2 Timoti 4 - Mewar Alqawarang

¹ Nga ɓalar nang yor gume Magham ndu̱ Masiya Yesu, nu̱ke ka ɓa kumaki nu̱ nyifiri ku ndu̱ nduki nu̱ mu̱tki, nu̱ pitl gaɓti ɓaran ndu̱ kwaaɗar ɓaran.

² Shi waazu ɓu̱ ɓalar ɓu̱ Magham; to kha daasaran aa zalala nje aa a nje ɓa; to ɗu̱r nduki, to wu wora, to pa du̱mbu̱r ye wora ndu̱ kaɗanyi maɗyikandi ta shogaran ɓara.

³ Jiwa sarchi a nje a ɓari nu̱ke nduki ɓu̱ shim shogar zhirekandi ɓa. Me ɓu̱ nang ɗyi nu̱ke memu̱na wora shimndan ndu̱ dlu̱mdi wor nu̱ke a khum wora. Ka sa tu̱ ɗu̱ ku she maalu̱mku nu̱ke ka zu̱ki ɗyi nu̱ke a shim tu̱ktan ku ye wora.

⁴ Nduki ka zhang tu̱k zhire gha tu̱ gaɓ ndu̱ khangkal ɓaanda ye tu̱kti shinjiku.

⁵ Yang to, ku̱s vaaro mbe aa nyi tunu, to gu̱n memu̱na ro mbe bonye, to shi tlu̱nar ɓu̱ nu̱ wopar Labar mbarkandi, to nyel tlu̱nar ɓaaro ye khar ɓa ma maavi ɓu̱ Magham.

⁶ Jiwa sarchi nu̱ke a ma vu̱rti nga wa sadke wa shi, nang ke sarchi nu̱ke nga ma yir vara.

⁷ Nga shi wute mbarkandi, nga woɗa ra wute, nga khuɓ du̱ngdi maito nu̱ vu̱rki du̱ngdan ya nu̱gha mbari.

⁸ Leendang ɗye zhar nu̱ tlu̱nar dambi a nje daasaran ku̱me nga, chin Zhinerem gwaanji nu̱ke ɗya nu̱ kumar zhire ka ɓa vu̱rki ya ye Fu̱ɗar naandang. Yang ka ɓa vu̱rkya ya nga ɗyenda ɓa, ka ɓa vu̱r ye kap nduki nu̱ke a buran ku mbe ndola ma na nda gaɓti ɓaran.

Ɓeena Ɓalarku

⁹ Shu ɗyi nu̱ke to ka ɗu̱maki shiran kap to ɗa ɓa sha ɗau ɗau,

¹⁰ Dimas wa njigti nga ku̱me ndolar ɗyin larji nang, wa ɗu̱ varan Tasalonika, Ku̱rezens wa ɗu̱ Galatiya, kom Titus wa ɗu̱ Dalmatiya.

¹¹ Luka ɗyenda kya su̱yen ndu̱ nga. A lob Markus tun a ɓa su̱yen ndu̱ chin, ku̱me ka kha ndu̱ boota ya mbu̱ tlu̱nar nu̱ke nga shiran.

¹² Nga ru̱k Tikikus nu̱ Afisa.

¹³ Mbu̱ ta ɓar to ɗa ɓa ndu̱ lukti mbiti nang njigki nu̱ she Karbus mbu̱ ghai Tu̱rowas, ndu̱ lagarkati bu̱larkwang, nu̱ shi wa lagarkati ku̱zu̱mndiku nu̱ bu̱larkwang ɓa.

¹⁴ Alekhzanda nu̱ ɓu̱dlang wa shi ɗyi malkandi ya maɗyi. Zhinkir gwaanji ka dli gaɗe ni yenda ku̱me ɗyi nyin shiki.

¹⁵ To ku̱r va ndu̱ chin tu̱k ku̱me wa shi kare ndu̱ wopar ɓaarem nang maɗyi.

¹⁶ Ye sarchi nang chingki nu̱ gume kumar gumapaali ma lawa nga ɗyina nduk a nje nu̱ khaki nu̱ gaanja ɓa tu̱ aaki yaɓti nga gha. Ku̱ Magham shiga nang nu̱ ɗyin wor ɓa.

¹⁷ Yang Zhinkir gwaanji a nje su̱yen ndu̱ nga tu̱ pa du̱mbu̱r ya, ku̱me ɓalar ɓu̱ Magham nang ku̱ gwa wopar maɗyi ma ku̱ nduki nu̱ke ɗya Yakhudeku ɓa tu̱kki. Wa lawa nga ɓar mbu̱ me mu̱zamndi.

¹⁸ Zhinkir gwaanji ka lawa nga ɓar mbe aa nyi ɗyi malkandi, ka khutlo nga, tu̱ ɗu̱ ndu̱ nga mbu̱ kwaaɗar ɓaran mbu̱ viɗi. Ku̱ zhaaji kha nda koɗokhsi shwat ɓa! Amin.

Zoɓar Qaandi nu̱ Lauɗar san

¹⁹ To shi qaandi ye Bu̱rsikila ndu̱ Akila ndu̱ nu̱ mbu Yesu nu̱ka tabaki nu̱ ka ɓu̱ Onesiforus tu̱k.

²⁰ Erastus a kha gha mbu̱ ghai Koranti, yang nga njig Tu̱rofimus nu̱ Militus ku̱me varan mu̱n ɓa.

²¹ Shu to ɗa ɓa ɗau me ku̱ nomandi shi. Yubulus ndu̱ Pudens, ndu̱ Linus, ndu̱ Ku̱laudiya ndu̱ kap nyeezerem ku a zoɓa qaandi ɓaanda ye nu.

²² Ku̱ Zhinkir gwaanji kha gha su̱yen ndu̱ jiimbonu. Mu̱nkir ɓaran ku̱ kha gha su̱yen ndu̱ tunu.