Afiseku 6 - Mewar Alqawarang

Khar ɓu̱ Qusongga ndu̱ Man nda ndu̱ Zhin nda

¹ Tun qusongga, mbu ma zu̱r ɓu̱ manonu ndu̱ zhinonu mbe Zhinerem gwaanji, ku̱me nang ke ɗyi toropndi.

² Zu̱r mbu̱ bibiti nu̱ gumapaali nu̱ tabaki nda ndu̱ alqawarang wa zu̱ za, “Vu̱r zhaaji ye zhu ndu̱ mo,

³ ma ku̱ khar viti ɓa kha ɗawar, to shoɓ larji.”

⁴ Tun zhinkirku, ku̱ sa nu qusonggi ɓaanu tu̱ shi shokhna ɓa, tun moola wor mbe shogar ndu̱ wuri mbe njiv ɓu̱ Zhinkir gwaanji.

Maaviku ndu̱ Zhin Wor nu̱ Rafa

⁵ Tun maaviku, mbu ma zu̱r ɓu̱ zhinonu nu̱ rafa nu̱ larji nang. Tun vu̱r zhaaji ye wora, tun mbu zu̱r ɓaanda mbe aa nu̱m, ndu̱ memu̱na nu da, ba wa tun a shikya tlu̱nar ɓu̱ Masiya.

⁶ Shi nu tlu̱nar nar yiti, wa nduki nu̱ke a shim ku̱ nduki kuna wor ɓa, nu̱ke tun maavi ɓu̱ Masiya, shi ma ɗyi nu̱ke Magham a shimndan, ndu̱ memu̱na nu da.

⁷ Tun shi tlu̱nar ɓaanu ndu̱ kasha, wa tun a shikya tlu̱nar ɓu̱ Magham, tlu̱nar ɓu̱ nduk ɓa.

⁸ Tun wa zu̱n nu ɗyine aa nyi tlu̱nar mbarkandi nu̱ nduk shiki ka gwa ɗye ɓiiri she Zhinkir gwaanji, aa maava aa ye rafa.

⁹ Tun zhinkirku nu̱ rafa, shi ma ye maaviku ɓaanu ba wanang tu̱k. Tun njig vu̱r sawar ye wora. Zu̱n man gha nu̱ ɗyine tun ndu̱ wor kap Zhinkir gwaanji ɓaanu a nje mbu̱ viɗi, yang nu̱ka shim njif nggur tu̱ duk njif nggur ɓa.

Ɗye Dakhlarku ɓu̱ Magham

¹⁰ Ye lauɗar san pa ma du̱mbu̱r ye vaanu mbe Zhinkir gwaanji ndu̱ zalale ɓaran du̱mbu̱rkandi.

¹¹ Da ma aa nyi ɗye dakhlar ɓu̱ Magham nu̱ kha nu ma ku̱ gwa nu tun ching gha shaanggu̱ɗang tun shi kare ndu̱ ghu̱rtiku ɓu̱ Sheɗan.

¹² Ai, dakhlar ɓaaremang chem a shiran ndu̱ nduk wa chem ɓa. Chem a shiran ndu̱ khu̱kheetiku nu̱ mu̱narku nu̱ke a mu̱na viɗi. Kom ndu̱ nu̱ kwaaɗarku, ndu̱ nu̱ zalaleku, ndu̱ wor nu̱ke kwaaɗar qaandi virkir zhumndi nang a kha wora.

¹³ Ku̱me nang ghar ma ɗye dakhlarku ɓu̱ Magham kap ma ku̱ gwa nu tun ching gha shaanggu̱ɗang mbu̱ fu̱ɗar malkandi nang, mbu̱ tun wa woɗa aa nu̱m kap, tu̱ gwa nu chingndan.

¹⁴ Ku̱me nang, ching ma gha ndu̱ du̱mbu̱r ɗo, tun gu̱n wudlonu nu̱ gha ndu̱ zhire, ku̱ dambi kha ma lukti vi nu̱ kanggar memu̱nanu.

¹⁵ Tu̱ daasar ma yir ndu̱ Labar mbarkandi nu̱ qaandi memu̱na, kha ma paghamndi mbu̱ saaro nu.

¹⁶ Qu̱rse nang tu̱k, ku̱ maito kha ma partu̱to ɓaanu nu̱ke tun ka daki tun yeta ghabtiku nu̱ ɓai nu̱ka viki she nu̱ Mu̱narang.

¹⁷ Sa ma jere vi, chin ke ɗanari, ndu̱ kaskar nu̱ Jiimba, chin ke Ɓalar ɓu̱ Magham.

¹⁸ Tun ki barar mbe zalale ɓu̱ Jiimba aa nyi sarchi, ndu̱ aa nyi pooni bararku ndu̱ khutiku, kha ma daasaran aakochi tun zu̱m guma ndu̱ barari ye nduki ɓu̱ Magham.

¹⁹ Shi ma barar ya tu̱k ku̱me mbu̱ nga qu̱n mya ma ɓala aakochi gwa nga ɗyi nu̱ke ngga zu̱ki ye nu tang zu̱r nda tu̱k waare sawa. Ma wut nga ɗyi tukakandi nu̱ mbu̱ Labar Mbarkandang ye nduki.

²⁰ Tlu̱nar nang wa sa tang kha ma yiti Magham, yang kap ndu̱ nang nga nje gu̱ndan! Shi ma barar ya ku̱me sarchi nu̱ke nga waazu tang shi sawa su̱ ɓa ba wa nu̱ shipaki shi nga.

Lauɗarsi Ɓalari

²¹ Tikikus, mu̱dlerem nu̱ke chem a ndolaran, nu̱ shir zhire mbu̱ tlu̱nar ɓu̱ Zhinkir gwaanji, ka zu̱ aa nu̱m ye nu ma ku̱ zu̱n nu ɗyi nu̱ke nga mban ndu̱ ɗyi nu̱ke nga san.

²² Nga ru̱kti nda nu̱ she nu ku̱men, ma ku̱ zu̱n nu ɗyi nu̱ke chem a mban kom ku̱ pa du̱mbu̱r ye nu tu̱k.

²³ Nyeezaku, ku̱ qaandi memu̱na ndu̱ ndola ndu̱ maito nu̱ ɗa viki she Magham Zhinki ndu̱ Zhinerem gwaanji Yesu Masiya kha gha su̱yen ndu̱ tunu.

²⁴ Ku̱ mu̱nkir ɓu̱ Magham kha nduki nu̱ke a ndola Zhinerem gwaanji Yesu Masiya koɗokh si ɓa.