Afiseku 4 - Mewar Alqawarang

Khar Ɗyi Dandi mbe Mbu Yesu

¹ Ku̱me nang, nga nu̱ke nga nje khiiran zhaaru̱m ku̱me mburi Zhinerem gwaanji, nga khutonu ku̱ shi nu pooni khar nu̱ shipaki zhaaji ɓu̱ qar nu̱ qaki nu.

² Tun kha ndu̱ katar ɗyin tu̱ memu̱na nu kha ɓu̱tokh ndu̱ kanaɗyi, ndu̱ dlu̱r yen mbe ndolari.

³ Shi ma ɗyi nu̱ke tun ka ɗu̱maki kap ma ku̱ ɗang nu khar da nu̱ Jiimba vu̱rki ye nu, nu̱ ku̱nshe qaandi memu̱nar nu̱ gu̱nki nu nu̱ ye maa da.

⁴ Jiwa man vara nje da, ndu̱ Jiimbi da. Wa nu̱ke Magham qaki nu nu̱ ku̱nshe sar memu̱nar da.

⁵ Zhinkir gwaanji da, maito da, baptisme kaada tu̱k.

⁶ Magham kaada, chin ke Zhin nduki kap. Chin kya ɗyin nduki kap, a tlu̱nar ɓaran nu̱ ku̱nshe nduki kap, yang a mbe aaki.

⁷ Yang wa shi vu̱rti mu̱nkir ye aa nyi nduk da chele ɓaarem nu̱ ku̱nshe khang ɗyi nu̱ Masiya vu̱rki.

⁸ Ba wa nu̱ Ɓalar ɓu̱ Magham zu̱ki za, “Sarchi nu̱ dlaki nu̱ mbu̱ viɗi tu̱ da wor nyin ku̱ski su̱yen ndu̱ chin, tu̱ yang shi vu̱rti ye nduki ɓaran.”

⁹ Nu̱m ke mbu̱ “Dlaki nu̱ mbu̱ viɗa na?” Mban za wa zhur nu̱ gargha mbu̱ maa vu̱ghai!

¹⁰ Chin nu̱ zhurkyang, chin dlaki tu̱k nu̱ mbu̱ viɗi, ma ku̱ nyel maa viɗi ndu̱ maa vu̱ghai tu̱k.

¹¹ Chin shiki vu̱rti ye nduki. Wa shi vu̱rti nu̱ khar ma pude ɓu̱ Yesu ye ɓeeni nduki, ɓeenan ɗya annabiku, ɓeenan ɗya wopar Labar Mbarkandang, ɓeenan ɗya nu̱ khutlo nduki yang ɓeenan ɗya nu̱ shogar ku ɓara.

¹² Shi nang ma daasa nduki ɓu̱ Magham ku̱ da kuɗar tlu̱nar ma du̱ndi man var Masiya.

¹³ Kope chem wa khu̱l kap ye khar ma tun da mbe maito, kom ndu̱ zu̱ndi Yi ɓu̱ Magham, ndu̱ gwaari, chem khu̱l ye maa chingndi nu̱ke Masiya shimki.

¹⁴ Nang ka sa chem ɓu̱ gaɓ ma qusongga, ku̱ nduki ku̱s palam ndu̱ khankal ɓaarem, chem ki yir guma ndu̱ gana mbe aa nyi poona shogar galkandi wa nu̱ pu̱rsi ɗyim ka tu̱paki tun ɓa. Yang chem ɓu̱ nggu̱ɗ nu̱ mbu̱ lambar ɓu̱ nduki nu̱ wuti me ghu̱rti malkandi ndu̱ kaɗari bamndi ɓa.

¹⁵ Me ɓu̱ nang, ki mi zu̱ zhire ye yen mbe ndola, chem gor mbe aa nyi tunu, tu̱ ɗye shir ɓaarem kha wa ɓu̱ Masiya nu̱ke a khar wa chin ke ɗyin.

¹⁶ Nu̱ ku̱n she nda me bar ɓu̱ nduk kap a ku̱s yen ku ku̱me tlu̱nar nu̱ shaatar ɓu̱ gu̱rauku. Mbu̱ aa nyi me ba a tlu̱nar ɓaran torop, man var nduk ka ki shaata gwaari a mbu̱ndi mbe ndola.

