Yesu Masiya ɗyenda ma vu̱r zhaaji ndu̱ khamndi Magham.

Bulus a khar viti ɓaran ku̱me Masiya

¹² Nyeezaku, nga shim zu̱n nu nu̱ ɗyine, ɗyi nu̱ gwaki nga nang wa sa tu̱ Labar Mbarkandang shaata zu̱mndi guma.

¹³ Ɗyi nu̱ gwaki nga nang saki tu̱ sojeku nu̱ke a patle ɓu̱ kuji ndu̱ ɓeeni nduki zu̱n za khiiri nga gha zhaaru̱mang ku̱me Masiya.

¹⁴ Khiiri nga gha nu̱ shiki zhaaru̱m nang wa sa tu̱ nyeezerem mbe Zhinerem gwaanji shaata gwa du̱mbu̱r wopa ɓalar ɓu̱ Magham sawa su̱ ɓa.

¹⁵ Ɓeeni nduki a wopa ɓalar ɓu̱ Masiya ku̱me zhiri ndu̱ me mu̱sonki, yang ɓeenan a shiran ndu̱ memu̱na wor da.

¹⁶ Ɓu̱ nduki nu̱ke a shiran ku ndu̱ memu̱na wor dandang, a shiran ku̱ mbe ndola, ku̱me wa zu̱n ku za khiiri nga gha zhaaru̱mang ku̱me nga kangga Labar Mbarkandang.

¹⁷ Yang ɓu̱ nduki nu̱ke a wopa Masiya ku̱me zhiri ndu̱ me mu̱sonkirang, a shiran ku ku̱me ndolar ɗyin a shiran ku memu̱na wor da ɓa. Nu̱ zhang ku̱ shaata nga za bonye mbu̱ zhaaru̱mang ɓa.

¹⁸ Yang ba, aa shi kikimndi, ndu̱ nduki nu̱ke a shiran ndu̱ kwaari ɗyi nggur zum ndu̱ nduki nu̱ke a shiran ndu̱ memu̱na wor da, a wopakya Masiya ku. Nang ke ɗyi nu̱ saki tang kasha ɗyen. I ɗo, ngga zu̱m guma ndu̱ kashar nang,

¹⁹ ku̱me nga zu̱n bararku ɓaanu ndu̱ shaatar ɓu̱ Jiimbi ɓu̱ Yesu Masiya, ka ngga nga gha ku ye lauɗar san.

²⁰ Nga kashari, nga sa memu̱nara nu̱ ɗyine ku̱ ɗa ɓa nga ndu̱ ɗye kawa mbe tlu̱nar ɓu̱ Zhinerem gwaanji ɓa, yang gwa nga du̱mbu̱r tang shi ɓalar ɓang sawa su̱ ɓa. Ku̱me leendang ba wa nu̱ sotndi ku̱ Masiya gwa zhaaji sha, aa nga nje ndu̱ nyifiri aa nga mu̱ɗi.

²¹ Ku̱me ɓang, mbu̱ nga nje ndu̱ nyifiri, nga nje ku̱me Masiya, mbu̱ yang nga mu̱ɗi ɗya zu̱mndi guma.

²² Mbu̱ nga nje ndu̱ nyifiri mbu̱ man var nang, ngga shi tlu̱nar nu̱ke boota si. Yang nang zu̱n mbu̱ ngga datkya nyi mban ɓa.

²³ Kap ɓaanda mbar ya. Yang ye shimndi ɓanga, ngga gaɓ nu̱ she Masiya tang kha gha su̱yen ndu̱ chini. Wanang dukki nu̱ mbaari.

²⁴ Yang ma ku̱ shaata nga nu, kuzhom kha nga gha ndu̱ nyifiri mbu̱ man var nang.

²⁵ Nu̱ke nga maita zhire ɓu̱ ɗyi nang, nga zu̱n nu̱ ɗyine ngga kha gha su̱yen ndu̱ tun kap ma zu̱m nu guma ndu̱ kashar mbe maito ɓaanu.

²⁶ Khar ɓang su̱yen ndu̱ tun tu̱k, ka sa kashar ɓaanu mbe Masiya Yesu tu̱ kha nyeedlan tu̱ boosa ku̱me nga.

²⁷ Aa shi kikimndan shi ma khar nu̱ shipaki Labar mbarkandi ɓu̱ Masiya. Aa nga ɓa ma na nu, aa na nga ɓa ɓa, gwa nga labaran za tun chingndan shanggu̱ɗang, kwaari ɓaanu da mbu̱ Jiimbi da, tun a wute su̱yen ma gwa pooni maito nu̱ke a mbu̱ Labar Mbarkandang.

²⁸ Sawa nu nu̱ zhangndiku ɓaanu ɓa; tun kha wang, nang ka wut ye wor nu̱ ɗyine ka su̱ya ku yang ɓaanu tun ka ɗana, ku̱me Magham ka shiki nang.

²⁹ Ku̱me mu̱nkir nu̱ shiki ye nwang, nu̱ shi ma ku̱ maita nu Masiya ɗyenda ɓa, shi ma ku̱ za nu bonye ku̱me chin tu̱k.

³⁰ Tun a za pooni bonye nun naki nga zaranang, yang tun wa tu̱k za aa leendang nga za poonan tu̱k.