2 Yokhana 1 - Mewar Alqawarang

Zoɓar Qaandi

¹ Lagarkati nang a vi she ku̱maandang ma yir she nokhzi nu̱ Magham datki ndu̱ qusonggi ɓaran, nu̱ke nga ndolaran mbe zhire. Yang nga kya ndola wor ɗyenda ɓa, kap nduki nu̱ zu̱nki zhire ɓu̱ Magham a ndola wora.

² Chem a ndola nu ku̱me zhire nu̱ke a mbe rem, yang ka kha gha su̱yen ndu̱ chem koɗokhsi ɓa.

³ Mu̱nkir, ndu̱ nar zhiyaye, ndu̱ qaandi memu̱nar na viki she Magham Zhinki ndu̱ Yesu Masiya, Yi ɓu̱ Zhin, ku̱ kha gha su̱yen ndu̱ chem mbe zhire ndu̱ ndola.

Mburi Shogar ɓu̱ Masiya

⁴ Nga kasha maɗyi nang naki ɓeeni qusonggi ɓaaro a mbu zhire nang, ba wa nu̱ Zhinkirang zu̱ki za shem.

⁵ Yang leendang nga khutoro, nusu, ku̱ ndola mi yen kap. Nang ɗya mewar ɓala ɓa, ɗya ɓalar nu̱ zu̱ki yerem gumapaali.

⁶ Yang nang ke ndola, ku̱ shi mi ɗyi nu̱ke Magham zu̱ki za shem. Ba wa nun tu̱kki gumapaalyang, zu̱r ɓaranang chin ke shem yir mbe ndola.

⁷ Nu̱ lambar nduki khang a vi ku, tu̱ lakhtan aa fu̱n mbu̱ larji. Nu̱ maita ku za Yesu Masiya a ɓa mbu̱ larji mbu̱ manva ɓa. Kap nu̱ pooni shogar nang wor ke nu̱ lamba ndu̱ nu̱ zhangndi Masiya.

⁸ Ku̱me nang ku̱r ma vaanu, ma ku̱ ɗyi nun tlu̱naki kha bam ɓa, me ɓu̱ nang tun gwa ɗye ɓi ɓaanu nyeedlan.

⁹ Kap njif nu̱ke nu̱ ching nu̱ ɗyine shogar ɓu̱ Masiya ɓa, tu̱ yang shoga ɗyi nggur ɓar guma nu̱ nang, njif nang nu̱ gwa Magham ɓa. Yang njif nu̱ chingki nu̱ ɗyine shogar ɓu̱ Masiya, wa gwa Zhinkirang ndu̱ Woyang tu̱k.

¹⁰ Mbu̱ yang njif nggur a ɓa tu̱ shoga ɗyi nggur ɓar zum ndu̱ shogar nang, dlu̱ nu nda nu̱ kaa ɓaanu ɓa, shi nu leya ɓar yenda ɓa.

¹¹ Kap njif nu̱ dlu̱ki pooni njif nang, a gontakya ɗyinan ndu̱ chin mbu̱ tlu̱nar malkandiku nu̱ke a shiran.

Lauɗarsi Ɓalarang

¹² Ɗyiku a nje khang nu̱ke nga shim zu̱ran yoro, yang nang shim bu̱la nga bu̱la ɓa, me ɓu̱ nang, nga sa memu̱nara a ɓa nga she ro shem ɓalar ndu̱ yen me ndu̱ me, nang ka sa tu̱ ɓong memu̱nar ɓaarem kha nyeedlan.

¹³ Qusonggi ɓu̱ khachinkir ɓa nusukandi nu̱ Magham datki a qaandi ye nu ku.