2 Timoti 2 - Mewar Alqawarang

Soje Zhirekandi ɓu̱ Masiya

¹ Yang to yi ɓanga, kho ndu̱ du̱mbu̱r nu̱ ku̱nshe mu̱nkir nu̱ke a mbe Masiya Yesu.

² Ɗyi no tu̱kki sha gume saidu ku khang, to shoga ye nduki nu̱ shir zhire ma ku̱ shoga ku ye nduki ngguri.

³ Tun gu̱n memu̱na nu mbe bonye wa sojeku zhirekandi ɓu̱ Masiya Yesu.

⁴ Ai, soje zhirekandi a nje nu̱ke ka saki ɗyinan nu̱ mbu̱ ɗyi ɓu̱ nduki nu̱ke ɗya soja ɓa ɓa, ku̱me a shim ku̱ dle gume ɓaran tu̱k mu̱ndi ɓaran.

⁵ Wanang tu̱k mbu̱ palam ɗarku ndu̱ ku̱mndi jiriku, nduk a nje nu̱ke ka gwaki ɗye ɓi ɓa kope wa mbu bibiti nu̱ke a mbu̱ palamang.

⁶ Ai, nu̱ ghuti nu̱ shiki tlu̱nar maɗyikandi shipaki ku̱ nggaasi zu̱m boote damang gumapaali.

⁷ To shi kwaari ɗyine ɗyi nang zu̱ki yor nang, ku̱me Zhinkir gwaanji ka sa to da mbu̱ aa nu̱m kap.

⁸ Kor nu̱ ɗyine Yesu Masiya nu̱ jiiki ndu̱ chin ɓar mbe mu̱ti, a viki me sham ɓu̱ Dauda. Nang ke Labar mbarkandi nu̱ke nga woparanang.

⁹ Nga za bonye nang ku̱me Labar mbarkandi nu̱ke nga woparanang, tu̱ gu̱ndi nga nu̱gha ndu̱ yakhli wa njif nu̱ shiki zop ngguri. Yang nduk a nje nu̱ke ka ɗu̱maki gu̱n ɓalar ɓu̱ Magham nu̱gha ɓa.

¹⁰ Yang nga gu̱n memu̱nara ndu̱ aa nu̱m ku̱me nduki datkandi, ku̱ gwa ɗanar ku nu̱ ku̱nshe Masiya Yesu, tu̱ gwa viri nu̱ mbu̱ zhaaji nu̱ke nu̱ka shi woɗa ɓa.

¹¹ Balar nang ɗya zhire shwat, nu̱ zu̱ki za, Mbu̱ chem wa mu̱t su̱yen ndu̱ chin, chem ka kha ndu̱ nyifiri su̱yen ndu̱ chin,

¹² Mbu̱ chem wa gu̱n memu̱na rem, chem ka shi kwaaɗar su̱yen ndu̱ chin. Mbu̱ chem wa keela zu̱ndi nda, ka keela tu̱k za nyin zu̱nderem ɓa.

¹³ Mbu̱ nyem ka shi zhire ɓa, chin ɗya nu̱ zhire, ku̱me ɗo ɓu̱ keela ɗyinan ɓa.

Nu̱ Tlu̱nar nu̱ke Magham a Shimndan

¹⁴ To ki kor ɗyiku nang ye wora, to wu wor tu̱k gume Magham nu̱ ɗyine ku̱ ka shi keele bam bam ɗyine ɓalarku ɓa, ku̱me boota su̱ ɓa, ka su̱bu̱rkya nduki nu̱ke a tu̱ktan.

¹⁵ Shu ɗyi nu̱ke to ka ɗu̱maki kap ma ku̱ gwa na dlu̱r mbarkandi she Magham. To kha ma nu̱ tlu̱nar nu̱ke tom tu̱k kawa mbe tlu̱nar nu̱ke ta shiran ɓa, to shoga ɓalar zhire nang ɓar torop ba wa nu̱ zu̱ki.

