2 Timoti 3 - Mewar Alqawarang

Khar Viti mbu̱ Lauɗarsi Qaandi Virkirku

¹ Zu̱n nu̱ ɗyine mbu̱ lauɗar su̱ qaandi virkirku bonye a nje maɗyi.

² Ku̱me nduki ka kha ma nu̱ shimndi ɗyin vaanda, nu̱ ndolar mu̱zhindi ku, nu̱ wakhti ku, nu̱ gwaari ɗyin ku, nu̱ pu̱ziku bam bam. Nu̱ song tu̱kti man nda ndu̱ zhin nda, nu̱ song wuti kuna, nu̱ shimndi khar mbu̱ zop ku,

³ nu̱ song ndola, nu̱ khubti yen nu̱ mbu̱ memu̱na wora. Nu̱ su̱bu̱rti dlu̱m nduki, nu̱ song ku̱si ɗyin ku, nu̱ mu̱nar ku, nu̱ kare ku ndu̱ ɗyi mbarkandi.

⁴ Nu̱ zu̱mndi amana, nu̱ wakho nu̱ke ɗyin su̱ ɓa, nu̱ nggu̱nggal ku, nduki nu̱ shimndi tu̱kti mu̱ndi tu̱ duk shimndi Magham.

⁵ Dam a wutan ku za wor nu̱ zu̱ndi Magham, yang khar viti ɓaanda wa keela zalale nu̱ke a mban. Shakh ma ɗyinonu ndu̱ pooni nduki nang.

⁶ Chele pooni nduki nang ɓeenan wa ka paɗa tu̱ ka vi nu̱ mbu̱ raftiku ɓu̱ nduki. Tu̱ ka za ɗyin nusuku nu̱ke nggu̱bu̱ngan ku yang solar wa duk du̱mbu̱r ɓaanda tu̱k, ndu̱ shimndi ɗyi malkandiku zum zum nu̱ke a nggum wora.

⁷ Wor ke pooni nusuku nu̱ke a ɗyin shogar ku aakochi, yang kap ndu̱ nang nu̱ zu̱n zhire ku ɓa.

⁸ A khar ku wa Janes ndu̱ Jambu̱res nu̱ shiki kare ku ndu̱ Musa, nduki ku nang tu̱k a kare ku ndu̱ zhire, kwaari ɓaanda wa sagha, maito ɓaanda ɗya nu̱ bamndi.

⁹ Yang ɓu̱ ɗu̱ ɓakh ku ɓa, ku̱me me nggu̱bu̱ng ɓaanda ka ɗa ɗal dam ɗau ba wa nu̱ ɓu̱ Janes ndu̱ Jambu̱res ɗatlki dam.

Lauɗarsi Shogarang

¹⁰ Leendang ta woɗa ta zu̱n shogar ɓanga, ndu̱ ɗye shir mbarkandi ɓanga, ndu̱ ku̱rti ɓanga, ndu̱ maito, ndu̱ kaɗanyi, ndu̱ ndolari, ndu̱ sar memu̱nar mbe kanaɗyi nang ka shiki.

¹¹ Ta zu̱n bonye ndu̱ takashi nu̱ gwaki nga mbu̱ ghai Antakiya, ndu̱ Ikoniya ndu̱ Listu̱ra. Yang kap ndu̱ nang tu̱ Magham lawa nga mban.

¹² Shwat aaki nu̱ shimki ku̱ shi khar viti ɓaran ndu̱ ɗye shir mbarkandi ɓu̱ Magham mbe Masiya Yesu ka za bonye.

¹³ Yang nduki malkandi ndu̱ nu̱ lambar ku nu̱ tlu̱nar malkandi ku ka shaata maatli, a lamba nduki, nduki a lamba wora.

¹⁴ Yang to, zu̱m guma ndu̱ ɗyi no shogaki, to maita maɗyi, ku̱me ta zu̱n nduki no shogaki kha wora.

¹⁵ Kor nu̱ ɗyine ta shoga bu̱lar Ɓalar ɓu̱ Magham shakhshakhndi nu̱ shogaki njiv gwar ɗanar yoro nu̱ ku̱nshe maitar Masiya Yesu ji ɓa woi koɗomma.

¹⁶ Kap bu̱lar Ɓalar ɓu̱ Magham piiran a vi she nda, boota su̱ tu̱k ma shogari, ndu̱ duti dlu̱mdi, ndu̱ kwaaɗar khar viti ɓu̱ nduku, ndu̱ ɗu̱rti nduk ve njiv toropndi.

¹⁷ Ma ku̱ njif ɓu̱ Magham kha nyeedlan, daasaran ma aa nyi pooni tlu̱nar mbarkandi.