Afiseku 3 - Mewar Alqawarang

Tlu̱nar nu̱ Bulus shiki ye nduki nu̱ke ɗya Yakhudeku ɓa

¹ Ku̱me nang, nga Bulus, nu̱ khiiki nga gha zhaaru̱m ku̱me Masiya Yesu ma ku̱ kha ndu̱ boota ye nu tun nu̱ke tun Yakhudeku ɓa.

² Nga maita nu̱ ɗyine tun wa tu̱k labar vu̱rti nu̱ Magham shiki ya mbe mu̱nkir ɓaran ma ku̱ shi nga tlu̱nar chele ɓaanu ma shaata nu.

³ Nang ke ɗyin mbu̱ tukar nu̱ Magham wutki ya ɗyine shimndi ɓaran tukakandi, ba wa nang bu̱laki ye nu koɗom ɗyinan.

⁴ Mbu̱ tun wa nggu̱t mban, tun ka da mbu̱ ɗyi nang zu̱nki ɗyine ɗyi tukakandi ɓu̱ Masiya.

⁵ Nu̱ zu̱ nang ye nduki nu̱ zhu ɓa, yang leendang Magham wa wut ye pudeku ndu̱ annabiku ɓaran datkandi nu̱ ku̱nshe Jiimbi ɓaran.

⁶ Ɗyi tukakandi nang, chin ke nduki nu̱ke ɗya Yakhudeku ɓa wa kha ma nu̱ gwar shakhti ɗye mbu̱ ge su̱yen ndu̱ chem Israileku nu̱ ku̱nshe Labar mbarkandi ɓu̱ Masiya Yesu. Yakhudeku ndu̱ nduki nu̱ke ɗya Yakhude ku ɓa wa kha wa me bar ɓu̱ man var da. Kom tu̱k ka gwa me ɓaanda mbu̱ alqawar nu̱ Magham shiki nu̱ ku̱nshe Masiya Yesu.

⁷ Wa gaɓ ndu̱ nga tu̱k ma nu̱ tlu̱nar Labar mbarkandi nang. Yang tlu̱nar nang ɗya vu̱rti ɓu̱ Magham ya, nu̱ vu̱rki ya nu̱ ku̱nshe mu̱nkir ɓaran, nang ke zalale nu̱ke a tlu̱nar mbya.

⁸ Aa nu̱ke nga aa nu̱m mbe nduki ɓu̱ Magham ɓa, tu̱ yang vu̱rkya mu̱nkir nang ya, ma ku̱ ɗu̱ nga ndu̱ gu̱nar Labar mbarkandi ɓu̱ Masiya nu̱ zhaaji nu̱ka ku̱naki shigar nang ye nduki nu̱ke ɗya Yakhudeku ɓa.

⁹ Magham, nu̱ du̱ngki aa nu̱m, wa shim ku̱ shaata nga aaki tu̱ zu̱n ɗyi tukakandi nyin daasaki nu̱ shoɓki a nje tukaran mbu̱ memu̱naran.

¹⁰ Ɗya shimndi ɓaran leendang, ku̱ tabar ɓu̱ nu̱ mbu Yesu wut kaɗari ɓu̱ Magham zum zum ye nu̱ kwaaɗarku ndu̱ nu̱ zalaleku nu̱ke a mu̱na viɗi.

¹¹ Ba wa nu̱ Magham daasaki ku̱ shi gumapaali, ma ku̱ tlu̱na nda mbe Masiya Yesu Zhinerem gwaanji.

¹² Mbe nda kom ndu̱ mbe maitar nyem shiki yenda chem wa gwa du̱mbu̱r ɓar she Magham ndu̱ shokhku̱rokh me bu̱n sawa su̱ ɓa.

¹³ Ku̱me nang nga khutonu, ku̱ me bu̱nonu datl ku̱me bonye nu̱ke nga zaran ku̱me tun ɓa. Ai, bonye nu̱ke nga zaran nang ka kha ndu̱ zhaaji ye nu.

Barar nu̱ Bulus shiki ku̱me nduki nu̱ Afisa

¹⁴ Ku̱me nang nga kurum gha gume Zhinerem nu̱ mbu̱ viɗi,

¹⁵ chin nu̱ saki dlu̱m ye aa nyi me sham nu̱ke a mbu̱ viɗi ndu̱ nu̱ vu̱ghai.

¹⁶ Nga khuti nda ku̱ vu̱r vu̱rti nggur ye nu mbu̱ gu̱nar zhaaji ɓaran. Tu̱ pa du̱mbu̱r ye nu ndu̱ zalale ɓaran, ma ku̱ kha nu shokhku̱rokh mbu̱ memu̱nanu nu̱ ku̱nshe Jiimbi ɓaran.

¹⁷ Tu̱ Masiya khan mbu̱ memu̱nanu nu̱ ku̱nshe maito. Nga barar ye nu̱, ma nu̱ke tun wa shi dlu̱dlarsi tun ku̱s maa vu̱ghai ɗyiɗying mbe ndola.

¹⁸ Tun gwa zalale su̱yen ndu̱ nduki ɓu̱ Magham kap. Tun da mbu̱ dlamdlam, ndu̱ kirti, ndu̱ gwaari, ndu̱ mboɓong ndolar ɓu̱ Masiya.

¹⁹ Nga barar tu̱k ku̱ zu̱n nu ndolar ɓu̱ Masiya nu̱ dukki du̱mbu̱r ku̱ nduk zu̱ni, ma ku̱ nyedli nu ndu̱ kap pooni nyedli ɓu̱ Magham.

²⁰ Leendang ku̱ zhaaji kha Magham nu̱ke ka ɗu̱ma shi ɗyi nu̱ke chem ɓu̱ ɗu̱ma shigaran ɓa, ka ɗu̱ma shi dukti ɗyi nyem khuɗki ndu̱ nyem korki, ba wa nu̱ke zalale ɓaran a tlu̱nar mberem.

²¹ Ku̱ zhaaji kha nda shwat mbe tabar ɓu̱ nu̱ mbu Yesu ndu̱ mbe Masiya Yesu, mbu̱ sarchiku kap, koɗokhsi ɓa. Amin!