Mewar Nyifiri mbe Masiya

¹⁷ Nga ɓalar nang ye nu, yang nga shikya maataran ye nu mbu̱ dlu̱m Zhinerem gwaanji nu̱ ɗyine, ku̱ kha nu wa nduki nu̱ke ɗya Yakhudeku ɓa nda ɓa, nu̱ kwaari bamndiku.

¹⁸ Memu̱na wor zhum maɗyi mbu̱ zu̱ndi ɓaanda. Wa mbu̱ɗ nyifi nu̱ke Magham ka vu̱rki, ku̱me song zu̱ndi ndu̱ kaaku̱ɗakh ɗyin ɓaanda.

¹⁹ Wonji kawa ve wor ɓa. Wa sa ɗyin wor ma shi ɗye shir ku malkandi, a kasha shir aa nyi tlu̱nar zop ndu̱ shimndi zu̱mndi guma mban.

²⁰ Tun yang nun shoga tun wanang she Masiya ɓa!

²¹ Nga maita nu̱ ɗyine tun wa tu̱k labar ɓaran. Nu̱ke tun nduki ɓaran, wa shoga zhire nu̱ke a mbe Yesu ye nu.

²² Ai, ɗyi nu̱ shogaki viɗ ɗyine khar viti ɓaanu nu̱ zhu chin ke, ku̱ shakh nu ndu̱ ɗye shir malkandi nu̱ke tun shiki gana fara. Pooni ɗye shir nu̱ khaki su̱bu̱rtan ku̱me ɗye lambarku nu̱ke a shimndan;

²³ Wa shipa ku̱ gaɓ ndu̱ kwaari ɓaanu ndu̱ memu̱na nu tu̱ kha mewaran.

²⁴ Da ma pooni mewar ɗye shir mbarkandi nu̱ Magham du̱ngki mbu̱ shipar ɓaran. Ɗye shir nu̱ka wutki varan mbe shir dambi zhirekandi, ndu̱ khar wakakandi.

²⁵ Ku̱me nang tun shakh ɗyinonu ndu̱ kotama! Tu̱ aaki ki zu̱ zhire ye nu̱ bing ɓaran, ku̱me chem me bar ɓu̱ yen ɗo.

²⁶ Mbu̱ memu̱na nu wa su̱bu̱ri, ku̱ njig nu tu̱ sa nu ma sola ɓa. Ku̱ fu̱ɗar nggu̱ɗ tu̱ na shokhna ɓa.

²⁷ Yang ku̱ vu̱r nu zalale nggur ye Sheɗan ɓa.

²⁸ Ku̱ nu̱ muuru muura tun sar da tu̱k ɓa. Me ɓu̱ nang ku̱ shi tlu̱nar mbarkandi ndu̱ kharan, tu̱ ɗu̱ma gwa ɗyi nu̱ke ka shaataki nduki nu̱ke tun kha wor ɓa.

²⁹ Ku̱ ɓalar malkandi a vi mbu̱ me nu ɓa, zu̱ ma kya ɗyi nu̱ke ka khaki ndu̱ boota ma ku̱ pa nu du̱mbu̱r ye yen wa nu̱ke a gangndan ku. Shir wanangang ka sa tu̱ ɓalar ɓaanu kha ndu̱ boota ye nduki nu̱ke a tu̱ktan.

³⁰ Ku̱r ma vaanu, ku̱ su̱bu̱r nu memu̱na Jiimbi shakhshakhndi ɓu̱ Magham nu̱gha ɓa, ku̱me chin ke saidu ɓu̱ Magham nu̱ke ka naki nu̱ si Fu̱ɗar wuri za tun ɓaran.

³¹ Shakh ma ɗyinonu ndu̱ ɗyooti mbu, ndu̱ chiti memu̱na, ndu̱ shokhna, ndu̱ gangndi dakhlari, ndu̱ pu̱ziku bam bam, ndu̱ aa nyi pooni mu̱na.

³² Tun shi mbarkir ye yen, tun na zhiyaye ɓu̱ yen, tun ndu̱m nu̱ ve yen ba wa nu̱ Magham ndu̱mki nu̱ ve nu nu̱ ku̱nshe Masiya.