¹⁶ To ɗa ɓalar bamndiku nu̱ wuti ndu̱mndi ye Magham, ku̱me nu̱ shiran ku wanang wa ka ɗu̱ ku ɓakh mbu̱ song sawar Magham.

¹⁷ Pooni shogar ɓaanda nang wa ka kha wa mbirmbong nu̱ke a zu̱m dlu var nduku. Khimeniyus ndu̱ Filetus a mbu̱ nduki nu̱ka shiki pooni ɓalar nang,

¹⁸ ku̱me wa ngga njiv zhire ku gha a zu̱ran ku za, ai, Magham wa woɗa ji ndu̱ nduki ɓar mbe mu̱ti, a tlagha maito ɓu̱ ɓeeni nduki.

¹⁹ Yang su̱ du̱ndi du̱mbu̱rkandi nu̱ Magham du̱nkyang, ba a nje shokhku̱rokh ndu̱ yitu̱m nu̱ saki nu̱ ɗyinan. Nu̱ zu̱ki za, “Magham wa zu̱n nduki nu̱ke ɓaran” yang “Kap njif nu̱ke a zu̱ran za chin ɓu̱ Zhinkir gwaanji ku̱ shakh ɗyinan tu̱ kha ɓakh ndu̱ tlu̱nar malkandi.”

²⁰ Ai, ɗye tlu̱narku nu̱ke a nje mbu̱ rafti gwaanji ɗya ɗye tlu̱narku nu̱ shiki ndu̱ ginarwa ndu̱ nggirgim ɗyenda ɓa, ɓeenan shi ndu̱ qu̱fa tu̱ shi ɓeenan ndu̱ daɓti du̱ndi. Shi ɓeenan ma ku̱ shi tlu̱nar nu̱ke zhaaji si ndu̱ wora, yang shi ɓeenan ma ku̱ shi tlu̱nar nu̱ke zhaaji su̱ ɓa ndu̱ wora.

²¹ Kap njif nu̱ shakki ɗyinan ndu̱ ɗyiku nu̱ke zhaaji su̱ ɓandi nang, ka kha ma ɗyi nu̱ khaki shakhshakh ma tlu̱nar nu̱ke zhaaji su̱ ye nu̱ raftang, a nje daasaran ma aa nyi tlu̱nar mbarkandi.

²² Ɗo shimndi ɗyiku malkandi ku bam bamndi nu̱ me woi, to sa ɗyinoro ma laɓ dambi ndu̱ maito ndu̱ ndola, ndu̱ qaandi memu̱na, su̱yen ndu̱ nduki nu̱ke a qa Zhinkir gwaanji ndu̱ memu̱nar shakhshakhndi.

²³ Shokh ɗyinoro ndu̱ keeleku nu̱ me nggu̱bu̱ng bamndi nu̱ke ɗyin su̱ ɓa. Ta zu̱n nu̱ ɗyine pooni ɗyinan wa ka ɓa ndu̱ dakhlari.

²⁴ Ku̱ nu̱ tlu̱nar ɓu̱ Magham kha ma nu̱ keele ɓa, ku̱ kha ma nu̱ mbarkir ye aaki, ku̱ kha ma njif nu̱ke ka ɗu̱maki shoga ɓara, yang nu̱ zhangndi nduk ɓa.

²⁵ Kom ku̱ wu nduki nu̱ke a kare ndu̱ shogar ɓaran mbe ɓu̱tokh memu̱na, bai Magham ka vu̱r maa ye wor tu̱ nggoɗ ku tu̱ zu̱n zhire.

²⁶ Mbu̱ wa gaɓ ku nu̱ mbu̱ kwaari ɓaanda, ka lawa ku mbe shaanggir nu̱ Sheɗan ku̱ski wor su̱ ma ku̱ mbu shimndi ɓaranku.