Afiseku 1 - Mewar Alqawarang

Zoɓar Qaandi

¹ Nga Bulus pude ɓu̱ Masiya Yesu mbe shimndi ɓu̱ Magham kya bu̱la lagarkati nang, ma yir she nduki ɓu̱ Magham nu̱ke a mbu̱ ghai Afisa, nu̱ shir zhire ku mbe mbu Masiya Yesu.

² Ku̱ mu̱nkir ndu̱ qaandi memu̱nar nu̱ ka viki she Magham Zhinerem ndu̱ Zhinerem gwaanji Yesu Masiya kha gha su̱yen ndu̱ tunu.

Barkeku nu̱ Jiimba mbe Masiya

³ Barke wa kha Magham shwat, chin Zhinkir ɓu̱ Zhinerem gwaanji Yesu Masiya! Magham nu̱ vu̱rki barke yerem mbu̱ kwaaɗar ɓaran nu̱ mbu̱ viɗi nu̱ ku̱nshe Masiya, tu̱ vu̱r aa nyi barke nu̱ mbu̱ Jiimba yerem tu̱k.

⁴ Wa daaterem nu̱ ku̱nshe khar ɓaarem da ndu̱ Masiya me ku̱ du̱ng larji, ma ku̱ kha mi shakhshakh, waare sola gume nda ku̱me ndolar ɓaran.

⁵ Mbe ndolar ɓaran Magham wa woɗa daasaran ku̱ kha mi ma qusonggi ɓaran nu̱ ku̱nshe Yesu Masiya, ku̱me shimndi mu̱nkir ɓaran.

⁶ Shi wanang ma ku̱ kuna mi zhaaji ɓu̱ mu̱nkir ɓaran nu̱ vu̱rki yerem mu̱nki ndu̱ yele tu̱k nu̱ ku̱nshe Yi ɓaran nu̱ke a ndolaran.

⁷ Mbe nda chem wa gwa dli ɗyin nu̱ ku̱nshe tom ɓaran, nang ke yaapar solar ɓaarem nu̱ shiki yerem. Yang shi nang yerem ku̱me khang mu̱nkir ɓaran

⁸ nu̱ vu̱rki yerem koɗokhsi ɓa, ndu̱ kaɗari nu̱ke koɗokhsi ɓa, ndu̱ dar mbu̱ tun tu̱k.

⁹ Tu̱ Magham sa chem zu̱n shimndi ɓaran tukakandi ɗyine ɗyi nyin ku̱rki, tu̱ yang nyel nda nu̱ ku̱nshe Masiya.

¹⁰ Ku̱rti ɓaran chin ke, mbu̱ sarchi wa nyedli, chin ka taba aa nu̱m ɗyi nu̱ke a viɗi kap ndu̱ ɗyiku nu̱ vu̱ghai tu̱ khan mbu̱ bu̱n zalale ɓu̱ Masiya.

¹¹ Magham wa daaterem ku̱ kha mi ma nduki ɓaran, nu̱ ku̱nshe Masiya. Wa woɗa daasa ɗyen vu̱ nggarsan, Ai, chin ke nu̱ tlu̱na ɗyiku ɓaran wa nyin shimki.

¹² Daaterem chem nyem nggaki su̱ sa memu̱narem ye Masiyang ma ku̱ shi mi khar khamndi zhaaji ɓu̱ Magham.

¹³ Tun wa kha ma nduki ɓu̱ Magham tu̱k nu̱ ku̱nshe Masiya, sarchi nun tu̱kki ɓalar zhire, nang ke Labar mbarkandi nu̱ ɗa ɓa ki ndu̱ ɗanar ye nu. Ye sarchi nun maitaki Masiya, Magham wa sa yitu̱m ɓaran nu̱ ɗyine nu nu̱ shiki alqawar vu̱rti Jiimbi shakhshakhndi ɓaran ye nu.

¹⁴ Tun wa kha ma ku̱si ɓaran nu̱ ɗyine tun ka zu̱m ɗye mbu̱ ge ɓaran. Kope wa ɗana nduki nu̱ke ɓaran, kham mi zhaaji ɓaran!

Barar ɓu̱ Bulus ku̱me Nduki nu̱ Afisa

¹⁵ Ba ye sarchi nang tu̱kki maito ɓaanu mbe Zhinerem gwaanji Yesu, ndu̱ ndolar nu̱ke tun a san ye nduki ɓu̱ Magham kap,

¹⁶ nang laada kuna Magham ku̱me tun ɓa. Yang nga ka shi nang sarchi nu̱ke nga barar ye nu.

¹⁷ Nga barar ma ku̱ Maghamndi ɓu̱ Zhinerem gwaanji Yesu Masiya, Zhinkir nu̱ zhaaji, ku̱ vu̱r Jiimbi ɓaran nu̱ka vu̱rki kaɗari ndu̱ wuti su̱ tunu ye nu, ma ku̱ gwa nu shaatar mbe zu̱ndi Magham.

¹⁸ Nga barar tu̱k ku̱ Magham vu̱r dar mbu̱ tun ye nu ma ku̱ zu̱n nu nu̱m ke sar memu̱nar nu̱ qaki nu̱ kandi, tun zu̱n zhaaji ɓu̱ gu̱nar shakhti ɗye mbu̱ ge ɓu̱ nduki ɓu̱ Magham.

¹⁹ Nga barar tu̱k rong ma kaani ma ku̱ chem nyem maitaki nda zu̱n nu̱ du̱mbu̱r ɓu̱ zalale ɓaran nu̱ dukki ku̱ nduk buu. Zalale nang ɗya tlu̱nar ɓu̱ zalale ɓaran du̱mbu̱rkandi,

²⁰ nu̱ shiki tlu̱nar mbe Masiya sarchi nu̱ Magham jiiki ndu̱ chin ɓar mbe mu̱ti, tu̱ vu̱r maa khar yenda nu̱ zhaaji ɗyin bu̱nan nu̱ zu̱ma viɗi.

²¹ Maa khar nu̱ke Masiya khaki nu̱ nje nang a viɗ ɗyine aa nyi pooni kwaaɗa. Kom ndu̱ me pooni kwaaɗa, ndu̱ zalaleku, ndu̱ me du̱mbu̱rku ndu̱ aa nyi kwaaɗar nu̱ke nduk ka zu̱mki. Aa mbu̱ qaandi virkir ku nang aa fu̱ɗar wuri.

²² Magham wa sa aa nu̱m tu̱ khan mbu̱ saari Masiya, wa sa nda ma nu̱ kwaaɗar ɗyine aa nu̱m kap, tu̱ kha ma dle gume ɓu̱ aa nu̱m ye tabar ɓu̱ nu̱ mbu Yesu ku.

²³ Tabar ɓu̱ nu̱ mbu Yesu ke man var Masiya. Masiya wa kha nyeedlan mbe tabar ɓu̱ nu̱ mburi nda, ba nu̱ke chin ke nyedli ɓu̱ aa nu̱m kap ndu̱ aa fu̱n tu̱k.