2 Korintiyeku 9 - Mewar Alqawarang

Shaatar nu̱ Mbu Yesu ku

¹ Nu̱ ku̱s ku̱ bu̱la nga ye nu ɗyine shaatar nu̱ mbu Yesu ku ɓa,

² ku̱me nga zu̱n tun wa da ye memu̱na nu, nang ke ɗyi nu̱ saki tang makhta nu gume nduki nu̱ Makidoniya. Nga ze wor nga za ma ji sonyi nu̱ peetaki nduki nu̱ Akaya a shim shaata nu. Komkomi ɓaanu wa sa tu̱ ji ku nu̱ viɗi ma daasa vaanda.

³ Yang nga ru̱k nyeezeremku nang, ma ku̱ ɗyi nyem zu̱ki ɗyinonu nang kha ma ɓalar mbu̱ me ɓa. Nga shim ku̱ gwa nu daasaran ndu̱ ɗyi nu̱ke tun a ma vu̱rtan ba wa nang zu̱ki ye worang.

⁴ Mbu̱ nga ɓa su̱yen ndu̱ nu̱ mbu Yesu ku nggur nu̱ke a Makidoniya, nang shim ku̱ ɗa ɓa ku tu̱ gwa nu nun daasa vu̱rti ɓaanwang ɓa. Mbu̱ ɗyen wa shi wanang, chem ka tu̱k kawa ku̱me pooni makhtar nang shiki ye nu maɗyi gume worang, yang kawaran ɓang ɗyenda ɓa, kap ndu̱ tun tu̱k.

⁵ Chin saki tang khuɗ nyeezerem nang ku̱ kayarem ku, ma ku̱ taba ɗyi nun daki alqawar vu̱rtan, mbu̱ chem a ɓa chem gwa daasaran. Shir wanang ka wut nu̱ ɗyine tun shimki vu̱rtan, nduk a nje nu̱ rannaki nu ɓa.

⁶ Kor ma ɓa, ai, njif nu̱ nggaki kaɓti ɓaran ɓakh ɓakh maɗyi boote dam ɓaran ka kha kata, yang njif nu̱ kaɓki wa nu̱ shipaki ka gwa boote khangndi.

⁷ Aaki vu̱rkya ɗyi nu memu̱naran daki yenda, su̱bu̱rti memu̱na su̱ ɓa, yang nu̱ ranna aaki ɓa, ku̱me Magham wa ka shim njif nu̱ shiki vu̱rti ndu̱ mu̱ndi memu̱naran.

⁸ Magham ka ɗu̱ma vu̱r barke ye nu dukti ɗyi nu̱ke tun a gangndan, ma ku̱ gwa nu ɗyi nu̱ke tun a gangndan aakochi, tun gwa tu̱ duk wanang tu̱k, ma ku̱ shi nu mbarkir ye nduki.

⁹ Ba wa nu̱ Bu̱lar ɓalar ɓu̱ Magham zu̱ki za, “Wa ka vu̱r ye nu̱ nungndiku kharan nggaran. Dambi ɓaran ba a nje woɗa su̱ ɓa.”

¹⁰ Magham ke nu̱ vu̱r pooni ye nu̱ ghuti tu̱ kaɓi, tu̱ vu̱r ɗye zu̱mndi yenda tu̱k. Ku̱me nang Magham ka vu̱r ye pooni ye nu ma kaɓ nu, chin ka saki tu̱k tun ku̱m boote khang ku̱me dambi ɓaanu.

¹¹ Ka shi barke ye nu aakochi mbu̱ aa nyi tunu, ma ku̱ vu̱r nu mbu̱ mu̱ndi memu̱na aa nyi sarchi. Nduki khang ka kuna Magham ku̱me vu̱rtiku nu̱ke tun a ma ru̱ktan ye wor nu̱ mbu̱ khaarem.

¹² Ai, tlu̱nar mu̱nkir nu̱ke tun a shiran nang, a shaatakya nu̱ mbu Yesu ɗyenda ɓa, nduki a kuna Magham ku̱men.

¹³ Tlu̱nar nun shiki nang, ka sa nduki tu̱ gor dlu̱m Magham ku̱me tun wa mbu ɗyi nu̱ Labar mbarkandi ɓu̱ Masiya zu̱ki, nu̱ke tun wa maita, kom ndu̱ shaatar nun shiki ye wor ndu̱ ɓeeni nduki kha nu nggaran.

¹⁴ Nduki nang ka shi barar ye nu, a kwaaronu mbu̱ memu̱na wor ku̱me mu̱nkir nu̱ peetaki tamandi ɓu̱ nduku, nu̱ Magham vu̱rki du̱mbu̱r shiran ye nu.

¹⁵ Kuna mi Magham ku̱me mu̱nkir ɓaran nu̱ peetaki me zu̱r ɓu̱ nduku.