2 Timoti 1 - Mewar Alqawarang

Zoɓar Qaandi

¹ Lagarkati nang a vi she Bulus pude ɓu̱ Masiya Yesu wa nu̱ Magham shimki tu̱ ru̱kti nga ma ku̱ zu̱ nga alqawar nyifi nu̱ke a mbe Masiya Yesu.

² Ma yir she Timoti yi ɓanga nu̱ke nga ndolaran. Mu̱nkir, ndu̱ nar zhiyaye, ndu̱ qaandi memu̱nar na viki she Magham Zhinki ndu̱ Masiya Yesu Zhinerem gwaanji ku̱ kha gha su̱yen ndu̱ to.

Kunar ndu̱ Par Du̱mbu̱ri

³ Nga kuna Magham nu̱ke nga tlu̱nar yenda ndu̱ konyi mbarkandi ba wa nu̱ke zhikankir ku ɓang shiki. Nga ka kwaroro aakochi mbu̱ barar ɓanga.

⁴ Mbu̱ nga kor ɗyim ghoori ɓaaro, tang ka kasha na ro, ma ku̱ nyel nga ndu̱ ɓong memu̱na.

⁵ Wa kor maito ɓa zhirekandi ya, nang ke pooni maito ɓu̱ zhiko Loyis, ndu̱ mo Yunis, yang leendang nga zu̱n shwat a nje mbe ro.

⁶ Nang ke ɗyi nu̱ saki nga kwaaran yor nga za ku̱ shi na boote maɗyi ndu̱ vu̱rti nu̱ Magham shiki yor sarchi nang saki khar barke nu̱ ɗyinoro.

⁷ Jiwa Jiimbi nu̱ Magham vu̱rki yeremang ɗya nu̱ sawa ɓa, yang Jiimbyang ɗya nu̱ zalale ndu̱ ndolari, ndu̱ nu̱ ku̱si ɗyin.

⁸ Ku̱me nang, tu̱k na kawar saida Zhinerem gwaanji ɓa, yang tu̱k na kawar ɓang ku̱me wa khiiri nga gha ku̱me chin ɓa. Gonta ma ɗyinonu ndu̱ nga mbe bonye nu̱ke chem a zaran ku̱me Labar mbarkandi nu̱ zalale ɓu̱ Magham nang.

⁹ Magham ɗanaki rem, tu̱ qa rem ma ku̱ kha mi shakhshakh. Nu̱ qa rem ku̱me tlu̱nar nyem shiki ɓa, qa rem ku̱me shimndi ɓaran ndu̱ mu̱nkir ɓaran. Vu̱r mu̱nkir ɓaranang yerem nu̱ ku̱nshe Masiya Yesu me ku̱ du̱ng larji,

¹⁰ tu̱ yang wut mu̱nkirang yerem ye dalangi nu̱ ku̱nshe ɓar ɓu̱ Nu̱ Ɗanar ɓaarem Masiya Yesu. Chin su̱yaki mu̱ti nu̱ gha ta ɓa nu̱ nyifiri nu̱ke nu̱ka shi mu̱t ɓa yerem ye yarangi nu̱ ku̱nshe Labar Mbarkandang.

¹¹ Magham wa sa tang kha ma nu̱ waazu, ndu̱ pude ɓu̱ Yesu, ndu̱ maalu̱m ku̱me Labar mbarkandi dandi nang.

¹² Nga za bonye ku̱men ba wa nu̱ke nga zaran leendang. Yang kap ndu̱ nang nu̱ kha ya ma ɗye kawa ɓa ku̱me nga zu̱n njif nang maitaki, nga zu̱n nu̱ ɗyine ka bu ɗyin du̱ngdi nang vu̱rki yenda kap, kope Fu̱ɗar naandang.

¹³ Khuɓ shogar zhirekandi no tu̱kki sha nang, tu̱ kha ma njiv shogar mbarkandi yoro, mbe maito ndu̱ ndolar nu̱ke ɗya ɓaarem mbe Masiya Yesu.

¹⁴ Khutlo shogar zhirekandi nu̱ vu̱rki du̱ngdan ye ro nu̱ ku̱nshe shaatar ɓu̱ Jiimbi shakhshakhndi nu̱ke kharan mbe rem.

¹⁵ Ta zu̱n nu̱ ɗyine aaki mbu̱ dlar ghai Asiya wa yaɓti nga gha, kap ndu̱ Faijelus ndu̱ Khamojenis.

¹⁶ Ku̱ Magham na zhiyaye ɓu̱ rafti ɓu̱ Onesiforus, ku̱me wa ka pa du̱mbu̱r ya, nu̱ ka tu̱k kawa ku̱me wa khiiri nga gha zhaaru̱m ɓa.

¹⁷ Me ɓu̱ nang, sarchi nu̱ ɗa khu̱lki nu̱ Roma, su̱bu̱rti sarchi su̱ ɓa tu̱ laɓ maa nu̱ke nga si, kope nu̱ gwaki nga.

¹⁸ Bu ku̱ Zhinkir gwaanji na zhiyaye ɓu̱ Onesiforus ye Fu̱ɗar gaɓti ɓaran! Ai, to ndu̱ ɗyino ta zu̱n mbari pooni shaatar ku nu̱ shiki ya mbu̱ ghai Afisa.