Afiseku 2 - Mewar Alqawarang

Viri Ɓar mbe Mu̱ti ma Yir mbe Nyifiri

¹ Ɗau fara tun wa shi khar wa nduki nu̱ mu̱tki, ku̱me zop ɓaanu ndu̱ khar nu̱ke tun a shiran mbu̱ solarku.

² Nang ke sarchi nu̱ke tun mbu ki njiv malkandiku nu̱ larji nang, tun a mbu kuji ɓu̱ nu̱ zalaleku nu̱ mu̱na viɗi, nang ke khu̱kheetiku malkandi nu̱ka sokhki nduki ku̱ zhang mbu zu̱r ɓu̱ Magham gha.

³ Chem kap wa wora ɗau fara, chem a mbu shimndiku ɓu̱ man vaarem, chem a shikya ɗyi nu̱ man vaarem ndu̱ memu̱narem zu̱ki yerem ɗyenda. Ku̱me ɗye shir ɓaarem ɗya ɓu̱ man va, tu̱ga shokhnar ɓu̱ Magham a ɓa ɗyinerem ba wa nu̱ke a nje ɗyine wora.

⁴ Yang Magham ɗya nu̱ nar zhiyaye maɗyi, ndolar ɓaran yerem khang maɗyi,

⁵ ba ye sarchi nu̱ke chem mu̱tan mbu̱ solarku ɓaarem, tu̱ vu̱r nyifiri yerem su̱yen ndu̱ Masiya. Ɗana nu nu̱ ku̱nshe mu̱nkir ɓaran.

⁶ Wa ji ndu̱ chem su̱yen ndu̱ Masiya, chem gwa maa khar mbu̱ viɗi, nu̱ ku̱nshe Masiya Yesu.

⁷ Yang Magham shi nang ma ku̱ wut mu̱nkir ɓaran nu̱ke koɗokhsi ɓa ye aa nyi sarchi nu̱ke a ɓari. Wut mu̱nkir ɓaran nang, mbe Masiya Yesu.

⁸ Ai, mu̱nkir ɓu̱ Magham saki tun gwa ɗanar nu̱ ku̱nshe maito ɓaanu. Tun shiki ɓa, ɗya mu̱nkir ɓu̱ Magham.

⁹ Tlu̱nar ɓaanu saki ɓa, ku̱ aaki makhta ɗyinan ɓa.

¹⁰ Ai, chem ndu̱ ɗyinerem chem tlu̱nar ɓu̱ Magham, du̱ngnderem mbe Masiya Yesu, ma ku̱ shi mi tlu̱narku mbarkandi nu̱ Magham woɗaki daasaran yerem ma ku̱ shi mi gumapaali.

Chem Da mbe Masiya

¹¹ Ku̱me nang, kor ma khar ɓaanu ɗau fara tun nu̱ke tun Yakhudeku ɓa. Nduki nu̱ka qaki var wor za wor “nu̱ dlarsi” nang, wa ka qa nu za, “Nu̱ song dlarsi ku.” (Yang wonji dlarsi nang ɗya nu̱ man va, nu̱ka shiki ndu̱ khar.)

¹² Kor ma ɓa, ye sarchi naandang tun nu̱ gonta nu ndu̱ Masiya ɓa, maa ching kha nu mbu̱ Israila ɓa, tun a mbu̱ alqawar nu̱ Magham shiki ndu̱ zhikaneremku nang ɓa. Ɗye sar memu̱na kha nu mbu̱ larji nang ɓa, Magham a su̱yen ndu̱ tun ɓa.

¹³ Yang leendang tun a mbe Masiya Yesu, tun nu̱ke a ɓakh mbu̱r fara, a ɓa ndu̱ tun bing nu̱ ku̱nshe tom ɓu̱ Masiya.

¹⁴ Jiwa Masiya ke qaandi memu̱narem, chin nu̱ gaɓki ndu̱ Yakhudeku ndu̱ nduki nu̱ke ɗya Yakhudeku ɓa, tu̱ kha da ku. Tu̱ gu̱ɗa garuk nu̱ shakki chele ɓaanda nang nu̱gha, nang ke zhangndi nu̱ke a chele ɓaanda,

¹⁵ Wa da Bibiti nu̱ke wuriku ndu̱ woparkwang a mbanang ɓara nu̱ ku̱nshe mbu̱ti tom ɓaran. Shi wanang ma ku̱ du̱ng mewar pooni na viki mbe pooni rapndi nang. Shir wanangang a ɓa ndu̱ khar mu̱nkandi chele ɓaanda.

¹⁶ Wa tlaɗ chele ɓu̱ pooni nduki rapndi nang ndu̱ Magham, ma ku̱ kha ma man var da. Shi nang nu̱ ku̱nshe mu̱ti ɓaran ɗyin qu̱far kaatlang, nu̱ke wa fet zhangndi nu̱ shakki chele ɓaanda zhu tang ndang ɓara.

¹⁷ Aa ɓa tu̱ wopa labar qaandi memu̱nar ye nu, tun nu̱ke a ɓakh ndu̱ wor nu̱ke a bing.

¹⁸ Ai, mbu̱r ɓaarem chem gwa zalale ɓar she Zhinkirang ve njiv da, nang ke Jiimbi shakhshakhndi.

¹⁹ Ku̱me nang, tun runggu tu̱k ɓa, tun wa kha ma ye ghaiku su̱yen ndu̱ nduki ɓu̱ Magham, tun qusa mbu̱ rafti ɓu̱ Magham.

²⁰ Wa du̱ngndonu nu̱ ɗyine su̱ du̱ndi nu̱ pudeku ndu̱ annabikwang du̱nki, yang Masiya Yesu ke ndogdi ngginggeetli nu̱ dukki ndu̱ boota mbu̱ du̱ndang.

²¹ Nu̱ ku̱nshe nda du̱ndang baki nu nu̱ ve yen kap, chin kya sa du̱ndang tu̱ shaata gwaari tu̱k ma ku̱ kha ma ye maa ghaari ghai shakhshakhndi ye Magham.

²² Du̱ngndonu nu̱ mbe nda, su̱yen ndu̱ ɓeenanku ma ku̱ kha nu ma rafti nu̱ke Magham ka khaki nu̱ mban nu̱ ku̱nshe Jiimbi ɓaran.