Filimon 1 - Mewar Alqawarang

Zoɓar Qaandi

¹ Lagarkati nang a vi she rem, nga Bulus nu̱ke a nje khiiran zhaaru̱m ku̱me tlu̱nar ɓu̱ Masiya Yesu ndu̱ mu̱dlerem Timoti. Ma yir she Rapterem Filimon nu̱ke chem a shim nda maɗyi, yang ɗya mu̱dlerem mbu̱ tlu̱nar nu̱ke chem a shiran.

² Bu̱lar nang tu̱k ma yir she Afiya khaterem nusukandi ndu̱ Arkipus mu̱dlerem mbu̱ dakhlari ndu̱ tabar ɓu̱ nu̱ mbu Yesu ku nu̱ka tabaki nu̱ kaa ɓaaro.

³ Ku̱ mu̱nkir ndu̱ qaandi memu̱nar na viki she Magham zhinerem ndu̱ zhinerem gwaanji Yesu Masiya kha gha su̱yen ndu̱ tunu.

Kunar ndu̱ Barar ɓu̱ Bulus ye Magham ku̱me Filimon

⁴ Nga ka kuna Magham ku̱me to aakochi sarchi nu̱ke nga bararku ɓanga.

⁵ Jiwa nga ka tu̱k labar maito ɓaaro mbu̱ Zhinerem gwaanji Yesu ndu̱ ndolar nu̱ke ta wutan ye nduki ɓu̱ Magham kap.

⁶ Nga barar yoro ku̱me ching na gha kartap mbe zu̱r maito ɓa ye nduki, ku̱me ku̱ da na mbu̱ ɗyi mbarkandiku kap nu̱ke ɗya ɓaarem mbe Masiya.

⁷ Mu̱dla, nga kasha ndolar nu̱ke ta wutan maɗyi, ta pa du̱mbu̱r ya. Jiwa ta sa memu̱na nduki ɓu̱ Magham tu̱ kha shokhku̱rokh.

Khuti ku̱me Onisimus

⁸ Ku̱me nang, aa nu̱ke mbe Masiya, ngga ɗu̱ma ɓu̱tl memu̱nara tang sa to shi ɗyi nu̱ shipaki shi na.

⁹ Yang ku̱me ndola, nga khutoro, nga Bulus, nu̱ke nga geema yang leendang nga khiiran zhaaru̱m ku̱me Masiya Yesu.

¹⁰ Nga khutoro me ɓu̱ woi ɓang Onisimus nang khaki wa zhinki she nda sarchi nu̱ke nga zhaaru̱m.

¹¹ Ɗau fara nu̱ kha ndu̱ boota yor ɓa, yang leendang wa kha ndu̱ boota yerem.

¹² Nga ru̱kti nda ma ku̱ ɗa ɓa shoro, chin nu̱ke memu̱nara a ɗyine nda.

¹³ Nga shim tu̱ga njig nga nda nu̱ sha tu̱ ki tlu̱nar ya me ɓaaro ye sarchi nu̱ke nga nje khiiran zhaaru̱m ku̱me Labar Mbarkandang.

¹⁴ Yang nang shim shi nga ɗyi nggur waare shimndi ɓaa ɓa, nang shim ku̱ me mbarkir ɓa kha wa no shim shiran ɓa yang nduk wa ranna ro.

¹⁵ Bai Onisimus njig to me qaandi koɗomma ku̱me to ka ɓa dlu̱r nda nu̱ sho guma da.

¹⁶ Ta ma dlu̱r nda ma khar maava ɗyenda ɓa, wa duk wanang leendang, a khar khaterem nu̱ke chem a shimndan. Mbu̱ nga shim nda to ɗa, ai to ka shim nda dukti nang, ye khar ɓaran maavi ɓaaro ndu̱ njif nu̱ maitaki Zhinerem gwaanji!

¹⁷ Mbu̱ chem a khar khachinki ndu̱ to mbu̱ tlu̱nar nang, to dlu̱r nda wa nu̱ke to ka dlu̱ki nga.

¹⁸ Mbu̱ Onisimus wa shi zop yoro, aa kudum ɓa kya ɗyine nda, to zham sha.

¹⁹ Nga Bulus nu̱ ɗyina kya bu̱lar nang nu̱ khara nu̱ ɗyine ngga dli ɗyen.

²⁰ Wanang tu̱k, khachinkir ɓanga, nga khutoro to shi mu̱nkir nang ya ku̱me Zhinerem gwaanji. Mu̱n memu̱nara ya mbe Masiya!

²¹ Nga maita nu̱ ɗyine to ka mbu zu̱r ɓanga, nang ke ɗyi nu̱ saki tang shi bu̱lar nang, nga zu̱n nu̱ ɗyine to ka shi dukti ɗyi nang zu̱kyang.

²² Qu̱rse nang, dooso maa qaandi ya, ku̱me nga sa memu̱nara nu̱ ɗyine Magham ka tlogha su̱ bararku ɓaanu tu̱ ngga nga gha tang a gaɓ nu̱ she nu.

²³ Apafaras nu̱ke a zhaaru̱m su̱yen ndu̱ nga ku̱me Masiya Yesu a zoɓa qaandi ye nu.

²⁴ Markus, ndu̱ Aristakus, ndu̱ Dimas, ndu̱ Luka, wor nu̱ke ɗya mu̱dla ku mbu̱ tlu̱narang a zoɓa qaandi ye nu tu̱k.

²⁵ Ku̱ mu̱nkir ɓu̱ Zhinerem gwaanji Yesu Masiya kha gha su̱yen ndu̱ jiimbonu.