2 Tasalonikeku 3 - Mewar Alqawarang

Shi ma Barar ku̱me Chem

¹ Ye lauɗar san, nyeezaku, shi ma barar yerem ma ku̱ ɓalar ɓu̱ Zhinerem gwaanji dlu̱ maari ɗau ɗau, tu̱ gwa zhaaji ba wa nu̱ gwaki chele ɓaanu.

² Shi ma barar yerem ma ku̱ lawa rem ɓar mbu̱ khar nu̱ mu̱nar ku, ku̱me nduki kap maitaki ɓa ɗo.

³ Yang Zhinerem gwaanji ɗya nu̱ zhire, ka pa du̱mbu̱r ye nu, tu̱ kangga nu she Nu̱ mu̱nar nang.

⁴ Chem wa maita Zhinerem gwaanji ɗyine ɓalar ɓaanu, nu̱ ɗyine tun a mbu ɗyi nyem zu̱ki ye nu, yang tun ka zu̱m guma ndu̱ shiran.

⁵ Bu ku̱ Zhinerem gwaanji mbu ndu̱ tun mbe ndolar ɓu̱ Magham nang, tun ching gha shaanggu̱ɗang mbe du̱mbu̱r ɓu̱ Masiya.

Wa Ku̱s ku̱ Shi mi Tlu̱nari

⁶ Nang ɗo, nyeezaku, chem a zu̱ran ye nu mbu̱ dlu̱m Zhinerem gwaanji Yesu Masiya nu̱ ɗyine, ku̱ shakh nu ɗyinonu ndu̱ aa nyi nduk chele ɓaanu nu̱ shimndi khar bam. Chin nu̱ zhangki mbu shogar nun gwaki khaaremang gha.

⁷ Ai, tun ndu̱ ɗyinonu tun wa zu̱n nu̱ ɗyine wa shipa ku̱ shoga nu ɗyi nu̱ke chem a shiran, ku̱me sarchi nu̱ke chem a su̱yen ndu̱ tunu, nyem kha gha bam ɓa,

⁸ nyem zu̱m ɗyezu̱m she njif nggur bam ɓa. Chem shikya bonye, chem a tlu̱nar fu̱ɗar ndu̱ virkiri, ma ku̱ kha mi ma shipit ye aaki ɓa.

⁹ Nang nu̱ wut nu̱ ɗyine ɗya khalandi ɓaarem ɓa ɓa, auwo, chem shi wanang ma ku̱ kha mi ma ɗyi nu̱ke tun ka naki she rem, tun shoga.

¹⁰ Ai, aa sarchi nu̱ke chem a su̱yen ndu̱ tunu, chem wa ze nu nyem za, “Kap njif nu̱ zhangki tlu̱na gha, ku̱ vu̱r ɗye zu̱mndi yenda ɓa.”

¹¹ Jiwa chem wa tu̱k za ɓeeni nduki chele ɓaanu ɗya nu̱ shimndi khar bam ku, nu̱ka shi tlu̱nar aa nu̱m ku ɓa, kope gu̱ndi virki ɗyenda.

¹² Yang chem a ɓalar ye pooni nduki nang, chem a wu wor tu̱k mbe Zhinerem gwaanji Yesu Masiya, nu̱ ɗyine ku̱ ki tlu̱nar ku tu̱ ku̱s ɗyin vaanda, tu̱ zu̱m ndu̱ vaanda.

¹³ Yang tun nyeezaku, ku̱ nggum nu ndu̱ shir ɗyi toropndi ɓa.

¹⁴ Njif nu̱ zhangki mbu ɗyi nyem zu̱ki ye nu mbu̱ lagarkati nang gha kap, tun sa yiti yenda, tun shakh ɗyinonu ndu̱ chin ma ku̱ tu̱k kawa.

¹⁵ Yang ku̱ da nu nda nu̱ mbu̱ nu̱ zhangndi ɓaanu ɓa, tun wuri nda wa mu̱dlo nu.

Lauɗarsi Ɓalarang

¹⁶ Bu ku̱ Zhinkir gwaanji nu̱ qaandi memu̱na, vu̱r qaandi memu̱nar ye nu ndu̱ varan aakochi, mbu̱ aa nyi tunu. Ku̱ Zhinkir gwaanji kha gha su̱yen ndu̱ tun kap.

¹⁷ Nga Bulus nga kya bu̱la qaandi nang ndu̱ khara. Nang ke saidu nu̱ke a mbu̱ aa nyi lagarkati nang bu̱laki, ngga bu̱la ba wanang.

¹⁸ Bu ku̱ mu̱nkir ɓu̱ Zhinerem gwaanji Yesu Masiya kha gha su̱yen ndu̱ tun kap.