2 Tasalonikeku 2 - Mewar Alqawarang

Kuji Tonggu̱rong

¹ Nyeezaku, viɗ ɗyine ɓalar gaɓti ɓu̱ Zhinerem gwaanji Yesu Masiya, ndu̱ taba rem nu̱ke a ma shiran nu̱ she nda. Chem a khutonu,

² ku̱ memu̱na nu shikhla ba ndolndol wanang ɓa, yang ku̱ jiimbonu shi ji za fu̱ɗar ɓu̱ Zhinerem gwaanji wa woɗa ɓar ɓa. Bai tu̱ njif nggur ze nu za chem wa zu̱ wanang sarchi nu̱ke chem a waazu gom, bai mbe zu̱r ɗyi nu̱ Magham zu̱ki yerem gom, bai tu̱k za chem bu̱lakyang lagarkati ye wor gom.

³ Ku̱ aaki lamba nu aa kikimndi ɓa, ku̱me fu̱ɗar nang ɓu̱ ɗa ɓa ɓa kope wa shi tonggu̱rong nang, kuji tonggu̱rong ka ɗa vi, nang ke njif nu̱ daasaki mu̱ti yenda.

⁴ Chin ka ɓa shiki kare, tu̱ ɓa shi gwaari ɗyin tu̱ ɓa da ɗyinan guma ndu̱ ɗyi nu̱ke dlu̱m Magham a nje mban kap, ndu̱ ɗyi nu̱ka gharki ghai yenda. Ka ɓaa khan mbu̱ rafti ɓu̱ Magham, tu̱ ɓa zu̱ za chin ke Magham nggwa.

⁵ Yang nun kor nu̱ ɗyine nga ka zu̱ pooni ɗyiku nang ye nu sarchi nu̱ke chem a su̱yen ɓa goma?

⁶ Leendang tun wa zu̱n ɗyi nu̱ke a nggu̱tli nda ɗaatli nu̱ dam, ɓu̱ ɗa vi me ku̱ sarchi ɓaran shi ɓa.

⁷ Jiwa zalale tonggu̱rong tukakandi nang wa nggaasi tlu̱nari, yang chin nu̱ke a nggu̱tlan nang ka zu̱m guma ndu̱ shiran kope Magham wa da nda ɓara.

⁸ Kom ka ɓa wut kuji tonggu̱rong nang ye dalangi, yang ye fu̱ɗar gaɓti ɓu̱ Zhinerem gwaanji Yesu, ba khu̱kheeti mbu̱ men, ka tu̱pa nda ɓar ɗyin zhakhɗye kwaaɗar ɓaran. Du̱mbu̱r yarang ɓar ɓaran ka su̱ya nda nu̱ gha.

⁹ Nduk ka da mbu̱ ɓar ɓu̱ kuji tonggu̱rong nang nu̱ ku̱nshe tlu̱nar ndu̱ zalale ɓu̱ Sheɗan, ka shi ɗye lazhamku, ndu̱ ɗye saiduku, ndu̱ ɗyiku nu̱ke nduk nu̱ su̱n nu̱ naran ɓa.

¹⁰ Ka shi lambar maatlindi ye nduki nu̱ke a ve njiv su̱yari, ku̱me wa zhang ndola zhire gha ma ku̱ gwa ɗanar ku.

¹¹ Ku̱me nang Magham ka ɗa ru̱k ndu̱ lambar gwaanji ye wor ma ku̱ maita wollo ku,

¹² tu̱ kuma nduki nu̱ zhangki maita zhire gha, tu̱ ka tu̱k mu̱ndi ɓu̱ mu̱na tu̱k.

Chingndi gha Shaanggu̱ɗang

¹³ Yang wa ku̱s ku̱ kuna mi Magham aakochi ku̱me tunu, nyeezaku nu̱ke Magham a ndolaran. Ku̱me vu̱ nggarsan Magham wa daato nu tun gwa ɗanar nu̱ ku̱nshe zalale ɓu̱ Jiimbi nu̱ shiɓki nun gha kom ndu̱ nu̱ ku̱nshe maitar zhire.

¹⁴ Qa nu nu̱ ku̱nshe Labar mbarkandi nyem vu̱rki yenwang, ma ku̱ gwa nu me ɓaanu mbu̱ zhaaji ɓu̱ Zhinerem gwaanji Yesu Masiya.

¹⁵ Ku̱me nang, nyeezaku, tun ching gha shaanggu̱ɗang, tun khuɓ me ghai nyem shogaki ye nu, aa mbu̱ ɓala aa mbu̱ lagarkat.

¹⁶ Bu ku̱ Zhinerem gwaanji Yesu Masiya ndu̱ ɗyinan, ndu̱ Magham Zhinkir ɓaarem, nu̱ke a ndolarem, vu̱r shokhku̱rokh me bu̱n yerem nu̱ke nu̱ka shi woɗa ɓa, ndu̱ sar memu̱nar mbarkandi nu̱ ku̱nshe mu̱nkir ɓaran.

¹⁷ Bu ku̱ vu̱r qaandi memu̱nar ye nu, tu̱ pa du̱mbu̱r ye nu mbe aa nyi tlu̱na ndu̱ ɓalar mbarkandi.