3 Yokhana 1 - Mewar Alqawarang

Zoɓar Qaandi

¹ Lagarkati nang a vi she ku̱maandang ma yir she Gayus rapta nu̱ke nga ndolaran maɗyi mbe zhire.

² To rapta nu̱ke nga ndolaran, nga barar ku̱ gwa na khar mbu̱ qaandi memu̱na ve aa nyi njiva ndu̱ mu̱ndi var tu̱k, ba wa nu̱ke jiimbor kharan mu̱ni.

³ Nga kasha maɗyi sarchi nu̱ ɓeeni nyeezerem a ɓa ki tu̱ zu̱ zhire ɓu̱ khar viti ɓaaro mbe zhire, ndu̱ mburi zhire nu̱ke ta san.

⁴ Tun a nje nu̱ka saki memu̱nara tu̱ shi ɓong wa tu̱k nga za qusonggi ɓanga yir mbe zhire ɓa.

Wa Kuna Gayus

⁵ To rapta nu̱ke nga ndolaran, ta ka shi zhire mbe ɗyi nu̱ke ta shiran ye nyeezerem kap aa nu̱ke rungginiku shoro.

⁶ Nduki nang a zu̱ran ku ye tabar ɓu̱ nu̱ mbu Yesu ku nu̱ke a fan ɗyine pooni ndolar nu̱ke to wutki ye wora. Zu̱m guma ndu̱ shaatar pooni nduki nang mbu̱ yir nu̱ke a shiran ku, ba wa nu̱ shipaki tlu̱nar ɓu̱ Magham.

⁷ Ndukiku nang a vi ku ma wopa dlu̱man, yang nu̱ka dlu̱ aa nu̱m she nduki nu̱ke ɗya nu̱ mbu Yesu ku ɓa.

⁸ Ku̱me nang wa ku̱s ku̱ shaata mi pooni nduki nang, ma ku̱ kha mi ma mu̱dlenki mbu̱ tlu̱nar mbe zhire.

Diyotu̱rifis ndu̱ Dimitiriyus

⁹ Nga bu̱la lagarkati ye tabar ɓu̱ nu̱ mbu Yesu ku yang Diyotu̱rifis wa zhang ɓalar ɓaarem gha, ku̱me a shim ku̱ kha nji ma gorki nje.

¹⁰ Mbu̱ nga ɓa, ngga qu̱n laalar ɓaran, ma ku̱ aaki zu̱n ɓalar nu̱ke a shiran ɗyine rem, a maatli ɓalar ɗyine rem. Ɗyi nu̱ dukki maatli chin ke, wa zhang dlu̱ nu̱ mbu Yesu ku nu̱ ɗu̱ki ku ma ku̱ khan she nda, tu̱ yang nggu̱tl nu̱ mbu Yesu ku nu̱ke a shim shaata wora, tu̱ komba wor ɓar chele tabar ɓu̱ nu̱ mbu Yesu ku.

¹¹ To rapta nu̱ke nga ndolaran, mbu na maatli khali ɓa, me ɓu̱ nang, shi tlu̱nar mbarkandi. Nu̱ shir ɗyi mbarkandi ɗya ɓu̱ Magham. Yang nu̱ shir ɗyi malkandi nu̱ zu̱n Magham sar da ɓa.

¹² Aaki wa zu̱ saidu mbarkandi ɗyine Dimitiriyus, zhire ndu̱ ɗyinan wa saida nda. Aa chem ma chem wa saida nda, yang ta zu̱n nu̱ ɗyine saidu ɓaaremang ɗya zhire.

Lauɗarsi Ɓalarang

¹³ Ɗyiku a nje khang nu̱ke nga shim ku̱ bu̱la nga yoro yang nang shim bu̱la nga bu̱la ɓa.

¹⁴ Nga sa memu̱nara nu̱ ɗyine ngga na ro ɓu̱ shoɓ ɓa, ma ku̱ shi mi ɓalar ndu̱ yen me ndu̱ me.

¹⁵ Bu ku̱ kha na ndu̱ qaandi memu̱na. Raptorku kap nu̱ke a fan a qaandi yoro. To shi qaandi ye aa nyi da chele Rapterem nu̱ke a fara.